Hadavyja ziemlarobčyja pracy i śviaty kalandarnaha koła biełarusaŭ, znakavyja padziei žyćciovaha cykła: naradžeńnie—šlub—naradžeńnie dziaciej—śmierć čałavieka — zaŭsiody supravadžalisia pieśniami. Składanka «Śpievy Biełarusi» — sproba sabrać pad adnu vokładku najbolš jaskravyja ich uzory.
«U dachryścijanskuju epochu kalandarna-abradavyja śviaty ŭ Biełarusi byli pieršapačatkovaj formaj adliku času, — piša ŭ pradmovie da dysku falkłarystka Taćciana Pieśniakievič. — Kožnaja para hoda mieła adpaviednyja abrady i ich piesiennaje supravadžeńnie».
«Śpievy Biełarusi» — svojeasablivaja fołk-encykłapiedyja, bo tut prezientavanyja ci nI ŭsie rehijony krainy — ad Mazyra da Hrodna i ad Paleśsia da Padniaproŭja. A taksama usie papularnyja vidy kaladarna-abradavych i siamiejna-abradavych piesień — chreśbinnyja, biasiednyja, kaladnyja, viesnavyja, juraŭskija, kupalskija, žniŭnyja...
«Heta zbor aŭtentyčnaha falkłoru, jaki naŭrad ci pačuješ na «Słavianskim bazary», chiba kali-nikali takoje možna pasłuchać na festach u miastečkach», — kaža pradusarka Aryna Vielež.
«Śpievy Biełarusi» — tolki adzin z tamoŭ ambitnaha prajektu, «Biełaruskaj muzyčnaj kalekcyi» z 16 dyskaŭ. Jaho źbiraje Aryna Vielež supolna z falkłarystami Taćcianaj Pieśniakievič, Siarhiejem Hłuško i Studenckim falkłornym tavarystvam. Jany płanujuć sabrać u «Kalekcyi» vybitnyja ŭzory biełaruskaj muzyčnaj spadčyny. Užo vyjšaŭ dysk siaredniaviečnaj muzyki ŭ vykanańni «Staroha Olsy», zbornik duchoŭnych śpievaŭ «Muzyka biełaruskich chramaŭ», dysk postfołku i kružełka biełaruskaha muzyčnaha avanhardu. Jašče pabačać śviet zborka muzyki biełaruskaha Reniesansu, dysk śpievaŭ ChVII-XIX st. u vykanańni Viktara Skorabahatava, dysk stylizacyj pad muzyku 1920-ch, etna-džazu, a taksama najlepšaje ź biełroka 1980—90-ch. Usie dyski sieryi abjadnanyja i fizična: na karenčyku kožnaha budzie padadziena pa frahmiencie staražytnaj mapy. Słuchač, jaki sabraŭ usie dyski, zmoža ciešycca z abrysu VKŁ uzoru ChVI st.
«Śpievy Biełarusi» azdoblenyja taksama pa-anhlijsku. Čamu? «Naš prajekt i na ekspart, najpierš u Niamieččynu i Polšču, dzie isnuje popyt na biełaruski falkłor, — kaža Aryna Vielež. — U dadatak adziny vytvorca DVD-dyskaŭ u Biełarusi, kampanija Vigma, paviarnułasia abliččam da ajčynnaj muzyki. I jany taksama zacikaŭlenyja ŭ prasoŭvańni hetaj muzyki ŭ Jeŭropie».
Kružełka vyjšła nakładam u 1500 asobnikaŭ.
Śpievy Biełarusi/Authentic Songs of Belarus. «Vihmahrup», Minsk, 2009.
