Viadomy prapahandyst Dźmitryj Kisialoŭ, daviedaŭšysia pra ŭkaz Zialenskaha, vykazaŭsia nastupnym čynam:
«Jość na Zachadzie lubimy tezis: na Ukrainie niama nacystaŭ, tamu što prezident Zialenski — jaŭrej. A jaŭrej pa vyznačeńni nacystam być nie moža. Jak vyśviatlajecca ŭ XXI stahodździ, moža, i navat vielmi. Voś i novyja dakumienty padjechali.
U aŭtorak Zialenski padpisaŭ ukaz ab prysvajeńni 10-j asobnaj horna-šturmavoj bryhadzie USU nazvy «Edelviejs» — «za ŭzornaje vykanańnie zadač». Ale dazvolcie, uźnikajuć asacyjacyi. I ŭ Zialenskaha taksama jany nie mohuć nie ŭźnikać. U hady Vialikaj Ajčynnaj vajny hetuju pryhožuju kvietkavuju nazvu nasiła 1-ja hornapiachotnaja dyvizija Viermachta.
[…] Svaim ukazam Zialenski aficyjna pryznaje nie tolki «bajavyja zasłuhi» 10-j asobnaj horna-šturmavoj bryhady VSU, ale i pierajemnaść idej hitleraŭskaj Hiermanii. A nacysckaja simvolika na Ukrainie ŭ chodzie daŭno. Toj ža Zialenski, nie biantežačysia, vyviešvaje na svajoj staroncy ŭ sacyjalnych sietkach fatahrafii bajcoŭ ź simvolikaj dyvizii «Miortvaja hałava». < … > Na emblemie bataljona «Danbas» — nacyscki Aroł, stylizavany pad tryzubiec. Taki znak vykarystoŭvaŭsia viermachtam jašče ŭ 1935-m».
The Insider u adkaz na heta adznačaje, što 1-ju hornapiachotnuju dyviziju Viermachta sapraŭdy nazyvali «Edelviejs» z-za jaje emblemy — kvietki edelviejsa na zialonym fonie. Ale aficyjna takuju nazvu jana nie nasiła, sama ž kvietka na emblemie — spadčyna kolišniaj aŭstra-vienhierskaj armii i niepasredna da nacysckaj simvoliki adnieści jaje nijak nielha.
Znak adroźnieńnia patrulfiurara (šarahoŭca 1 kłasu) korpusa hornych strałkoŭ aŭstra-vienhierskaj armii
Navat paśla Druhoj suśvietnaj vajny hety simvał vykarystoŭvajecca hornymi čaściami Bundeśviera; navat u chodzie denacyfikacyi Hiermanii ničoha źviazanaha z nacyzmam u vyjavie kvietki nichto nie ŭbačyŭ.
Znak hornych strałkoŭ Bundeśviera
Ale samaje cikavaje i pikantnaje, što z 2011 hoda nazvu «Edelviejs» nasiŭ 17-y atrad śpiecyjalnaha pryznačeńnia Rashvardyi, u 2016 hodzie pieranazvany ŭ «Avanhard».
Emblema rasijskaha atrada śpiecyjalnaha pryznačeńnia «Edelviejs»
Uvohule ž nazva «Edelviejs», jak adznačaje vydańnie, davoli papularnaja siarod rasijskich arhanizacyj samaha roznaha profilu. Tak, naprykład, nazyvałasia sietka supiermarkietaŭ u Tatarstanie (praŭda, jana zbankrutavała i zakryłasia ŭ 2022 hodzie), maskoŭskaja IT-kampanija, vytvorca hornych padjomnikaŭ, kampanija pa prajektavańni i budaŭnictvie pramysłovych pradpryjemstvaŭ, vytvorca vyrabaŭ sa štučnaha kamieniu i pastaŭščyk abałonak dla kaŭbasy i sasisak.
Što tyčycca emblemy adnoj z čaściej USU z čerapam, to jana nie maje nijakaha dačynieńnia da tankavaj dyvizii SS «Miortvaja hałava». Heta emblema 72-j asobnaj miechanizavanaj bryhady imia «čornych zaparožcaŭ», nazvanaj u honar pałka armii Ukrainskaj Narodnaj Respubliki, jaki isnavaŭ u 1918-1920 hadach. Na ściahu pałka byŭ čerap z kostkami i łozunh «Ukraina albo śmierć». Na narukaŭnych šaŭronach sučasnaj 72-j bryhady — toj ža samy łozunh.
I zusim užo niemahčyma zrazumieć, iranizuje The Insider, čamu Kisialoŭ nazyvaje arła na emblemie bataljona «Danbas — Ukraina» nacysckim,kali sam žyvie ŭ krainie, dzie na dziaržaŭnym hierbie padobnaja ptuška.
Praŭda, u niamieckaha arła na adnu hałavu mienš, ale hierb z arłom byŭ i ŭ kajzieraŭskaj Hiermanii, i ŭ Viejmarskaj respubliki; nacysty tolki prymusili jaho trymać u łapach dubovy vianok sa svastykaj, ničoha padobnaha na na emblemie «Danbasa — Ukrainy» niama.
Emblema bataljona «Danbas-Ukraina»
Dy i z Hiermanijaj simvał «Danbasa» nijak nie źviazany: pa samaj raspaŭsiudžanaj viersii, tryzub na ŭkrainskim hierbie pachodzić ad hieraldyčnaha znaka Rurykavičaŭ — stylizavanaha malunka sokała, jaki pikiruje na zdabyču. Tak što stvaralniki emblemy bataljona ŭsiaho tolki nadali hetamu znaku bolš paznavalnyja abrysy drapiežnaj ptuški — chutčej sokała, čym arła.
Čytajcie taksama:
U internet zapuścili «fota pres-sakratarki pałka Kalinoŭskaha z akupavanaha Kryma». Jano akazałasia fejkam
Prapahandysty vykłali «sakretny dakumient pra katastrafičnyja straty Ukrainy». Ale jon akazaŭsia fejkam
Absurdny fejk prapahandy: U Bierlinie vysiekli haradski park na 200 hiektaraŭ, bo niama čym aciaplać damy
