«Pa telefonach ciapier tolki pratakolnyja razmovy. Usio pa rabocie, ni ŭprava ni ŭleva. Havoryš stolki, kolki hatovy dać prasłuchać uubešnikam [UUB — upraŭleńnie ŭłasnaj biaśpieki]. Usie astatnija razmovy — tolki praz mesendžary.
Apošnija miesiacy uubešniki aktyŭna ŭkidvajuć infarmacyju, što jany mohuć słuchać telehram, pryvodziacca prykłady aficeraŭ bieź imionaŭ, jakich nibyta aryštavali, bo niešta pierachapili. Ale nichto nie viedaje, što za jany. Tamu heta vyhladaje jak bajka, kab źnizić davier da taho, što niepadkantrolna kantraloram», — skazaŭ «Našaj Nivie» adzin ź biełaruskich siłavikoŭ.
«U našym adździele ŭsie apieratyŭniki razmaŭlajuć praz Telegram ci Signal pa asabistych pytańniach. Pačałosia heta, badaj što, paśla źlivaŭ «Bajpoła». Ja z hetym źviazvaju toje, što bolš prasłuchoŭki stavicca na «kuryłkach» — prosta ŭžo mienš mohuć słuchać razmovy, sprabujuć niešta vyčeplivać u inšych miescach», — dadaŭ inšy naš surazmoŭca ź milicyi.
Čytajcie taksama: U Minsku prasłušku ciapier rasstaŭlajuć nie tolki ŭ kvaterach, ale i na niekatorych vulicach
«Ja b taksama nie vyklučaŭ uzrastańnia maštabu kamunikacyi našych «siłavikoŭ» z rasijskimi «kalehami». Raniej niefarmalnyja suviazi sprabavali kantralavać, adsočvać. A ciapier hetak ža, jak my biez nastupstvaŭ havorym z žurnalistami, łajalnyja Rasii aficery mohuć kantaktavać z rasijskimi kuratarami, abo prosta «kalehami», farmavać ź imi hurtki pa intaresach. Ja to ŭ šyrokija kantakty i pahrozu zmovy z Zachadu nie vieru, a voś u zmovu suprać Łukašenki, inśpiravanuju Rasijaj — całkam. I ja nie toje što dumaju, ja viedaju, što Łukašenku hetaje pytańnie chvaluje, jamu ŭžo nie mohuć prynosić, jak raniej, stenahramy razmovaŭ jaho aficeraŭ i čynoŭnikaŭ na «prosta pačytać». U krainie sapraŭdy pavialičvajucca maštaby prasłuchoŭki dziaržsłužačych», — dadaŭ jašče adzin naš surazmoŭca.
«Ja pa GSM razmaŭlaju sa svajakami na pobytavyja temy: bulba, ramont mašyny, vučoba dziaciej. Nijakich tonkich tem nie zakranaju, prosta zusim nie havaryć pa GSM — heta padazrona. A ŭsio važnaje pakidaju dla mesendžaraŭ, navat razmovy z adkrytymi «jabaćkami» — taksama tam. Jany taksama pa GSM asabliva nie havorać, prynamsi ŭ maim kalektyvie», — skazaŭ nam adzin z abłasnych čynoŭnikaŭ.
