Novyja ŭražańni nie tolki ad novych krain
Kab pajechać u inšuju krainu, u vas pavinien być choć minimalny, ale ŭsio ž taki biudžet ź niekalkich sotniaŭ jeŭra. Kali ŭžo aščadžać pa poŭnaj, to možna adpravicca ŭ padarožža pa Biełarusi.
Viadoma, takaja parada vykliča masu skieptycyzmu, ale, paviercie, i ŭ našaj krainie jość na što pahladzieć. Pry najaŭnaści aŭtamabila prajedźciesia ŭ susiedniuju vobłaść abo ŭ samyja addalenyja kutki. Na rovary možna dabracca da rajonnych słavutaściaŭ, jakija dakładna jość u vašym rehijonie. Uvohule, chto šukaje, toj zaŭsiody znojdzie.
Nie prapuskajcie karysnyja znajomstvy
Surazmoŭnica «Mocnych navin» Taćciana skončyła histaryčny fakultet BDU. U studenckija hady aktyŭničała, z zadavalnieńniem udzielničała ŭ roznych prahramach ad univiersiteta. Adna ź ich praduhledžvała abmien studentami. Tak jana paznajomiłasia z maładym čałaviekam z Francyi — Polem.
Maładziony doŭha pierapisvalisia, i letam chłopiec pryjechaŭ u Biełaruś. A Taćciana praz paŭhoda adpraviłasia da jaho ź vizitam u adkaz. Najaŭnaść siabra ŭ Paryžy dazvoliła prystojna aščadzić: nie pryjšłosia šukać žyllo, abiedali nie ŭ raśpijaranych kaviarniach i restaranach, a va ŭtulnych ustanovach, dzie možna smačna i biudžetna pajeści.
Siudy ž — kulturnaja prahrama: Pol pakazaŭ nie turystyčny, a sapraŭdny Paryž, pravioŭ pa vułkach, barachołkach, ustanovach, kudy zvyčajna nie zahladajuć vandroŭniki, ale jany tak vydatna pieradajuć kałaryt i nastroj horada.
Paźbiahajcie «turystyčnaha siezonu»
U kožnaj krainy jość svoj pikavy siezon: zvyčajna ŭ hety čas ceny na žyllo, ježu i ekskursii samyja vysokija. Źviarnicie ŭvahu, kali ŭ krainie, kudy vy źbirajeciesia, pravodziać niejkija znakavyja mierapryjemstvy abo nacyjanalnyja śviaty. Zvyčajna ŭ hetyja dni ničoha nie pracuje, numaroŭ u chostełach i hatelach nie znajści, a ŭstanovy zabityja miascovymi i turystami pad zaviazku.
Tak, naprykład, u lutym u Vieniecyi prachodzić znakamity Vieniecyjanski karnavał, u sakaviku vandroŭniki znoŭ źbirajucca na karnavał, tolki hetym razam brazilski. U krasaviku ŭ Tajłandzie adznačajuć Novy hod — Sanhkran.
Pieryjad pierad kaladnymi i navahodnimi śviatami — nie najlepšy čas dla naviedvańnia Jeŭropy: tak, pryhoža, ale vielmi doraha.
Raźbiaryciesia z hrašyma
Nie palanujeciesia i daviedajciesia, jak lepš raspłačvacca ŭ krainie, kudy adpraŭlajeciesia ŭ adpačynak.
Naprykład, u Arhiencinie isnuje «čorny kurs», tak što bolš vyhadna apłačvać usio dalarami. U 2023 hodzie 100 dalaraŭ pa aficyjnym kursie kaštavali 20200 piesa, a «pa-čornamu» — 37900 piesa. Roźnica vidavočnaja. Kali źbirajeciesia apłačvać pakupki kartkaj, to kurs budzie aficyjnym. Jašče adna asablivaść: abmianiać valutu pa «čornym kursie» ŭ Arhiencinie možna prosta na vulicy, heta nie karajecca zakonam, bo ličycca pryvatnaj ździełkaj pamiž ludźmi.
Ale nie va ŭsich krainach tak. Naprykład, u Bałharyi za heta mohuć atrymać pakarańnie jak pradaviec, tak i pakupnik. Uvohule, akuniciesia ŭ finansavaje pytańnie z hałavoj.
Adpraŭlajciesia na rynak
Praktyčna ŭ kožnaj krainie rynak — heta asablivaje miesca, sa svajoj niepaŭtornaj enierhietykaj. A jašče tut vielmi časta pradaŭcy achvotna dajuć pasprabavać tavar.
Surazmoŭcy na sabie pravieryli haścinnaść žycharoŭ Turcyi i Hrecyi: sadavina, syry, pradukty ź miasa. Prajści niekalki radoŭ — i možna trochi pierakusić.
Daviedajciesia, ci pryniata ŭ krainie, kudy vy adpraŭlajeciesia, tarhavacca. Kali tak — uklučajem usio pryrodnaje abajańnie i chitraść, i tarhujemsia, jak u apošni raz u žyćci. Naprykład, u Jehipcie, kali adrazu dastaniecie hrošy i addaście pradaŭcu, jon moža navat pakryŭdzicca. A ŭ Francyi da kanca dnia ceny na pradukty na rynkach źnižajucca, a pradaŭcy i ŭvohule mohuć pakłaści ŭ padarunak jabłyki abo jakuju-niebudź harodninu.
Nie zusim sumlenna, zatoje ekanomna
Tak rabić nie raim, ale takija ŭžo łajfchaki padkazali. U niekatorych hatelach maładym u miadovy miesiac mohuć zrabić kamplimient u vyhladzie butelki ałkaholu, desiertu, biaspłatnaj viačery ci ŭvohule pavysić katehoryju numara. Zvyčajna daty ŭ pašparcie skurpulozna nie praviarajuć.
Tak raz schitravali surazmoŭcy, jakija adpačyvali ŭ Italii: sprava išła da viasiella, ale na momant padarožža para jašče nie ŭzakoniła svaje adnosiny. Košt maleńkaj chitraści — butelka ledzianoha šampanskaha, kłubnicy ŭ šakaładzie i kruasany na śniadanak jak prezient ad hatela.
Uražańni — zadarma
U mnohich haradach jość słavutaści, na jakija možna pahladzieć biaspłatna: parki, histaryčnyja miescy, pomniki i navat mohiłki. Źviarnicie ŭvahu, što niekatoryja muziei ładziać dni, kali prajścisia pa ich załach možna biaspłatna.
Tak, u Paryžy možna pabadziacca pa ŭniviermahu Galeries Lafayette, u Barsiełonie ahledzieć horad z vyšyni ptušynaha palotu na hary Cibidaba abo prahulacca ŭ Rymie pa rajonie Trasteviere.
Jašče adzin łajfchak — admoŭciesia ad płatnaha hida. Ciapier u mnohich sacyjalnych sietkach jość supolnaści, dzie miascovyja aktyvisty hatovyja biazvypłatna (abo za simvaličnuju płatu) pravieści aŭtarskija ekskursii.
Zdymajcie žyllo z kuchniaj
Navat kali charčavacca ŭ samych tannych kaviarniach, usio adno vyjdzie daražej, čym hatavać samomu. Branirujučy žyllo, pierakanajciesia, što ŭ im budzie kuchnia, dzie vy zmožacie padsmažyć jaječniu na śniadanak ci padahreć harnir ź miasam na viačeru.
Natalla i Alaksiej letaś pabyvali ŭ Sankt-Pieciarburhu. Pakolki jany chacieli aščadzić na pajezdcy pa maksimumu, to padładzili svoj hrafik pad raskład siabroŭ, jakija ŭvieś čas tam žyvuć i źjazdžali na dva tydni na adpačynak. Tak maładziony apynulisia ŭ ichniaj kvatery, za čas adsutnaści haspadaroŭ dahladajučy kvietki i chatniaha ŭlubionca.
Paśla niekalkich dzion piešych padarožžaŭ pa Piciery jany zrazumieli, što śniedać i viačerać tańniej doma, čym kuplać: pryčym, pa ich słovach, jany nie jeli ŭ niejkich raśpijaranych ustanovach, a nie hrebavali sietkavymi restarančykami.
Žyćcio biez roŭminhu
Nie kuplajcie miascovyja sim-karty i nie padklučajcie roŭminh. Lepš daviedajciesia, dzie jość biaspłatny vaj-faj (naprykład, u łobi hatela, u niekatorych kaviarniach i handlovych centrach). Źviazvacca ź siabrami abo svajakami možna pa videasuviazi, jakaja jość u mnohich miesiendžarach.
Z saboj — tolki samaje nieabchodnaje
Kali źbirajeciesia adpačyć ekanomna, to budźcie hatovyja padarožničać ulehcy. Pa-pieršaje, vam nie daviadziecca dapłačvać za bahaž. Pa-druhoje, jaho nie zhubiać padčas pieralotu. Pa-treciaje, heta dyscyplinuje: vy dakładna praanalizujecie, što vam sapraŭdy nieabchodna ŭziać z saboj zamiest treciaj pary basanožak abo vypramlalnika dla vałasoŭ.
Jaŭhien u 2018 hodzie adpraviŭsia ŭ Hiermaniju aŭtastopam. Z saboj moh uziać tolki abmiežavanuju kolkaść rečaŭ. Takim čynam, prykładny śpis: kamplekt ciopłaj vopratki (chudzi, spartyŭnyja štany na bajku), niekalki futbołak, šorty, zapasnaja para kiedaŭ, nižniaja bializna i škarpetki, paŭerbank, leki, minimalny kaśmietyčny nabor u trevieł-viersii (šampuń 3 u 1, zubnaja pasta i ščotka, manikiurnyja nažnicy), ručnik, daždžavik, termakubak, hrošy i dakumienty. Takoha askietyčnaha naboru chapiła dla siamidzionnaha padarožža.
Adsočvajcie źnižki
Apošnim časam «Biełavija» raduje dobrymi źnižkami na kvitki. Jašče adzin łajfchak, jaki dapamoža aščadzić na kvitkach — kuplać ich jak maha raniej.
Kali vy ŭklučyli režym supierekanomii, to možna adpravicca padarožničać aŭtastopam. Taki vid pieramiaščeńnia vielmi papularny za miažoj. Pryčym nikoli nie viedaješ, chto spynicca ciabie padvieźci: stareńkaja mašynka abo aŭtamabil kłasa luks.
Zamiest hatela — načnyja pierajezdy
Kali vy vyrašyli padarožničać aŭtobusnym turam, to źviarnicie ŭvahu, što tańniejšymi buduć tyja, u jakich jość načnyja pierajezdy. Tak, spać u aŭtobusie toj jašče atrakcyjon, śpina, ruki i nohi taksama vam «dziakuj» nie skažuć, ale ŭražańni ad novaj krainy pavinny pierakryć usie niazručnaści.
Žyćcio — dziŭnaja štuka, tamu nie adkładajcie na potym pajezdki tudy, dzie daŭno chacieli pabyvać, bo, jak akazałasia, kali ŭsio raspłanavać i padyści z rozumam, to sumu vydatkaŭ možna prystojna źmienšyć.
Čytajcie taksama:
Dzie pabyvać na majskija vychadnyja? Niezvyčajnyja łakacyi jość va ŭsich biełaruskich abłaściach
Biełarus idzie pieššu pa Jeŭropie 2500 kiłamietraŭ — šlacham sułtana Sulejmana
Błohier Blišč raskazaŭ, jak nie zmoh patrapić u Saudaŭskuju Araviju, Aman i Kurdystan
