Pavodle abvinavačvańnia, Juryj dapamahaŭ inšym palitviaźniam: paprasiŭ znajomych adkryć polskuju bankaŭskuju kartku, na jakuju atrymlivaŭ hrošy, jakija paśla nakiroŭvaŭ svajakam palitviaźniaŭ. Hrošy na dapamohu atrymlivaŭ ad «arhanizacyj, jakija pazicyjanavali sabie jak pravaabarončyja». Piać miesiacaŭ Juryj utrymlivaŭsia ŭ rasijskim śledčym izalatary, jašče try miesiacy — u biełaruskich.
Pa danych abvinavačańnia, usiaho z 27 lutaha 2021 hoda pa 3 lutaha 2022 hoda Kaściuk atrymaŭ vypłaty dla šaści hramadzian.
Nahadajem, Kaściuk adbyŭ termin za «źniavahu dziaržaŭnych simvałaŭ» i 6 studzienia vyjšaŭ na volu. 15 lutaha jaho zatrymali supracoŭniki KDB z nahody ŭdziełu ŭ telehram-čacie palitźniavolenych «chimikaŭ» «Volejboł po vychodnym». Viadoma, što Kaściuk byŭ mocna źbity, było padazreńnie na złamanyja rebry. Kryminalnaja sprava pa art. 361-4 KK (sadziejničańnie ekstremisckaj dziejnaści) nie była spyniena. Chłopiec źjechaŭ u Rasiju — jaho abviaścili ŭ miždziaržaŭny vyšuk.
15 maja 2022 hoda jon byŭ zatrymany ŭ Sočy. Juryj čakaŭ ekstradycyi ŭ Biełaruś u rasijskim śledčym izalatary. Z dapamohaj advakata jon padaŭsia na status uciekača, paśla admovy nadać jamu prytułak Juryj vyrašyŭ abskardzić rašeńnie. Niahledziačy na praces, 13 kastryčnika prystavy advieźli Juryja ŭ aeraport dla ekstradycyi. Pry hetym jaho źbivali pa darozie tudy i na zvarotnym šlachu. U aeraporcie Juryj sprabavaŭ naškodzić sabie: parezaŭ žyvot, kab spynić katavańni i vydvareńnie. Jaho viarnuli ŭ centr časovaha ŭtrymańnia zamiežnych hramadzian, dzie jon źniaŭ paboi.
16 kastryčnika 2022 hoda Juryja Kaściuka tajemna vyvieźli ŭ Biełaruś i źmiaścili ŭ IČU Pružanaŭ, a paźniej pieraviali ŭ baranavicki SIZA-6. Viadoma, što tam chłopiec zaznaje žorstkaje abychodžańnie. 7 śniežnia jahonuju spravu nakiravali ŭ sud. Nieŭzabavie Juryja pieraviali ŭ brescki SIZA-7.
