Nikoła Sterdžen
Abvieščanaje ŭ sieradu ranicaj adnahałosnaje rašeńnie piaci sudździaŭ Viarchoŭnaha suda zakryvaje šatłandskim nacyjanalistam pramy zakanadaŭčy šlach da refierendumu, ale zatoje ŭmacoŭvaje ich palityčnyja pazicyi i abiacaje dalejšyja prablemy ŭładam Złučanaha Karaleŭstva, pakolki padsiłkoŭvaje ŭpeŭnienaść šatłandcaŭ u tym, što anhličanie ich pryhniatajuć, dušać demakratyju i admaŭlajuć u pravie na samavyznačeńnie.
U Šatłandyi ŭžo byŭ refierendum, u 2014 hodzie, i tady 55% vykazalisia suprać razvodu z Brytanijaj, a 45% padtrymali niezaležnaść. Adnak praz dva hady Vialikabrytanija prahałasavała za vychad ź ES, i šatłandcy zapatrabavali novaha refierendumu, pakolki jany jakraz chacieli zastacca ŭ Jeŭrasajuzie i prahałasavali suprać breksitu sa zrujnavalnym likam 62% suprać 38%.
Adnak kali pieršy refierendum prajšoŭ sa zhody Łondana, to na druhi šatłandcy atrymali ćviorduju admovu. Partyja nacyjanalistaŭ SNP zrabiła niezaležnaść adzinym punktam svajoj prahramy i vyjhrała z tych časoŭ usie vybary ŭ Šatłandyi. Z takim mandatam jana abviaściła, što praviadzie refierendum 19 kastryčnika 2023 hoda, ale zakon prymać nie stała — vyrašyła źviarnucca ŭ Viarchoŭny sud zahadzia, kab paźbiehnuć niepatrebnych ciažbaŭ paźniej.
I voś sud pastanaviŭ, što paŭnamoctvaŭ prymać taki zakon u šatłandskaha parłamienta niama.
Heta nie kaniec, papiaredziła pieršy ministr (kiraŭnik urada) Šatłandyi Nikoła Sterdžen.
«Siońniašniaje rašeńnie zakryvaje tolki adzin sa šlachoŭ da taho, kab hołas Šatłandyi pa pytańni ab niezaležnaści byŭ pačuty. Ale ŭ demakratyi prymusić nas zamaŭčać niemahčyma i nie atrymajecca», — zajaviła Sterdžen.
