Jon asudziŭ na try hady kałonii Illu Davydzienku, na 2,5 hoda kałonii — Marynu Markievič, na paŭtara hoda kałonii — Hannu Kisialovu, Viktara Chimarodu i Maksima Maculeviča. Taksama viadoma, što «Minsktrans» padaŭ isk na 15 tysiač rubloŭ. Na abviaščeńni prysudu palitźniavolenyja byli ŭ kajdankach, ich supravadžała šaściora kanvairaŭ.
Usich pryznali vinavatymi pavodle art. 368 za spalvańnie pudziła Łukašenki, a Illu i Marynu taksama — pavodle art. 342 Kryminalnaha kodeksa za ŭdzieł u Maršy.
Usie abvinavačanyja ŭ vyniku pryznali vinu, choć na pieršych dopytach nichto ź ich hetaha nie rabiŭ. Dokazami pa spravie stali fotazdymki z fotaaparata Illi Davydzienki, a taksama skrynšoty z zapisaŭ z telehram-kanałaŭ, dzie byli apublikavanyja zdymki asabistych sustreč abvinavačanych.
Chto takija abvinavačanyja?
U Viktara, Maksima i Hanny jość dzieci, jany prasili viarnuć ich u siemji. Dla siemjaŭ usich piaci abvinavačanych zatrymańnie blizkich stała vialikim udaram: tady ŭ adzin dzień kropkava pryjšli pa kožnaha ź ich.
Viadoma, što Illa Davydzienka zachaplajecca fotazdymkaj.
Maryna — dyzajnier i tvorčaja asoba. Znajomyja raspaviadajuć, što jana dobraja i spahadlivaja dziaŭčyna i lubić katoŭ: doma jany z matulaj majuć šmat chatnich žyvioł. Da zatrymańnia jana pracavała ŭ handlovaj sietcy «Karona» — afarmlała banery i inšuju drukavanuju pradukcyju. Viktar Chimaroda — «cudoŭny siemjanin, jaki vielmi lubić svaich dziaciej». Znajomyja kažuć, što kali jaho žonka na pracy, jon z achvotaj zastajecca ź imi i moža pryhatavać piražki i inšyja stravy. Jon viasioły, dobry i spahadlivy čałaviek. Da pratestaŭ u 2020 hodzie pracavaŭ u banku, a potym syšoŭ u zamiežnuju firmu i pačaŭ pracavać u nahladzie za finansami. Paśla ŭtrymańnia na Akreścina jamu była nieabchodnaja psichałahičnaja dapamoha.
Maksim Maculevič taksama vielmi lubić syna, maje cudoŭnaje pačućcio humaru. Da zatrymańnia jon pracavaŭ u «Jeŭratorhu».
Hanna Kisialova — mastačka. Jana lubić paeziju i vyšyŭku. «Tvorčaja, svabodalubivaja, z vydatnym pačućciom humaru», — tak apisvajuć jaje znajomyja. Da zatrymańnia jana pracavała dyzajnierkaj u pryvatnaj typahrafii.
Palitźniavolenym brakuje padtrymki, tamu napisać im listy salidarnaści, padtrymać hrašovymi pieravodami i banderolami možna pa adrasie SIZA-1. 220030, h. Minsk, vuł. Vaładarskaha, 2.
