U svajoj zajavie MAK źviartaje ŭvahu na toje, što pryncypam alimpijskaha ruchu nie adpaviadaje ideja karać spartoŭcaŭ za dziejańni ich uradaŭ, kali sami spartoŭcy nie ŭdzielničali aktyŭna ŭ hetych dziejańniach.
Tym nie mienš, ciapierašniaja vajna va Ukrainie stavić pierad MAK składanaje pytańnie.
Spartoŭcy z Rasii i Biełarusi ciapier majuć mahčymaść udzielničać u spabornictvach, ale ž šmatlikija atlety z Ukrainy nie mohuć hetaha rabić, bo na ich krainu ździejśnieny napad.
Tamu MAK pryniaŭ rašeńnie rekamiendavać usim mižnarodnym spartovym fiederacyjam i arhanizataram spartovych padziej nie zaprašać spartoŭcaŭ i čynoŭnikaŭ z Rasii i Biełarusi na mižnarodnyja spabornictvy i nie dazvalać im u ich udzielničać.
Kali ž pa jurydyčnych ci arhanizacyjnych pryčynach hetuju rekamiendacyju niemahčyma chutka vykanać, MAK zaklikaje mižnarodnyja spartovyja fiederacyi i arhanizataraŭ spabornictvaŭ, kab atlety i kamandy z Rasii i Biełarusi ŭdzielničali ŭ ich tolki ŭ niejtralnym statusie.
U takim vypadku na spabornictvach nie pavinny hučać nazvy hetych krain, taksama nielha budzie demanstravać ich nacyjanalnyja simvały, kolery, ściahi, užyvać ich dziaržaŭnyja himny.
Taksama ŭ suviazi z parušeńniem Alimpijskaj chartyi i Alimpijskaha pieramirja, ździejśnienaha rasijskim uradam, MAK adklikaje alimpijskija ordeny va Uładzimira Pucina, a taksama ŭ Dźmitryja Čarnyšenki (namieśnik kiraŭnika ŭrada RF) i Dźmitryja Kozaka (namieśnik kiraŭnika Administracyi prezidenta RF).
