Fota: depositphotos.com.
Manholija, Kryvy Roh i «Kvartał 95»
Zialenskamu 44 hady, jon rodam z horada Kryvy Roh, pachodzić z ukrainska-jaŭrejskaj siamji. Dzied Uładzimira — udzielnik Vialikaj Ajčynnaj vajny, na jakoj atrymaŭ dva ordeny Čyrvonaj Zorki (darečy, ukrainski prezident zhadvaŭ jaho ŭ adnym sa svaich zvarotaŭ). Baćki Zialenskaha — doktar techničnych navuk i chatniaja haspadynia ź inžyniernaj adukacyjaj.
Cikavy fakt ź dziacinstva Uładzimira: jon pražyŭ čatyry hady ŭ Manholii, dzie baćka Zialenskaha budavaŭ horna-abahačalny kambinat. Paźniej siamja viarnułasia va Ukrainu, dzie Vałodzia praciahnuŭ vučycca, zajmaŭsia sportam i samadziejnaściu.
A ŭ 11 kłasie sabraŭ kamandu vypusknikoŭ svajoj škoły i syhraŭ z kamandaj nastaŭnikaŭ u KVZ — vypuskniki vyjhrali.
U dziacinstvie Zialenski maryŭ stać dypłamatam, ale ŭ vyniku pajšoŭ vyvučać pravaznaŭstva. Ale papracavać pa śpiecyjalnaści jamu nie daviałosia. Padčas studentcva Uładzimira zaprasili ŭ viadomuju kamandu KVZ «Zaparožža — Kryvy Roh — tranzit», dzie spačatku jon staviŭ tancavalnyja numary, a potym i sam pačaŭ udzielničać u vystupach.
Paśla siezona-1997 u KVZ Zialenski i try inšyja akciory — Dzianis Manžosaŭ, Juryj Krapaŭ i Alaksandr Pikałaŭ — stvaryli ŭłasnuju kamandu «95-y kvartał». Zialenski staŭ u novym kalektyvie i kapitanam, i akcioram, i aŭtaram bolšaści numaroŭ, ź ciaham času pačaŭ pisać scenaryi dla karparatyŭnych śviat, pieradač i kancertaŭ.
U 2003 hodzie «95-y kvartał» syšoŭ z KVZ. U 2004-m kamanda debiutyravała z kancertami na ŭkrainskim telekanale 1+1, a jašče praz hod u komikaŭ źjaviłasia ŭłasnaje šoŭ «Viačerni kvartał» na kanale «Inter». Chutka byłaja kamanda «95-y kvartał» pieratvaryłasia ŭ studyju «Kvartał-95».
Fota: depositphotos.com.
Zialenski jašče i paśpieŭ zaśviacicca ŭ kino — praŭda, nie ŭ samych rejtynhavych filmach. Adznačym tryłohiju «Kachańnie ŭ vialikim horadzie», a taksama stužki «Ržeŭski suprać Napaleona» i «Słužbovy raman. Naš čas».
Asobnaja historyja — sieryjał «Słuha naroda», try siezony jakoha vychodzili na ekrany z 2015 pa 2019 hady. U hetym sieryjale Zialenski hraŭ Vasila Hałabarodźku, raźviedzienaha nastaŭnika historyi, jaki raptoŭna robicca prezidentam Ukrainy. Hetaja rola akazałasia dla jaho praročaj.
Palityčnaja pazicyja i prezidenctva
Zialenski padtrymlivaŭ Jeŭramajdan i ŭkrainskuju armiju na Danbasie, vystupaŭ z kancertami pierad ukrainskimi vajskoŭcami, achviaravaŭ hrošy na bataljony dobraachvotnikaŭ.
U svaich vystupach vyśmiejvaŭ rasijan, «DNR» i «ŁNR». Maskva adreahavała: na rasijskim telebačańni admianili tranślacyju «Viačerniaha kvartała», a rasijski Śledčy kamitet pačaŭ pravierku pa spravie ab finansavańni Zialenskim i inšymi ŭkrainskimi akciorami dziejańniaŭ ukrainskich siłavikoŭ. Tym nie mienš, Uładzimir vystupaŭ suprać zabarony rasijskim dziejačam kultury naviedvać Ukrainu.
31 śniežnia 2018 hoda Zialenski abviaściŭ, što źbirajecca pryniać udzieł u prezidenckich vybarach.
31 sakavika 2019 hoda prajšoŭ ich pieršy tur, u jakim Zialenski nabraŭ 30,24% hałasoŭ — amal u dva razy bolš, čym Piotr Parašenka.
Za dva dni da druhoha tura na stadyjonie «Alimpijski» ŭ Kijevie adbylisia publičnyja debaty pamiž Zialenskim i Parašenkam — sapraŭdnaje palityčnaje šou z himnam krainy, dvuma viadučymi, razahrevam i vostrymi pytańniami. A praz dva dni, 21 krasavika, Uładzimir Zialenski vyjhraŭ prezidenckija vybary z pakazčykam u 73,22% hałasoŭ vybarščykaŭ.
Uładzimir Zialenski na vybarčym učastku 31 sakavika 2019 hoda. Fota: depositphotos.com.
Svaimi hałoŭnymi dasiahnieńniami na pasadzie prezidenta Zialenski nazyvaŭ subjektnaść krainy, raźvićcio infrastruktury i ŭzmacnieńnie armii. Ale ž chapała i krytyki ŭ jaho bok, nie adnojčy Zialenskamu pahražali impičmientam. U lutym 2021 hoda - za zakryćcio apazicyjnych telekanałaŭ «112 Ukraina», ZIK i NewsOne, jakija adkryta krytykavali kiraŭnika krainy i jaho palityku. U kastryčniku 2021 hoda znoŭ pačali havaryć pra mahčymy impičmient Zialenskamu, kali źjavilisia danyja, što ŭkrainski prezident pieradaŭ častku svaich akcyj u afšornaj kampanii blizkamu siabru, jaki pracuje jaho daradcaj.
Siarod inšych pryčyn dla krytyki Zialenskaha, zhadajem zakon ab dealiharchizacyi krainy, zhodna ź jakim płanavałasia stvaryć rejestr ukrainskich aliharchaŭ. Tyja, chto pavinien byŭ być tudy ŭklučany, nie mieli mahčymaści finansavać palityčnyja partyi, ahitacyju i h.d., a taksama prymać udzieł u vialikaj pryvatyzacyi. Palityki i čynoŭniki, jakija niejkim čynam kantaktavali z aliharchami, pavinny byli padavać dekłaracyju pra heta ŭ Słužbu biaśpieki krainy.
Zakon mieŭ dla Ukrainy revalucyjny charaktar, ale ž zanadta ŭskładniaŭ žyćcio tym, chto i pavinien byŭ uvajści ŭ śpis aliharchaŭ. Samyja bahatyja ludzi krainy — Ihar Kałamojski, Rynat Achmietaŭ, Viktar Pinčuk — raniej śćviardžali, što źjaŭlajucca nie aliharchami, a biznesmienami, inviestarami ci prosta tymi, chto ŭziaŭ na siabie adkaznaść.
Pavodziny padčas vajny
Za pieryjad sa śniežnia 2021 hoda ŭzrovień padtrymki Zialenskaha vyras u try razy — pa danych na 26-27 lutaha dziejańni svajho hałoŭnakamandujučaha ŭchvalaje 91% ukraincaŭ.
Zamiežnyja miedyja adznačajuć mužnaść i rašučaść ukrainskaha lidara. Toj nie pahadziŭsia na prapanovy ab evakuacyi, chacia, pa jaho słovach, jon i źjaŭlajecca cellu numar adzin dla rasijskaj armii. Zialenski zapisvaje videazvaroty, u tym liku z vulic Kijeva, u jakich natchniaje ŭkraincaŭ praciahvać baraćbu, a taksama sprabuje patłumačyć hramadzianam Rasii i Biełarusi, što heta nie ich vajna — navat kali ich vojenačalniki ličać pa-inšamu. Jon paviedamlaje apošnija danyja pa bajavych dziejańniach, a taksama svajoj upeŭnienaściu ŭsialaje spakoj u suajčyńnikaŭ.
Talenavity mieniedžar i znaŭca śfiery kamunikacyj, Zialenski jašče i vydatna pradstaŭlaje Ukrainu na mižnarodnaj arenie ŭ hetyja ciažkija dni. Jon źviartajecca da suśvietnych lidaraŭ z zaklikami padtrymać krainu, i tyja prysłuchoŭvajucca da jaho. Aficyjnaja pradstaŭnica Biełaha doma Džen Psaki ŭ razmovie z žurnalistami 25 lutaha nazvała Zialenskaha važnym partnioram i paviedamiła, što Štaty jaho padtrymlivajuć.
Brytanski premjer Borys Džonsan, jaki časta sazvońvajecca ź Zialenskim, źviartaje ŭvahu na lidarskija jakaści ŭkrainskaha prezidenta i jaho mužnaść, a taksama na «nievierahodny hieraizm ukrainskaha naroda i jaho lidara». Pa mierkavańni Džonsana, Zialenski natchniaje i mabilizuje nie tolki svoj narod, ale i ŭvieś śviet pierad padziejami, što adbyvajucca va Ukrainie.
Ukrainski lidar publikuje fota i videa razam z paplečnikami, internet-karystalniki robiać ź im miemy i «tyktoki» — sučasnaja prajava narodnaj lubovi. Vialiki kantrast z Uładzimiram Pucinym, jaki navat z paplečnikami časam hutaryć na adlehłaści ŭ niekalki mietraŭ.
