Skrynšot trejlera
«Palaŭničyja na pryvidaŭ: naščadki» (anhł. Ghostbusters: Afterlife) — heta amierykanski fantastyčny kamiedyjny film 2021 hoda, źniaty režysioram Džejsanam Rajtmanam. Hety film — praciah znakamitych «Palaŭničych na pryvidaŭ» 1984 hoda i «Palaŭničych na pryvidaŭ II» 1989-ha, jakija źniaŭ baćka Džejsana Rajtmana, Ajvan Rajtman. Pieršuju i druhuju častki mnohija hladzieli ŭ dziacinstvie i nazaŭždy zapomnili biełych jak ziefirki pryvidaŭ, pieśniu Ghostbusters Reja Parkiera i ŭsiu advažnuju kamandu samich palaŭničych.
Samym kaštoŭnym u starych filmach pra palaŭničych ličycca miłaje spałučeńnie kamiedyjnaści i choraru, a taksama niezvyčajnyja dosyć darahija śpiecefiekty. Humar i chorar lohka pieraplatajucca i ŭ novym filmie, ale da taho ž jaho ŭžo chvalać za atmaśfieru ŭtulnaści, jak by paradaksalna heta ni hučała pra film ab pryvidach.
Pakolki aryhinalny film byŭ adnym z samych paśpiachovych u 1984 hodzie, u jaho zastałosia šmat fanataŭ pa ŭsim śviecie — i siońnia hetym fanatam kala saraka hadoŭ. Jany i stali toj aŭdytoryjaj, jakaja ź nieciarplivaściu čakała vychadu treciaj častki historyi pra palaŭničych na pryvidaŭ. Praciah im daviałosia čakać tryccać ź lišnim hadoŭ — i jon usprymajecca ciapier najpierš jak rełaksant, bo prymušaje z asałodaj uzhadać dziacinstva.
19 listapada 2021 hoda film byŭ vypuščany ŭ prakat u ZŠA i śviet užo ablacieli pieršyja vodhuki. Jaho ŭžo možna pahladzieć u biełaruskich kinateatrach.
Pra što film
Samotnaja maci z dvaimi dziećmi-padletkami sielicca na fiermie ŭ Akłachomie. Fiermu jana atrymała ŭ spadčynu ad baćki, i musiła pryjechać tudy, kab razabrać jaho rečy. Heta treba było zrabić daŭno, ale jana ŭsio adkładała. Dzieci, viadoma, nie ŭ zachapleńni — jany musiać pryzvyčaicca da viaskovaha žycia paśla horada, dy jašče ŭ zaniadbanym domie z zaśmiečanym padvorkam. Jany sprabujuć bolš daviedacca pra dzieda i znachodziać pastku dla pryvidaŭ, kaściumy palaŭničych na pryvidaŭ i ich aŭtamabil. Znojdzieny ryštunak akurat musić im spatrebicca, bo susiedni horad pačynaje pieryjadyčna treści, a nieŭzabavie na jaho vulicach źjaŭlajucca samyja sapraŭdnyja pryvidy.
Chto i kaho hraje
Dziaŭčynku Fibi, dačku hałoŭnaj hieraini, hraje talenavitaja maładaja akciorka Makkiena Hrejs. Fibi — nierealna razumny padletak, jaki na roŭnych viadzie razmovy pra navuku z nastaŭnikam misteram Hrubersanam. Hrubersana hraje Poł Rad, toj samy akcior, jaki na dniach byŭ pryznany samym seksualnym mužčynam płaniety.
Charyzma Makieny Hrejs u roli Fibi, chočacca vieryć, spakusić mnohich padletkaŭ z takoj ža asałodaj zanurycca ŭ śviet navuki.
Nu a Poł Rad — adzinaje, za što jaho krytykujuć kinaznaŭcy, dyk heta za toje, što jaho niedastatkova šmat u hetym filmie. Ale kožnaja scena ź im — sucelnaja asałoda.
I tak, naturalna, jaho hieroj, školny nastaŭnik Fibi, pačynaje sustrakacca z mamaj Fibi, Kieli Spenhler (jaje hraje Kery Kun).
Acenki filma
Źviartaje na siabie ŭvahu raźbiežka ŭ acency filma hledačami (95% na Rotten Tomatoes) i krytykami (69% na Rotten Tomatoes).
IMDB — 7,8/10.
Čamu ŭ halivudskim kino ŭsio mienš seksu?
Praz 18 hadoŭ na ekrany viartajecca lehiendarnaja «Matryca». Užo vyjšaŭ trejler
