Adzin z hałoŭnych arhumientaŭ, jakija dakazvajuć «vinu» pratestoŭcaŭ u sudach, — najaŭnaść «niezarehistravanaj simvoliki». Siońnia za jaje, to-bok za bieł-čyrvona-bieły ściah, karajuć navat tych, chto prosta viešaje jaho ŭ siabie na bałkonach. Na toj ža padstavie — simvolika «nie zarehistravanaja» — admaŭlajuć tym, chto sprabuje atrymać dazvoł na taki «adzinočny pikiet» — mienavita tak ułady traktujuć vyviešvańnie ściaha na bałkonie. Možna padać zajaŭku na «bałkonny pikiet» sa ściaham, aficyjna zarehistravanym u Biełarusi i całkam prydatnym dla vyražeńnia pratestu, piša «Jeŭraradyjo».
Partyi i hramadskija abjadnańni
BČB-ściah abvinavačvajuć u tym, što nie stała prablemaj dla žycharoŭ inšych krain
Partyjnaja simvolika taksama pavinna rehistravacca — tamu vympieły, ściahi i znački partyj zaćviardžajucca čynoŭnikami. I ŭ śpisie «ŭchvalenych» jość šmat bieł-čyrvona-biełych ściahoŭ.
Naprykład, u Abjadnanaj hramadzianskaj partyi (AHP) aficyjnaja simvolika — čyrvony koń na biełym fonie. Spałučeńnie koleraŭ jakraz takoje, jak treba.
U partyi «Biełaruski narodny front» (BNF) simvał — čyrvonaja «Pahonia» na biełym fonie. Jašče bližejšy da nacyjanalnaha ściaha aficyjny ściah dźviuch partyj «Hramada» — bieł-čyrvona-biełaje pałatno z emblemami (kvietkaj) bližej da dreŭka.
Kansiervatyŭna-chryścijanskaja partyja — BNF taksama vykarystoŭvaje bieł-čyrvona-biełaje pałatno sa svajoj emblemaj. Adnak źviestak ab aficyjnaj rehistracyi hetaj simvoliki niama.
Jość prydatnyja spałučeńni i na aficyjna zarehistravanych simvałach biełaruskich hramadskich abjadnańniaŭ. Naprykład, ściah Niezaležnaha prafsajuza harniakoŭ, chimikaŭ, naftapierapracoŭščykaŭ, enierhietykaŭ, transpartnikaŭ, budaŭnikoŭ i inšych rabotnikaŭ — bieł-čyrvonaje-pałatno ź litarami «BNP».
Jość BČB i na ściahu Fondu imia Lva Sapiehi, a akramia jaho tam — vyjava mahnata i jaho hierba. Całkam hodny piersanaž dla taho, kab udzielničać u «bałkonnym pikiecie».
Pahonia pobač
Hierb «Pahonia» — zarehistravanaja historyka-kulturnaja kaštoŭnaść, tamu za jaho demanstracyju karać było b vielmi niełahična. Tym bolš siońnia «Pahonia» aktyŭna vykarystoŭvajecca ŭ hieraldycy. Naprykład, na hierbach Viciebskaj vobłaści, Rečycy, Vierchniadźvinska i Lepiela.
Siarod hramadskich abjadnańniaŭ «Pahoniu» vykarystoŭvaje Zhurtavańnie biełarusaŭ śvietu «Baćkaŭščyna». Jość jana i na niekalkich inšych emblemach, adnak jak adna z častak kampazicyi. Nahadajem, havorka idzie tolki pra aficyjna zarehistravanuju simvoliku.
Narešcie, jość hierb Litvy. Ale tut vy ryzykujecie być abvinavačanymi ŭ sadziejničańni zamiežnym «lalkavodam».
A chto rehistruje simvoliku?
Nichto nie ździŭleny: u hetaj krainie treba rehistravać naohuł usio. Nie vyklučeńnie — emblemy, vympieły, ściahi i da taho padobnaje.
Usia simvolika pavinna prachodzić rehistracyju ŭ Departamiencie pa archivach i spravavodstvie Ministerstva justycyi. Potym jana ŭklučajecca ŭ dziaržrejestr, i joj prysvojvajecca asablivy numar. Pry žadańni možacie pašukać prykłady zarehistravanych ściahoŭ i značkoŭ na śpiecyjalnym sajcie.
Kali Departamienta całkam chapaje dla značkoŭ i vympiełaŭ, to sa ściahami ŭsio składaniej. Dla ŭchvaleńnia rehistracyi ściahoŭ u Biełarusi stvorany śpiecyjalny prezidencki saviet. I tolki paśla atrymańnia «tak» ad savieta ściah moža atrymać rehistracyju.
Kiraŭnik kamisii na siońnia — dyrektar Nacyjanalnaha centra pravavoj infarmacyi (NCPI) Andrej Macielski. Jaho namieśnik — namieśnik načalnika Hienieralnaha štaba Uzbrojenych Sił doktar vajennych navuk Mikałaj Buzin. Taksama ŭ saviet uvachodziać supracoŭniki ŭniviersitetaŭ, muziejnyja śpiecyjalisty i čamuści niekalki inšych vajennych. Mienavita ad ich zaležyć aficyjny status bieł-čyrvona-biełaha ściaha ŭ Biełarusi.
