Uviečary 29 listapada skončyŭsia termin, na praciahu jakoha žurnalistu Tut.by Kaciarynie Barysievič pavinny byli vystavić abvinavačvańnie i vybrać mieru strymańnia. Pakolki na svabodu jaje nie adpuścili, možna zrabić vysnovu, što Kaciaryna znachodzicca ŭ statusie abvinavačanaj i zastajecca pad vartaj. Śledstva ŭziało z advakataŭ padpisku ab nierazhałošvańni ŭ samym šyrokim značeńni, tamu na jaki termin abrana samaja strohaja miera strymańnia, nieviadoma. Zychodziačy z praktyki, možna mierkavać, što na dva miesiacy, heta značyć da 19 studzienia 2021 hoda, piša Tut.by.
Hienprakuratura raspačała kryminalnuju spravu pa fakcie vydavańnia miedycynskaj tajny, što paciahnuła ciažkija nastupstvy (č. 3 art. 178 KK). Havorka idzie pra stan zahinułaha Ramana Bandarenki, Kaciaryna była aŭtaram artykuła, dzie pakazvałasia, što ŭ jaho kryvi nie było ałkaholu. Svajaki Ramana pretenzij da ŚMI i miedpiersanału nie vykazvali, maci dała zhodu na raspaŭsiud infarmacyi ab stanie syna.
27 listapada ŭ Hienieralnuju prakuraturu byli nakiravany charaktarystyki i zvaroty ad viadučych niezaležnych ŚMI z prośbaj abrać Kaciarynie Barysievič mieru strymańnia, nie źviazanuju z uziaćciem pad vartu. Taksama pieradadzieny kopii dypłomaŭ i hramat, jakija Kaciaryna atrymlivała ad Hienieralnaj prakuratury, Śledčaha kamiteta, MNS i inšych viedamstvaŭ za aśviatleńnie dziejnaści pravaachoŭnych orhanaŭ u Biełarusi i pravavuju aśvietu hramadzian.
Fihurantam kryminalnaj spravy źjaŭlajecca taksama lekar-aniestezijołah Arciom Sarokin. Na telekanale STB byŭ pakazany siužet, u jakim jon pryznaje vinu, pa ŭsich punktach abvieščanych Hienprakuraturaj u paviedamleńni ab zaviadzieńni kryminalnaj spravy, i zaklikaje kaleh viarnucca da pracy. Paśla zatrymańnia Arcioma i Kaciaryny pa ŭsioj krainie prachodziać akcyi salidarnaści «Nul pramile», u tym liku, i siarod miedycynskich rabotnikaŭ.
Kaciaryna znachodzicca ŭ SIZA №1 na vulicy Vaładarskaha ŭ Minsku, dzie bytavyja ŭmovy horšyja, čym u SIZA KDB, dzie amal tydzień prabyła žurnalistka. Ad źniavolenych, jakija prajšli Vaładarku, partału viadoma, što tam prablemy ź pieranasielenaściu, u kamierach syra, adzieńnie sochnie niekalki sutak, jašče adno vyprabavańnie — kurcy, jakich u kamierach, jak praviła, bolšaść, i palać jany tut ža, pach u kamierach adpaviedny. U TUT.BY pakul što niama źviestak pra toje, što Kaciarynie pieradajuć listy ŭ SIZA №1 (u SIZA KDB jana atrymała ŭsiaho adzin list), choć dakładna viadoma, što dziasiatki ludziej užo adpravili joj listy i paštoŭki.
Pišycie listy Kaciarynie, joj vielmi patrebna vaša padtrymka. Listy treba adpraŭlać pa adrasie: SIZA-1, 220030, h. Minsk, vuł. Vaładarskaha, 2 (Barysievič Kaciarynie Anatoljeŭnie).
