25 lutaha ŭ karejskim Pchiončchanie skončyłasia XXIII Zimovyja Alimpijskija hulni. Biełaruś u ahulnym zaliku z tryma miedalami raźmiaściłasia na piatnaccatym radku ŭ nieaficyjnym zaliku.
A čym zapomniłasia hetaja Alimpijada? «Naša Niva» padvodzić vyniki spabornictvaŭ.
Pieramoha Alimpijady
Kaniečnie ž, bijatłonnaja žanočaja estafieta. Našy dziaŭčaty ŭ hetym siezonie nie traplali navat u piaciorku najmacniejšych na etapach Kubka śvietu. Kudy bolš zbałansavanymi ličylisia kamandy Narviehii, Hiermanii, Francyi, Ukrainy, Šviecyi. Adnak usia čaćviorka vystupiła vyšej za ŭsialakija pachvały. Kolki było pieražyvańniaŭ nakont niadaŭniaj junijorki Dynary Alimbiekavaj, ale jana prosta bliskuča prajšła svoj etap. Darji Domračavaj zastavałasia prosta nie padvieści svaich siabrovak pa kamandzie. Serca zamierła na imhnieńnie, kali Daša dapuściła try promachi na stojcy, ale dadatkovymi patronami ŭsio ž zakryła ŭsie mišeni. U vyniku — pieršaje miesca. Pośpiech kaštoŭny tym, što heta nie tryumf adnoj spartsmienki, a ŭsioj biełaruskaj škoły. Takuju honku možna pierahladać i pierahladać.
Hladzi jašče: Skardzina, Kryŭko, Alimbiekava, Domračava: chto takija alimpijskija čempijonki
Skačok Alimpijady
Miedaloŭ ad frystajlistaŭ, biezumoŭna, čakali. Ad 1998 hoda našy majstry skačkoŭ na łyžach uvieś čas pryvozili ŭznaharody z Hulniaŭ. Hałoŭnyja spadziavańni ŭ žančyn byli na Ału Cupier, čempijonku Sočy-2014. Huśkova išła na druhim płanie. Adnak mienavita Hanna ŭ finale najbolš daskanała vykanała svoj skačok, pakinuŭšy za saboj supiernic-kitajanak, jakich ciahnuŭ sudździa-suajčyńnik. Heta ŭžo siomy miedal, jaki pryvozić z Alimpijad hienijalny trenier frystajlistaŭ Mikałaj Kazieka. Huśkova — uśmiešlivaja 25-hadovaja dziaŭčyna, jakaja pryznajecca, što baicca vyšyni.
Hladzi jašče: Piać faktaŭ pra Hannu Huśkovu
Nieadnaznačnaść Alimpijady
Budziem ščyrymi, ad Darji Domračavaj paśla Sočy čakali našmat bolšaha, čym adzin miedal. Darja nie spraŭlałasia ź niervami na strelbiščach padčas spryntu, pahoni i indyviduałki. Dy i nie skazać, što łyžy vielmi chutka lacieli. Tolki ŭ masstarcie biełaruska apraŭdała čakańni, finišavaŭšy paśla słavački Kuźminoj. Estafieta pryniesła Darji čaćviorty załaty miedal za ŭsie časy, takim čynam naša spartsmienka stała samaj tytułavanaj za ŭsie časy. Bolš «zołata» Alimpijad u bijatłonie za Darju nie maje nichto. Ciapier Domračava zadumałasia pra zakančeńnie karjery. Kaža, što ŭ Piekin-2022 nie pajedzie. Chacia chto jaho viedaje, što budzie praz čatyry hady.
Niespraviadlivaść Alimpijady
Frystajlist Anton Kušnir vykonvaŭ adny z samych składanych skačkoŭ na hetaj Alimpijadzie, ale dla taho, kab trapić u finał, jamu nie chapała zusim drabnički. U pieršym skačku jon zaniaŭ siomaje miesca, kali ŭ finał prachodzili šaściora. U druhim — taksama siomaje pry tych samych šaści. U vyniku alimpijski čempijon Sočy raźmiaściŭsia na 13-m radku z 12-i, što prachodzili. Admietna, što «tapiŭ» biełarusa šviejcarski sudździa, jaki staviŭ našamu spartsmienu maksimalna nizkija adznaki, kab u finał prajšli jahonyja suajčyńniki. Heta možna nazvać hałoŭnaj niespraviadlivaściu Hulniaŭ. Alaksandr Łukašenka navat nakiravaŭ pratest u Mižnarodnuju fiederacyju frystajłu, ale što ŭžo tołku.
Sychod Alimpijady
Hrošy na Alimpijadu dla 44-hadovaha łyžnika Siarhieja Dalidoviča źbirali ŭsim śvietam — praz kraŭndfandynhavuju kampaniju. Ale ŭ Pchiončchanie ŭ biełarusa ŭsio pasypałasia. Byŭ mocny maroz, a ŭ Siarhieja prablemy z bronchami. Užo ŭ pieršaj honcy na 15 km jon vymušany byŭ syści z dystancyi. A paśla tak i nie vyjšaŭ na trasu praz prablemy sa zdaroŭjem. Heta ŭžo dakładna apošniaja Alimpijada dla aršanskaha łyžnika. Na svajoj staroncy ŭ fejsbuku Dalidovič paabiacaŭ viarnuć hrošy tym, chto rasčaravaŭsia jahonym vystupam u Paŭdniovaj Karei.
Siensacyja Alimpijady
Skažy try hady tamu, što ŭ finale Alimpijady pa chakiei buduć hulać zbornyja OAR i Hiermanii, to, napeŭna, dzieviać ź dziesiaci zaŭziataraŭ by pakrucili palcam la skroni. Ale tak stałasia, što spačatku dyskvalifikavali zbornuju Rasii, jakaja zmahła vystupać tolki pad šyldaj OAR (Alimpijskija atlety Rasii). A na samoj Alimpijadzie siensacyju stvaryli niemcy, jakija dajšli da finała. «Na ich miescy pavinny być my», — praniesłasia dumka, mabyć, u mnohich biełaruskich zaŭziataraŭ. Kali niemcy pieramahli ŭ čverćfinale šviedaŭ, to zdavałasia, što jany i tak skoknuli vyšej za hałavu. Adnak u paŭfinale zrynutymi akazalisia kanadcy. Niamieckaja chakiejnaja kazka mahła być jašče bolš jarkaj, ale ruskija ŭ oviertajmie ŭsio ž vyrašyli ŭsio na svaju karyść.
Tors Alimpijady
Kamu nie zapomnicca hety nakačany spartsmien z Karaleŭstva Tonha Pita Taŭfatofua, jaki na adkryćci Alimpijady vyjšaŭ raździety pa tors, papiarednie zmazaŭšy cieła alejem. I heta na dziesiacihradusnym marozie. Takoje nie zabyvajecca. A voś sam vystup Pita ŭ łyžnych honkach takim furoram nie skončyŭsia. Łyžnik u vynikovym pratakole raźmiaściŭsia na 114-m miescy z 119. Na letniuju Alimpijadu-2020 Taŭfatofua płanuje pajechać u jakaści płyŭca.
Sačyli za Alimpijadaj razam z bukmiekierskaj kantoraj Marafon
