Danatas Banijonis u filmie «Miortvy siezon».
Takija dadzienyja apublikavaŭ Centr pa daśledavańni hienacydu i supracivu žycharoŭ Litvy.
Na sajcie kgbveikla.lt paviedamlajecca, što Danatas Banijonis pracavaŭ pad imiem «Bronius» [Bronik]. Jon byŭ zavierbavany ŭ 1970 hodzie. KHB raźličvaŭ ź jaho dapamohaj sabrać źviestki pra litoŭcaŭ ZŠA. Viarboŭka była, imavierna, umovaj dazvołu na jaho pajezdku ŭ Złučanyja Štaty pa zaprašeńni dyjasparnaj arhanizacyi Santaros Šviesa ŭ 1970 hodzie.
«Da pajezdki ahienta prainstruktavali pra dziejnaść litoŭcaŭ Złučanych Štataŭ Amieryki, jamu taksama pradastavili kaštoŭnuju infarmacyju i raskazali pra ŭskładzienyja na jaho zadačy, jakija jon vykanaŭ. Ahient uvajšoŭ u kantakt ź niekatorymi litoŭskimi emihrantami, jakija cikavili KHB. Jon padaŭ ich charaktarystyku. Heta mahło b palehčyć apieratyŭnuju pracu [sačeńnie] padčas naviedvańnia hetymi ludźmi Litvy», — havorycca na sajcie.
U 1974 hodzie Banijonis pierastaŭ być ahientam — musić, tamu, što ŭ tym hodzie jon byŭ abrany deputatam Viarchoŭnaha Savieta ŁSSR», — adznačajuć archivisty.
Banijonis byŭ adnym z samych viadomych litoŭskich akcioraŭ. Jon aktyŭna zdymaŭsia ŭ Rasii navat paśla razvału SSSR.
Jak vyśvietliłasia, supracoŭničaŭ z KHB i vybitny litoŭski dyryžor Saŭlus Sandeckis. Jaho zavierbavali ŭ 1962 hodzie. Jon pracavaŭ pad imiem «Salutas» i ŭ ahienturnaj sietcy fihuravaŭ da 1982 hoda. KHB chacieŭ z dapamohaj Sandeckisa-syna viarnuć z emihracyi Sandeckisa-baćku. U 1967 hodzie KHB atrymaŭ infarmacyju pra toje, što Jackus Sandeckis chacieŭ źviazacca sa svaim synam, i vyrašyŭ skarystacca hetym. Metaj savieckaj śpiecsłužby było, kab syn paŭpłyvaŭ na baćku, kab toj admoviŭsia ad antysavieckaj dziejnaści i pryjechaŭ u Litvu. U 1968 hodu sustreču baćki i syna arhanizavali ŭ Kanadzie, kudy Saŭlus Sandeckis adpraviŭsia z kancertami.
Danatas Banijonis pamior ŭ 2014 hodzie ŭ 90 hadoŭ. Sandeckis pamior u 2016 hodzie ŭ 88 hadoŭ.
Litva, jak i inšyja krainy Bałtyi, razhladaje pieryjad 1940—1990 hadoŭ jak pieryjad savieckaj akupacyi, a KHB — jak strukturu akupacyjnaj administracyi.
***
Paźniej, u mai 2018 hoda, źjaviłasia nastupnaja infarmacyja.
Kamisija pa lustracyi ŭ Litvie: Sandeckis i Banijonis nie byli supracoŭnikami KDB
