Kantralorku ciahali za vałasy ŭ aŭtobusie za bieźbiletnaha školnika ci Vy zhodnyja, što heta dzikaść? 225

U siamji z małym dziciem i dziciem-školnikam było tolki 2 kvitki. Tamu kantralor pasprabavała aštrafavać maci, ale joj pieraškodziŭ inšy pasažyr.

Jak patłumačyŭ namieśnik dyrektara pa pasažyrskich pieravozkach aŭtaparku № 6 Navapołacka Alaksandr Bukatnieŭ, kanflikt pačaŭsia z taho, što kantralorka pravieryła tałončyki ŭ siamji z čatyroch čałaviek. Heta bačna na videa: žančyna ź dziciom i mužčyna ź dziciom na rukach. U hetaj siamji akazałasia 2 prakampastavanyja tałony, i jašče adzin prakampastavany ŭ inšym aŭtobusie.

Adnamu dziciaci vidavočna mienš za 7 hadoŭ, tamu za jaho płacić nie treba. A voś druhoje dzicia starejšaje za 7 hadoŭ.

U Navapołacku školniki majuć prava na biaspłatny prajezd sa škoły i ŭ škołu, a padziei adbyvalisia, a 22-j hadzinie viečara, tamu, na dumku kantralora, siamja musiła prabić nie dva, a try tałony.

I za heta kantralorka sprabavała aštrafavać. Z taho i pačaŭsia kanflikt.

Siamja sprabavała padać spravu tak, niby ŭ darosłych tałony jość, a školniku nie treba. Kantralorka Ludmiła Šachlina nastojvała: treba, i patrabavała apłaty. Jana pahražała siamji nie tolki štrafam, ale i sutkami za prajezd biez apłaty.

Darosłyja pamknulisia da vychadu, a školnika kantralorka zacisnuła i nie papuskała. Heta raźjatryła pasažyraŭ-spadarožnikaŭ. Adzin ź ich schapiŭ kantralorku za vałasy i trymaŭ, pakul siamja nie vyskačyła. Inšyja pasažyry trymali dźviery, kab parušalniki mahli vyskačyć.

Kantralorka vyklikała milicyju, ale siamja źbiehła i ich milicyja nie złaviła. Tady Šachlina napisała na ich zajavu ŭ milicyju. Ciapier ich šukajuć na padstavie rolika. A najbolšaje pakarańnie čakaje «spahadlivaha» spadarožnika.

Kantralorka Šachlina słavicca ŭ Navapołacku svajoj nastojlivaściu j bieskampramisnaściu.

Kali b situacyja adbyvałasia ŭ minskim aŭtobusie, to prablemy nie było b. Bo ŭ Minsku školniki majuć prava na biaspłatny prajezd zaŭsiody, a pa Biełarusi — tolki sa škoły i ŭ škołu.

Prajezd u Navapołacku kaštuje 1500 rubloŭ. Darečy, prajezd u haradskim transparcie ŭ Biełarusi amal całkam subsidujecca ź miascovych biudžetaŭ. Jon najtańniejšy ŭ Jeŭropie.

Šachlina pracuje ŭ aŭtaparku ŭžo 15 hadoŭ, 6 ź ich — kantraloram. «Na videa jašče nie ŭsio jość, — ledź nie płača Ludmiła Šachlina. — Spačatku na mianie napaŭ mužčyna, jaki siadzieŭ napieradzie, taki ciemnavałosy, z raźbitaj huboj. Mianie jašče i nahami bili, na videa hetaha niama».

* * *

Chłopca, jaki ciahaŭ za vałasy kanduktara ŭ Navapołacku, zatrymali. Jamu pahražaje da piaci hadoŭ. Na jaho raspačali kryminalnuju spravu pa artykule pra hvałt suprać čałavieka, jaki vykonvaje słužbovyja abaviazki, paviedamili ŭ navapołackaj milicyi.

Vital Ruhajn, Jeŭraradyjo; Siarhiej Hiezhała

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH