Vypadkovaha turysta, jaki ŭ budni dzień zbočyć z trasy Minsk–Viciebsk za piatnaccać kiłamietraŭ ad stalicy, ździvić kolkaść aŭtamabilaŭ DAI na ŭjeździe ŭ Astrašycki Haradok. Na placoŭcy niepadalok ad miemaryjalnaha tanka znachodzicca impravizavany «punkt propusku». Pravaachoŭniki praviarajuć dakumienty ŭ kiroŭcaŭ aŭto ź niemiascovymi numarami i na ŭsialaki vypadak pytajucca, jak ich zaniesła ŭ Astrašycki Haradok.
Škoła - hałoŭny pryciahalny abjekt Astrašyckaha Haradka
Unutrany dvoryk
Kala škoły - vialiki sportkompleks
Jašče i basiejn
Nizieńki vykankam i vysokaja škoła
Miascovaje STA
Vytvorčaść na ŭjeździe ŭ Astašycki Haradok
Meblevaja fabryka
Centr reabilitacyi dla dziaciej z usioj krainy
Pryroda tut pryhožaja
Adna z šmatlikich kramaŭ miastečka
Praz darohu - jašče adna
Aŭtadrom taksama blizka ad škoły
Stary šmatpaviarchovik...
...i novapabudavany
Simpatyčnaje hrafici
U budni dzień niepadaloku ad tanka možna znajści niekalki patruloŭ DAI
Za kalučym drotam
Pryčyna pavyšanaj biaśpieki — miesca vučoby treciaha syna kiraŭnika dziaržavy. Kola Łukašenka letaś pajšoŭ u pieršy kłas miascovaj škoły.
Heta aznačaje štodzionnaje ranišniaje i viačerniaje pierakryvańnie trasy, kali pa joj pralataje kartež ź mihałkami, jaki viazie Kolu na zaniatki z Drazdoŭ.Kali jaho nie pieraviaduć u inšuju navučalnuju ŭstanovu, žycharam Astrašyckaha Haradka daviadziecca žyć pa «Kolevym hrafiku» jašče dziesiać hadoŭ.
Darečy, rezidencyja jość i ŭ samim Astrašyckim Haradku.U savieckija časy jana była dobra abaronienym leciščam maršała Cimašenki, zdolnym vytrymać jadzierny ŭdar. U 1990-ja budynak pryhlanuŭsia Kiraŭnictvu spravami prezidenta. Paśla rekanstrukcyi «Aziorny» abzavioŭsia trochmietrovym płotam z kalučym drotam i kamierami videanazirańnia. Ciapier u rezidencyju časam puskajuć dziaciej ź miascovaj škoły dla zaniatkaŭ sportam.
Chakiejnaja škoła
Astrašycka-haradockaja ahulnaadukacyjnaja škoła — hałoŭnaje, čym hanaracca žychary.Basiejn, humavanaje futbolnaje pole z trybunami, zaniatki konnym sportam… U joj jość śpiecyjalizavanyja chakiejnyja kłasy, dzie vučacca dziciačyja zbornyja Biełarusi 1995—1998 hadoŭ nara¬džeńnia. Spartyŭny ŭchił škoły navidavoku, choć mocnymi bakami pakazalnaj škoły ličacca jašče matematyka i zamiežnyja movy.
Škoła adpaviadaje statusu svajho samaha viadomaha vučnia, tamu baćki nie nadta chvalujucca pra arhanizacyju navučalnaha pracesu — usio zroblena na najvyšejšym uzroŭni.
Adnak raskazvać pra heta žychary Astrašyckaha Haradka nie lubiać — ci to paśla nastojlivych paradaŭ na baćkoŭskich schodach, ci to ź imknieńnia da ŭnutranaj biaśpieki. Na lubyja pytańni ŭ adkaz čujecca ŭstanoŭka: dzieci vučacca, usio dobra, niama pra što razmaŭlać.
Zrešty, i znajści ŭ centry nasielenaha punkta miascovych žycharoŭ nadzvyčaj składana. Kaho ni sustrenieš — usie minskija. Adna maładaja siamja zajechała praviedać baćkoŭ, inšaja kampanija maładzionaŭ rušyła ŭ hości da siabra…
Servis «pa-haradskomu»
Trochpaviarchovaja škoła znachodzicca ŭ samym centry ahraharadka, pobač z adnapaviarchovym sielsavietam i punktam achovy pravaparadku. Uzdoŭž susiedniaj vulicy niekalki kramaŭ. U toj, što naležyć rajspažyŭkaapieracyi, pavietra hetkaje samaje, jak u luboj viaskovaj kramie. U pryvatnaj «Ehidzie» atmaśfiera inšaja dy i asartymient bolš raznastajny. Darečy, jość u miastečku i firmiennaja krama Minskaj ptuškafabryki.
Bank, apteka, adździaleńnie suviazi, Dom bytu i dźvie kramy pramtavaraŭ — usie hetyja charostvy haradskoha žyćcia ŭłaścivyja i Astrašyckamu Haradku.
Bolšaść terytoryi miastečka zajmajuć viaskovyja chaty, adnak jość i niekalki piacipaviarchovikaŭ.
Što da achovy zdaroŭja, to da rekanstrukcyi škoły hałoŭnym sacyjalnym abjektam miastečka była Respublikanskaja dziciačaja balnica miedycynskaj reabilitacyi. Dziaciej z usioj krainy adpraŭlać siudy adnaŭlać zdaroŭje. Jość i jakaja-nijakaja ambułatoryja. Dla surjoznych abśledavańniaŭ treba jechać za niekalki kiłamietraŭ u Baraŭlany.
Prava na pracu
Siaredni košt žylla ŭ viaskovych nasielenych punktach vyličyć składana. Źvierniemsia da kankretnych abjavaŭ. Naprykład, niedabudavany dvuchpaviarchovy katedž na 200 kv.m. pradajecca za $100 tysiač, a chata z vodapravodam na vulicy i tryma adrynami kala sažałki za $26 tysiač.
A voś ceny na kvatery zusim minskija. Dvuchpakajoŭka kaštuje ažno $95 tysiač — amal $1500 za kvadratny mietr.
Zrešty, pa słovach miascovych žycharoŭ, nieruchomaść u Astrašyckim Haradku choć i kuplajuć, ale žyć stała siudy nie jeduć. Letniaje lecišča — i nie bolš za toje.
Što da pracoŭnych miescaŭ, to z hetym hłabalnych prablemaŭ niama. Kali pahladzieć na spadarožnikavuju mapu Astrašyckaha Haradka, na ŭjeździe ŭ miastečka vyrazna bačnaja siniaja plama. Heta mietałaapracoŭčaje pradpryjemstva «AMT Inžynirynh». Jość i meblevaja fabryka «Uschod», i ŭžo nazvanaje STA… Nu i pad bokam jość Minsk ź jaho raznastajnaściu. Bolšaść žycharoŭ ahraharadka ŭsio ž pracuje ŭ stalicy.