U Vietkaŭskim rajonie projdzie śviata biełaruskaha ručnika 1

U vioscy Niahlubka Vietkaŭskaha rajona 6 kastryčnika adbudziecca abłasnoje śviata biełaruskaha ručnika. U mierapryjemstvie voźmuć udzieł majstry z kožnaha rajona Homielskaj vobłaści, jakija pradstaviać svoj arnamient ručnika i padzielacca z usimi achvotnymi asablivaściami vyrabu ručnikoŭ svajoj miascovaści.

Jak paviedamili BiełaPAN u pres-słužbie Homielskaha abłvykankama, haściej i žycharoŭ Niahlubki čakajuć vystavy ručnikoŭ, vystupleńni lepšych tvorčych kalektyvaŭ Homielščyny, majstar-kłasy, rabota padvorkaŭ.

Niahlubka — unikalnaja vioska, jakaja słavicca svaimi tradycyjami tkactva.

Ručniki miascovych tradycyj napoŭnieny simvolikaj i arnamientalnymi znakami, starejšym ź jakich bolš čym tysiača hadoŭ. Vykananyja miascovymi majstrami na draŭlanych krosnach, jany padarožničajuć pa ŭsim śviecie, źjaŭlajučysia ŭdzielnikami mižnarodnych vystaŭ u Ńju-Jorku, Manreali, Tokia, Paryžy, Brusieli. Amierykanski muziej «Mietrapoliten» nabyŭ ich dla svajoj kalekcyi. Mnohimi muziejami śvietu niahlubskamu ručniku prysudžany załatyja miedali, jon upryhožvaje adnu z załaŭ AAN.

Niahlubskija ručniki pa hety dzień zachoŭvajuć ahulnyja rysy padniaproŭskich ručnikoŭ i razam z tym pradstaŭlajuć admietny łakalny typ, jaki na praciahu XX stahodździa niaspynna raźvivaŭsia ŭ svaich mastacka-technałahičnych tradycyjach u Niahlubcy, adznačajecca ŭ paviedamleńni.

BiełaPAN

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH