«U rehijonie Uschodniaha partniorstva niama miesca viaźniam sumleńnia abo palityčnym źniavolenym», — zajaviŭ kamisar Jeŭrasajuza pa pytańniach pašyreńnia i palitycy dobrasusiedstva Štefan Fiule, vystupajučy na pasiadžeńni Parłamienckaj asamblei prahramy ES «Uschodniaje partniorstva» (Jeŭraniest), jakoje prachodzić u Baku 2–4 krasavika.
«Nie varta paddavacca spakusie i pieratvarać dyskusiju ab hetaj važnaj prablemie ŭ abmierkavańnie taho, chto źjaŭlajecca palityčnym viaźniem, a chto — nie. Historyja dała nam u hetaj suviazi šmat urokaŭ», — Cytuje jeŭrakamisara aficyjny sajt ES.
Štefan Fiule vykazaŭ škadavańnie z nahody taho, što biełaruskija parłamientaryi nie ŭdzielničajuć u pracy asamblei. «Dumaju, adnojčy jany dałučacca da vašaj asamblei», — dadaŭ jon.
Jeŭrakamisar zapeŭniŭ udzielnikaŭ sustrečy ŭ tym, što ES umacoŭvaje suviazi z hramadzianskaj supolnaściu Biełarusi. «I my znoŭ zajavili ab svajoj prychilnaści palitycy krytyčnaha ŭzajemadziejańnia z uładami», — skazaŭ jeŭrakamisar.
Pa słovach Fiule, u pierśpiektyvie jon bačyć Biełaruś demakratyčnaj i kvitniejučaj krainaj biez palitviaźniaŭ, jakaja «intehravanaja ŭ ahulnaje prastoru jeŭrapiejskich kaštoŭnaściaŭ».
U sustrečy ŭ Baku ŭdzielničali pradstaŭniki biełaruskaj apazicyi, u tym liku lidar Partyi BNF Alaksiej Janukievič, lidar ruchu «Za Svabodu» Alaksandr Milinkievič, siabry arhkamiteta pa stvareńni partyi «Biełaruskaja chryścijanskaja demakratyja» (BCHD) i pradstaŭniki hramadzianskaj kampanii «Havary praŭdu!».
