Sacyjalna-dabračynnaja akcyja «Pasialicie ŭ domie radaść!» u padtrymku dziaciej-sirot i Mižnarodnaha tydnia ptušak projdzie 6 krasavika (pačatak u 12.00) u staličnym Centralnym dziciačym parku imia Horkaha.
Arhanizatarami akcyi vystupili ekałahičnaja himnazija № 19 Minska, Stańkaŭski dziciačy dom, redakcyja časopisa «Sad mojej miečty» pry padtrymcy Ministerstva pryrodnych resursaŭ i achovy navakolnaha asiarodździa.
Jak paviedamiła BiełaPAN pres-sakratar Minpryrody Alena Pieniaź, padčas akcyi płanujecca pradavać i raźviešvać špakoŭni, zroblenyja vychavancami Stańkaŭskaha dziciačaha doma. Kožny z 100 domikaŭ dla ptušak možna budzie kupić za 30 tys. rubloŭ. Usie srodki buduć pieraličany na rachunak dziciačaha doma. U miežach akcyi taksama zapłanavany raskaz pra Mižnarodny tydzień ptušak, jaki adznačajecca ŭ mnohich krainach z 1 pa 10 krasavika. Akramia taho, adbudziecca ŭznaharodžvańnie haściej stalicy z «ptušynymi proźviščami».
Usiaho ŭ mierapryjemstvie voźmuć udzieł kala 100 čałaviek, u tym liku ministr pryrodnych resursaŭ i achovy navakolnaha asiarodździa Uładzimir Całko, miedyjaapiersony, kursanty Minskaha suvoraŭskaha vučylišča.
Jak adznačyła Pieniaź, Dzień ptušak (1 krasavika) źjaŭlajecca samym «starym» śviatam ekałahičnaha kalendara. U SSSR jon adznačaŭsia z 1927 hoda. Usiaho ŭ Biełarusi zarehistravana 320 vidaŭ ptušak. Za apošnija dziesiacihodździ kolkaść papulacyj niekatorych ź ich značna vyrasła. Pavodle acenak arnitołahaŭ, kolkaść lebiedzia-šypuna ŭ krainie dasiahnuła tysiačy par. U toj ža čas z terytoryi Biełarusi źnikła papulacyja redkaj stepavaj ptuški drachvy, pierastali hniezdavacca sokały-sapsany — najbolš chutkija palaŭničyja siarod ptušak. Bolš za 70 vidaŭ ptušak zaniesiena ŭ Čyrvonuju knihu Biełarusi ŭ jak redkija abo jakija vymirajuć. U ich liku bierkut, arłan-biełachvost, hłušec, viartlavaja čaracianka, šery žuraviel.
Anastasija Janušeŭskaja, BiełaPAN
Chočaš padzialicca važnaj infarmacyjaj ananimna i kanfidencyjna?
Pišycie redaktaru «Našaj Nivy» ŭ TH
