Ja nie mahu nazvać siabie teatraznaŭcam i amataram sučasnaha mastactva i nie viedaju, ci moh by acanić mastackuju kaštoŭnaść śpiektaklaŭ biełaruskaha «Svabodnaha teatra», usio bolš viadomaha ŭ śviecie. Nie budu chavać i taho, što ŭvohule nikoli nie byŭ na vystupie hetaj trupy (jak, napeŭna, i bolšaść čytačoŭ), choć heta ŭrešcie płanuju abaviazkova vypravić.
Tym nie mieniej, navat paviarchoŭnaje znajomstva z tvorčaściu hetaj teatralnaj trupy dazvalaje aceńvać jaje vielizarny pazityŭny palityčny efiekt. «Svabodny teatr», biezumoŭna, dasiahnuŭ pośpiechu jak palittechnałahičny prajekt, što, zdajecca, amal z samaha pačatku jaho publičnaha isnavańnia było klučavym składnikam dziejnaści teatra.
Naŭrad ci chtości ciapier maje bolšy i macniejšy emacyjny efiekt što da pryciahnieńnia ŭvahi mižnarodnaj hramadskaści da prablemy svabody ŭ Biełarusi bolš, čym paŭpadpolnaja teatralnaja trupa ź Miensku.
Toje, jak hetyja ludzi zdoleli skaryć sercy łondanskaj teatralnaj tusoŭki i jak ŭpeŭniena jany prasoŭvajucca ŭ tusoŭcy amierykanskaj, zasłuhoŭvaje vialikaj pavahi i vialikaha zachapleńnia. Nabyvajučy papularnaść u zachodniaj kulturnickaj elicie, teatr prasoŭvaje publičnyja intaresy Biełarusi i biełaruskaj demakratyi.
Nie budzie pierabolšańniem nazvać «Svabodny teatr» klučavym i najbolš paśpiachovym PR-prajektam biełaruskaj apazicyi ŭ šyrokim sensie.
U Brytanii mienavita «Svabodny teatr» zrabiŭsia hałoŭnym mižnarodna viadomym brendam biełaruskaha demakratyčnaha supracivu. Mikałaj Chalezin i Natalla Kalada – ambasadary biełaruskaj demakratyčnaj hramadskaści, badaj kudy važniejšyja za apazicyjnych palitykaŭ.
Demakratyčny ruch u Biełarusi nie maje svajho žyvoha praroka, čałavieka-simvała kštałtu Aŭnh San Su Čžy, Andreja Sacharava ci Dałaj Łamy. Na hetuju rolu mieli mahčymaść pretendavać Zianon Paźniak ci Alaksandr Kazulin, ale adzin nadta daloki ad šyrokich masaŭ rasiejskamoŭnych biełarusaŭ, a druhi byŭ jaŭna złomleny łukašenkaŭskaju turmoju.Navat Rada BNR, ź jaje ŭnikalnym histaryčnym statusam, zdajecca, taksama pakul nie zmahła paŭnavartasna realizavać svaju misiju jak ściaha zmahańnia, jak simvała nieprymańnia biełaruskim hramadstvam siońniašnich butaforskich pradstaŭničych instytutaŭ Respubliki Biełaruś.
Chacia pakul hetyja instytuty praciahvajuć być butaforskimi, jana maje i budzie mieć dla hetaha surjozny patencyjał i budzie pavodle vyznačeńnia takim simvałam dla peŭnaj častki nasielnictva.
Nie majučy hetkaj piersanifikacyi siarod palitykaŭ, svabodnaja Biełaruś atrymała svaim ściaham i svaim simvałam u śviecie «Svabodny teatr». Pryčym śniažok, kinuty «Svabodnym teatram», paśla 19 śniežnia 2010 h. maje pieratvarycca ŭ vialikuju PR-aŭskuju łavinu, vielmi niepryjemnuju dla panoŭnaha aŭtarytarnaha režymu.
Niahledziačy na vidavočnyja i šyroka raskručanyja niaŭdačy biełaruskaj palityčnaj apazicyi, biełaruskaja demakratyčnaja hramadskaść moža naradžać paśpiachovyja inicyjatyvy i prajekty.Majučy «Svabodny teatr», my ŭsie majem u kaho vučycca i z kaho brać prykład.
