Praź biaździejnaść i biezadkaznaść pradstaŭnikoŭ miascovaj ułady ŭ horadzie Oršy Viciebskaj vobłaści pad pahrozaj poŭnaha źniščeńnia apynuŭsia pomnik architektury respublikanskaha značeńnia — budynak klaštara byłoha manastyra bazyljanaŭ pa Muziejnym zavułku, pabudavany ŭ XVIII stahodździ.
Letam 2003 haradskim kamunalnym pradpryjemstvam z klaštara byli całkam źniatyja dachavyja kanstrukcyi, paśla čaho budynak byŭ pieradadzieny Viciebskaj jeparchii Biełaruskaj pravasłaŭnaj carkvy. Z taho času kanstrukcyi pomnik imkliva razburajecca.
Miascovyja ŭłady i Viciebskaja jeparchija BPC zastalisia hłuchimi da šmatlikich zvarotaŭ hramadskaści. Paśla zvarotu žycharoŭ horada ŭ prakuraturu Aršanski harvykankam vydaŭ na adras Viciebskaj jeparchii pradpisańnie, jakoje patrabuje da kanca hetaha hodu adnavić dach. Ale na siaredzinu žniŭnia adnaŭleńnie kanstrukcyj dachu tak i nie było pačataje, i adzin ź niešmatlikich u Oršy pomnikaŭ architektury pry złačynnym sadziejańni ŭłady praciahvaje razburacca.
Hetaja situacyja — jašče adzin prykład niehaspadarlivaha i biezadkaznaha staŭleńnia miascovaj ułady da architekturnaj spadčyny horada. Mietadyčna i metaskiravana na praciahu niekalkich dziesiacihodździaŭ u horadzie adzin za adnym źniščajucca pomniki architektury, u vyniku čaho horadu pryniesienyja niepapraŭnyja straty. U pierśpiektyvie jany mohuć adbicca na jahonaj inviestycyjnaj i turystyčnaj pryvabnaści. Niekalki stanoŭčych prykładaŭ restaŭracyi architekturnych pomnikaŭ, jakija možna bačyć na vulicach horada, tolki padkreślivajuć hetyja straty.
Situacyja z bazyljanskim manastyrom u Oršy patrabuje terminovaj uvahi hramadskaści i nieadkładnych dziejańniaŭ dziela vyratavańnia kaštoŭnaha pomnika dojlidskaha majsterstva našych prodkaŭ.
