Jakija sistemy elektronnych apłat najčaściej vykarystoŭvajucca ŭ Biełarusi?
Choć elektronnyja hrošy i vyhladajuć dla bolšaści ludziej čymści zahadkavym, dziejnaść hetaha finansavaha siektara ŭ Biełarusi ŭpieršyniu trapiła ŭ pravavoje pole davoli daŭno — jašče ŭ 2003 hodzie. Tahačasnaja pastanova Nacbanka №201 «Ab zaćvierdžańni praviłaŭ ažyćciaŭleńnia apieracyj z elektronnymi hrašyma», choć i z pryniatymi ŭdakładnieńniami, zastajecca aktualnaj da hetaha času.
Nasupierak pašyranamu mierkavańniu, zvyčajnyja bankaŭskija kartki nie źjaŭlajucca elektronnymi hrašyma. Hałoŭnaje ŭ elektronnych hrašach toje, što bankaŭskija rachunki patrebnyja tolki pry ŭvodzie i vyvadzie hrošaj ź sistemy. Pry hetym vykarystoŭvajecca rachunak banka, a nie kožnaha asobna ŭziataha karystalnika. A voś u bankaŭskich kartkach kožny karystalnik maje ŭłasny rachunak.
Asnoŭny pryncyp pracy elektronnych hrošaj: karystalnik ukazvaje ŭ internecie svoj asabisty numar, sumu apłaty i — u zaležnaści ad sistemy — kantrolny kod. Sistema pasyłaje na rachunak kramy elektronnyja hrošy z rachunka karystalnika. Atrymalnik źviartajecca ŭ pracesinhavy centr, kab atrymać paćvierdžańnie sapraŭdnaści hrošaj i kvitancyju ab apłacie. Kali hrošy prymajucca, kvitancyja dasyłajecca i pakupniku. Kali kantrolny kod papiarednie nie vykarystoŭvaŭsia, karystalnik musić paćvierdzić apieracyju.
Istotny momant, na jaki šmat chto nie źviartaje ŭvahu, — z dachodaŭ ad elektronnych hrošaj taksama płaciacca padatki. Praŭda, u padatkovym kodeksie jość ahavorka, što padatkam nie abkładajucca padarunki, atrymanyja ad fizičnych asobaŭ, jakija nie pieravyšajuć 17,5 miljona rubloŭ.
Jakuju sistemu abrać?
Asnoŭnyja płaciožnyja sistemy, jakija najčaściej vykarystoŭvajuć žychary Biełarusi, — EasyPay, «Jandeks.Hrošy» i WebMoney.
EasyPay
Pieršaja, ułasna biełaruskaja sistema — EasyPay Jana była stvorana Biełhazprambankam u listapadzie 2004 hoda i dziejničaje na terytoryi Biełarusi i Rasii. Hrošy na rachunak možna pakłaści amal u 3000 punktach pa ŭsioj terytoryi krainy: u paštovych adździaleńniach, bolšaści bankamataŭ, a taksama praz bankaŭskija pieravody. Zabrać svaje hrošy možna jak najaŭnymi, tak i zaličyć ich na realnuju bankaŭskuju kartku. Praŭda, u lubym vypadku kamisija składzie 2%.
Jakija arhanizacyi pracujuć ź sistemaj? Praz EasyPay možna apłacić usie kamunalnyja pasłuhi i pasłuhi suviazi. Aproč taho, z elektronnymi hrašyma pracuje bolšaść internet‑kramaŭ. U dadatak — bukmiekierskija kantory, łatarei, bilety «Biełavija», kaśmietyka… Hałoŭny minus — mižnarodnyja płaciažy sistemaj nie padtrymlivajucca.
Maksimalnaja suma płaciažu składaje miljon rubloŭ.
«Jandeks.Hrošy»
Dosyć raspaŭsiudžanaja na terytoryi Rasii sistema — «Jandeks.Hrošy» Jana pracuje z 2002 hoda. Rasijskija kamunalnyja płaciažy biełarusaŭ nie cikaviać, ale jość šerah inšych karysnych katehoryj. Naprykład, bilety ŭ teatr i na kancerty, apłata licenzij kampjutarnych prahram, braniravańnie hatelaŭ i pakupka biletaŭ na avija‑ i aŭtobusnyja rejsy.
Niazručnaść dla biełarusaŭ u addalenaści ofisaŭ kampanii. Kali biez daj pryčyny rachunak budzie zabłakavany — a pra heta słužba biaśpieki kampanii nie papiaredžvaje, — pryjdziecca adpraŭlacca ŭ Maskvu, kab davać piśmovyja tłumačeńni pa vystaŭlenych pretenzijach. Takoj ličycca, naprykład, vykarystańnie «Jandeks.Hrošaj» dla kamiercyjnaj dziejnaści.
Kab karystacca sistemaj, pryjdziecca pryznać siabie hramadzianinam Rasii. Pa praviłach pasłuha pradastaŭlajecca tolki im.
Kamisija za zdymańnie hrošaj składaje ad 2% da 5%, ale za pieravod hrošaj na biełaruskuju kartku pracent moža być jašče bolšym. Prablemy i z tym, kab kupić «Jandeks‑hrošy». Dla hetaha treba albo šukać pryvatnyja abjavy ŭ internecie, albo kuplać inšyja internet‑hrošy, a paśla kanviertavać ich u «Jandeks».
WebMoney
«Inšyja hrošy» — heta, naprykład, WebMoney. Stvoranaja ŭ 1997 hodzie, sistema maje bolš za 10 miljonaŭ zarehistravanych karystalnikaŭ. Harantam ź biełaruskaha boku vystupaje «Technabank». Jon adkazvaje za pracu WMB‑hrošaj. «B» u kancy słova simvalizuje biełaruski rubiel i faktyčna roŭna jamu. Takija ž padraździaleńni majucca ŭ Rasii, Ukrainie, Uźbiekistanie. Za biełaruskija internet‑rubli možna apłacić toje ž samaje, što za EasyPay — kamunalnyja i suviaź.
A voś WMZ — heta ŭžo anałah dalara. Im možna raspłačvacca pa ŭsim śviecie. Kab lehalna pieraŭtvaryć WMZ‑hrošy ŭ najaŭnyja, treba abaviazkova źviarnucca ŭ «Technabank», pieravieści sumu ŭ WMB, i tolki paśla atrymać ekvivalent u nacyjanalnaj valucie. Niedavieru apieracyi dadaje toj fakt, što, pa čutkach, «Technabank» abaviazany davać spravazdaču ab usich apieracyjach z WebMoney ŭ padatkovyja inśpiekcyi Biełarusi. Tamu šmat chto — u abychod zakona — šukaje pryvatnyja abjavy nakštałt «mianiaju 100WMZ na $99». Kab lehalna kupić WMZ, znoŭ‑taki treba prajści dźvie prystupki, adna ź jakich — pramiežkavaja kanviertacyja ŭ WMB.
Darečy, dla pracy z WebMoney z sajta sistemy treba ŭstalavać na kampjutar śpiecyjalnuju prahramu.
