Ułady Baranavickaha rajona nie pažadali ŭstalavać mietaličnuju infarmacyjnuju šyldu na miescy znakamitaj Pałonkaŭskaj bitvy, 350-hodździe jakoj budzie adznačacca sioleta.
Nahadajem, što naprykancy minułaha hoda baranavickaja intelihiencyja źviarnułasia da rajonnych uładaŭ ź listom, u jakim prasiła dabraŭparadkavać terytoryju vakoł pamiatnaha kamnia kala v. Pałonka, a na samim pomniku paviesić mietaličnuju šyldu z nadpisam: «Tut 28 červienia 1660 hoda abjadnanaje biełaruska-litoŭskaje i polskaje vojska pad kiraŭnictvam hietmanaŭ Paŭła Sapiehi i Stefana Čarnieckaha zdabyła vialikuju pieramohu nad utraja bolšym vojskam maskoŭskaha vajavody Ivana Chavanskaha padčas vajny Rasii i Rečy Paspalitaj abodvuch narodaŭ 1654-1667 hh.»
Pamiatny vałun na miescy lehiendarnaj bitvy byŭ ustalavany i aśviečany pravasłaŭnym i katalickim śviatarami jašče ŭ 1994 hodzie. Draŭlanuju šyldu ź miemaryjalnym tekstam na im siabry Baranavickaj Rady TBM ustaloŭvali ŭžo dvojčy, ale jaje nieŭzabavie źniščali vandały.
Tamu napiaredadni 350-hodździa toj słaŭnaj pieramohi pad Pałonkaj siabry TBM vyrašyli źviarnucca da miascovych uładaŭ z prośbaj adznačyć viekapomnaje miesca mienavita mietaličnaj šyldaju.
Pa słovach staršyni Baranavickaj Rady TBM Viktara Syrycy, heta byŭ by ŭdziačny žest naščadkaŭ, jakija pamiatajuć svaju historyju i jakija pazbavilisia kompleksaŭ «małodšaha brata» ŭ jaje acenkach.
Adnak z adkazu Baranavickaha rajvykankama možna zrabić vysnovu, što padobnaha žestu zroblena nie budzie: «Finansavyja srodki na ŭstalavańnie mietaličnaj plity ź infarmacyjaj pra padziei na hetym miescy nie praduhledžanyja ŭ rajonnym biudžecie na 2010 hod, bo dadzieny pamiatny znak nie źjaŭlajecca pomnikam historyi i kultury».
Pakul miesca Pałonkaŭskaj bitvy, pieramoha ŭ jakoj mieła vyklučnaje značeńnie ŭ vyzvaleńni našaj krainy ŭ hady samaj žudasnaj vajny ŭ biełaruskaj historyi, tak i zastaniecca biezymiennym. Da lepšych časoŭ.
