Fota: av.by
Praktyka ŭzmocnienych pravierak i nadhladaŭ na ŭjeździe ŭ Biełaruś i vyjeździe z krainy zachoŭvajecca. Pamiežniki i ludzi ŭ cyvilnym praviarajuć telefony, asabistyja rečy, pravodziać «hutarki».
Na takija pravierki traplajuć jak ukraincy, tak i biełarusy, jakija byli zaŭvažanyja ŭ pratestnaj aktyŭnaści. Vydańnie BGMedia sabrała raskazy vidavočcaŭ z tematyčnych čataŭ.
Adna z historyj zdaryłasia nočču z 14 na 15 krasavika ŭ aŭtobusie Minsk — Koŭna.
«14.04. Minsk-Koŭna. 23:30 vyjezd ź Minska. 01:50 šłahbaŭm RB. 02:05 — 02:48 pašpartny. Da 04:05 asabisty nadhlad adnaho pasažyra. 04:13 šłahbaŭm RB.
U vypadku z našym pasažyram heta było «da trusoŭ» z paniatymi, a nie prosta z rečami. Pierapisali ŭ pratakoł ahladu ŭsie rečy da apošniaj nitki. Ničoha nie znajšli, heta pratakoł nadhladu, a nie parušeńni. Ale zapaŭniali jaho bolš za hadzinu. Niejak tak».
Sa słoŭ vidavočca, tak staranna praviarali hramadzianina Biełarusi z Ašmianaŭ. Jaho ŭ Litvu ŭ vyniku vypuścili. Jašče adzin padarožnik raskazaŭ pra pravierku na ŭjeździe ŭ Biełaruś ź Litvy. Aŭtobus, jaki jechaŭ z Koŭna ŭ Minsk, zatrymali ŭ biełaruskim punkcie propusku z-za pravierki biełaruskich pasažyraŭ, jakija ŭdzielničali ŭ pratestach u 2020 hodzie, i hramadzian Ukrainy:
«Aŭtobus Koŭna — Minsk. Z Koŭna ŭ 8.30. Zakančvajem biełmiažu. Zatrymka z-za «hutarak». Anałahična pierad nami i paśla nas prachodžańnie miažy zaležyć ad kolkaści źniatych na hutarku. Pašpart Ukrainy i 20-y hod».
Jašče adzin biełarus raskazaŭ, što pasažyra jaho aŭtobusa, jaki jechaŭ z Polščy ŭ Biełaruś, aštrafavali za fota ŭ punkcie propusku. Mužčyna vyrašyŭ zrabić fatahrafiju dla žonki i atrymaŭ «administracyjku» ad biełaruskich pamiežnikaŭ.
Praciahvajucca i dbajnyja pravierki ŭsich ukraincaŭ, jakija pierasiakajuć biełaruskuju miažu. Vidavočcy raskazvajuć, što takija pravierki mohuć zajmać bolš za šeść hadzin — u vypadku, kali hramadzian Ukrainy ŭ aŭtobusie niekalki.
Čytajcie taksama:
Biełarusam rekamiendujuć pierasiakać miažu z Polščaj pa novaj schiemie
500 jeŭra za prajezd biez čarhi. Na polskaj miažy kvitnieje biznes pa abjeździe «kalejki»
Čarha ź lehkavušak na vyjezd ź Litvy ŭ Biełaruś raściahnułasia na try kiłamietry
