Iranskija balistyčnyja rakiety, zapuščanyja pa Izraili, i Azaronak na śmiećcievym baku. Foty: Anadolu / Contributor Getty Images, «Naša Niva». Kałaž: «Naša Niva»
Za načnym napadam Irana na Izrail sačyŭ uvieś śviet, i łukašenkaŭskija prapahandysty nie stali vyklučeńniem.
U ahulnaj svajoj masie ich reakcyi byli poŭnyja zachapleńnia, radaści i padtrymki ŭ adnosinach da Irana. Znajšłosia miesca i złaradnaści ŭ adnosinach da Ukrainy ŭ sukupnaści z abvinavačvańniami ŭ adras ZŠA — standartnym, na dumku prapahandy, «vinavataha» ŭ lubych rehijanalnych i suśvietnych kryzisach.
Byli navat tyja, chto na fonie iranskaha napadu natchniŭsia ŭciahnuć Biełaruś u Treciuju suśvietnuju vajnu.
«Treba rychtavacca i ŭzbrojvacca da zuboŭ»
Pieršym, chto mocna natchniŭsia ŭstupić u novy hłabalny kanflikt, staŭ Ryhor Azaronak.
Prapahandyst aktyŭna aśviatlaŭ načnuju ataku Irana, adnačasova zachapiŭšysia iranskim «narodnym ščaściem i achviarnaściu, jakija mnohija nie zrazumiejuć», a taksama zaklikaŭšy Biełaruś «uzbrojvacca da zuboŭ» dla novaj suśvietnaj vajny, «dzie słabych čakaje hańba i śmierć».
Dumki Azaronka adrazu padchapiŭ i padtrymaŭ małodšy sałaviejčyk prapahandy Alaksiej Dziermant. Jon dadatkova zaklikaŭ umacoŭvać vajenny sajuz z Rasijaj.
Dalej iduć «Žiełtyje ślivy», jakija zhadali Ukrainu i zaadno pryviali novuju rasijskuju mietadyčku, byccam pra jaje zabyvajuć na fonie inšych kryzisaŭ u śviecie.
Hety naratyŭ paŭtaryŭ i łukašenkaŭska-rasijski telehram-kanał «Biełorusskij siłovik», zajaviŭšy, što «ZŠA nie tak turbujucca za Ukrainu, jak za Izrail».
Da chvali złaradnaści dałučyŭsia i prapahandyst Kanstancin Prydybajła, adnak nakiravaŭ jon svaju ahresiju na zorak rasijskaha šou-biźniesu i śpievakoŭ, jakija źjechali z Rasii z-za niazhody z vajnoj suprać Ukrainy.
Nacyjanalny biblijatekar i deputat Vadzim Hihin taksama času darma nie hublaŭ i adrazu znajšoŭ «hałoŭnaha vinavataha» u kanflikcie pamiž Iranam i Izrailem, a mienavita «ZŠA i ich žadańnie zabiaśpiečvać lidarstva na Blizkim Uschodzie».
Razam z hetym Hihin pryznaŭsia, što amal usiu noč sačyŭ za atakaj Irana na Izrail, i bieź ironii paskardziŭsia na «mnostva fejkaŭ z boku błohieraŭ i žurnalistaŭ».
Miarkujučy pa hetych vykazvańniach, Maskvie i łukašystam mocna chaciełasia b, kab na Blizkim Uschodzie razharełasia novaja vajna. Jany miarkujuć, što tady Zachadu nie chopić siłaŭ abaraniać Izrail i Ukrainu adnačasova. I bolš za toje, Maskva i Minsk stryhli b adzinyja svaje kupony — naftavyja. Adnak lohkaść, ź jakoj Izrail adbiŭ samuju mahutnuju ataku dronaŭ u historyi, pakazvaje, što heta takija ž, užyviom tut vyraz, vykarystany Pucinym, «vilhotnyja», choć i kryvažernyja mary, jak zachop Ukrainy za try dni.
«Naša Niva» — krynica jakasnaj infarmacyi i bastyjon biełaruščyny
PADTRYMAĆ «NN»Čytajcie taksama:
«Maski źniatyja». U Izraili adreahavali na kałonku ŭ «Minskaj praŭdzie»
Izrailskija ŚMI źviarnuli ŭvahu na «Žoŭtyja źlivy»
Biełaruskaja prapahanda ŭkinuła ideju, što izrailcianaŭ chočuć pierasialić va Ukrainu
