Udzielniki treciaha forumu «Pojas i šlach», Piekin, 18 kastryčnika 2023 hoda. Napieradzie idzie kiraŭnik Kitaja Si Czińpin, źleva ad jaho — prezident Indaniezii Džoka Vidoda, sprava — prezidenty Uźbiekistana i Kazachstana. Fota: AP Photo / Louise Delmotte
Forum «Pojas i šlach» za mižnarodnaje supracoŭnictva» — heta statusnaja padzieja, bo «Adzin pojas, adzin šlach» — hałoŭnaja mižnarodnaja inicyjatyva Si Czińpina.
Pieršy taki forum adbyŭsia ŭ 2017 hodzie, druhi — u 2019-m. U pieršym udzielničali 29, a ŭ druhim — 37 kiraŭnikoŭ dziaržaŭ. Paśla kavidnaj paŭzy treci forum sabraŭsia ŭ Piekinie 17—18 kastryčnika 2023 hoda.
Inviestujučy ŭ raźvićcio transpartnaj infrastruktury, Kitaj imkniecca stvaryć zručnyja dla siabie łancužki mižnarodnaha handlu i pryviazać da siabie ekanamična jak sumiežnyja, tak i addalenyja krainy.
Mienavita tamu ZŠA, Brytanija, Japonija, Paŭdniovaja Kareja, Kanada, Francyja, Niamieččyna i Aŭstralija ad pačatku hladzieli na inicyjatyvu strymana, kali nie z padazreńniem. Užo na pieršych forumach jany byli reprezientavanyja na ŭzroŭni ministraŭ, daradcaŭ ci deputataŭ parłamientaŭ. Alaksandr Łukašenka, naadvarot, hanaryŭsia svaim udziełam u pieršym i druhim forumach «Pojasa i šlachu».
U 2017 i 2019-m nie ŭsie jeŭrapiejskija krainy ihnaravali padzieju ŭ Piekinie. Tak, na pieršym forumie prysutničali kiraŭniki Polščy, Ispanii, Italii, Hrecyi, Turcyi, Čechii, Vienhryi, Sierbii, Šviejcaryi. Na druhim byli kiraŭniki Italii, Partuhalii, Aŭstryi, Hrecyi, Kipra, Šviejcaryi, Vienhryi, Čechii, Sierbii.
A voś na sioletni forum ź jeŭrapiejcaŭ prybyli tolki vienhr Orban i sierb Vučyč, jakija zajmajuć zhodnickuju pazicyju adnosna Rasii i Kitaja. Adnosiny krain Zachadu z Kitajem za apošnija hady istotna pahoršali, asabliva paśla taho jak Piekin nie admiežavaŭsia ad Maskvy paśla napadu Rasii na Ukrainu, choć i nie staŭ pastaŭlać Rasii ŭzbrajeńni, jakich Maskvie nie chapaje.
I na pieršy, i na druhi forum pryjazdžali prezidenty šmatlikich krain byłoha SSSR. Prysutnyja jany i sioleta: Rasija, Kazachstan, Uźbiekistan, Turkmienistan (apošni — u asobie Bierdymuchamiedava-baćki).
Tamu adsutnaść Łukašenki na sioletnim forumie kidajecca ŭ vočy.
Nie zaprasili ŭ Padniabiesnuju prezidentaŭ nievialikich i niebahatych Kyrhyzstana i Tadžykistana, nie pryjechali i kiraŭniki Hruzii i Azierbajdžana. U toj ža čas kitajskaje ahienctva «Sińchua» paviedamlaje pra ŭdzieł lidaraŭ Łaosa, Manholii, Vjetnama, Kambodžy, Kienii, Niepała, Šry-Łanki, Jehipta, Tajłanda, Indaniezii i bahataj na syravinu Papua — Novaj Hviniei. Navat pradstaŭnik «Talibana» jość. U toj ža čas nie pryjechała ŭ Piekin kiraŭnictva Mjanmy — raniej u forumach udzielničała Aŭnh San Su Čžy, adchilenaja ad ułady ŭ vyniku dziaržaŭnaha pieravarotu.
Alaksandr Łukašenka hanarycca svaimi asablivymi adnosinami z Kitajem, jaki jon bačyŭ supraćvahaj nie tolki Zachadu, ale ekanamična — i Rasii. U Biełarusi vyrasła niekalki vytvorčaściaŭ, pabudavanych na kitajskija kredyty, i źjaviŭsia technapark «Vialiki kamień». Kitaj pryznaje Alaksandra Łukašenku, na pačatku hoda jaho ŭ Piekinie sustrakaŭ Si Czińpin.
«Heta vielmi, vielmi dziŭna, što Łukašenku ciapier nie zaprasili», — skazaŭ «Našaj Nivie» minski čynoŭnik.
Pakul dva dziasiatki prezidentaŭ i premjeraŭ padymali kielichi na bankiecie ŭ Piekinie, Łukašenka prymaŭ u Minsku pasła Vieniesueły. Prezidenta hetaj krainy ŭ Piekinie taksama nie było — u adroźnieńnie ad demakratyčna abranych kiraŭnikoŭ Arhienciny i Čyli.
Čamu čałavieka, jaki hadami pradaje ideju ab zamienie zachodnich suviaziaŭ i rynkaŭ na kitajskija, hetym razam u Piekinie bačyć nie zachacieli?
«Mahčyma, heta znak, što paśla padziej apošnich hadoŭ, u śviatle napružanych adnosin Biełarusi z zachodnimi susiedziami i pahrozy poŭnaha zakryćcia biełaruska-polskaj miažy Biełaruś pierastała być klučavym uvachodam u ES u ramkach kancepcyi «Adzin pojas, adzin šlach», — vykazaŭ «Našaj Nivie» mierkavańnie były biełaruski dypłamat, jaki paprasiŭ, kab jaho imia nie nazyvali.
«Adsutničajuć taksama pośpiechi z «Vialikim kamieniem» — novyja kampanii ź ES nie prychodziać, staryja ŭ svajoj bolšaści syšli», — zaznačyŭ jon.
«Značeńnie tych ci inšych krokaŭ kitajskaj dypłamatyi zrazumieć nie zaŭsiody prosta. Ale heta adnaznačna pakazčyk, što havaryć z Alaksandram Łukašenkam u farmacie ekanamičnaha forumu «Adzin pojas, adzin šlach» niama pra što. Kitaj choča biesprablemnaha tranzitu tavaraŭ u Jeŭrasajuz i ź Jeŭrasajuza. Polšča, Litva i Łatvija znajšli achilesavu piatu Alaksandra Łukašenki, kali papiaredzili, što ŭ vypadku paŭtareńnia ataki mihrantami ci inšych hibrydnych pahroz prosta zakryjuć miažu», — źviartaje ŭvahu inšy biełaruski dypłamat, jaki taksama paprasiŭ, kab jaho imia nie nazyvali.
Čytajcie taksama:
U Minsku dabudavali vializnaje novaje pasolstva Kitaja. Pryčym heta ceły kompleks budynkaŭ
Dvajnik ci nie? Pajezdka Pucina ŭ Piekin znoŭ naradziła sprečki. Hladzim FOTY
Pierad vystupam Pucina ŭ Piekinie niekalki čałaviek vyjšli z zały
