«Heta ž biełarus. U biełaruskija pašparty nie stavim, pravilna?» — pieradaje čytač «Našaj Nivy» razmovu dvuch polskich pahraničnikaŭ u šklanoj budcy pašpartnaha kantrolu.
«Trymajcie vaš pašpart», — supracoŭnik praciahvaje nie sapsavany štampam pašpart.
Paśla ŭkaza Łukašenki, jaki zabaraniaje biełarusam mianiać pašparty ŭ pasolstvach svajoj ža krainy, sekanomić lišniaje miesca ŭ pašparcie — nie lišniaje.
Dziasiatki tysiač biełarusaŭ znajšli prytułak u Jeŭropie, ratujučysia ad represij, i cana za pajezdku z Šenhiena ŭ Rumyniju, Brytaniju, Hruziju, Kazachstan ci amal lubuju inšuju krainu — 4 štampy. Heta adrazu pałova staronki pašparta.
Niekatoryja kažuć, što z polskim pahraničnym kantrolem možna było damaŭlacca i raniej. Ale čałaviečy padychod źmianiŭsia sistemnym.
Ni ŭ Litvie, ni ŭ Łatvii, ni ŭ Hruzii — krainach, dzie taksama znajši prystanišča niamała biełarusaŭ, — damovicca z pahraničnikami niemahčyma. Chacia ŭsie ciapier viaduć elektronnyja bazy, i daviedacca datu ŭjezdu ŭ krainu možna nie tolki pa štampie ŭ pašparcie.
«Heta rašeńnie było ŭzhodnienaje Pahraničnaj achovaj, ministerstvami ŭnutranych i zamiežnych spraŭ, — raskazaŭ «Našaj Nivie» polski dypłamat. — Heta łahičnaje rašeńnie, tamu što pakul niama jasnaha razumieńnia, što rabić mnohim tysiačam biełarusaŭ, jakija žyvuć u Polščy i nie zmohuć abmianiać svaje dakumienty. Mahčyma, budzie pryniataje rašeńnie ažno da spraščeńnia pracedury atrymańnia polskaha pašparta, ale ciapier robicca toje, što robicca. Admiena štampaŭ moža chacia b zapavolić skančeńnie pašparta nie z pryčyny skančeńnia terminu dziejańnia».
Inšyja krainy, u jakich asieli tysiačy biełarusaŭ, sutyknucca z tym samym vyklikam, što i palaki.
U Abjadnanym pierachodnym kabiniecie kažuć, što pra takoje prostaje vynachodnictva Polščy viedajuć i płanujuć uhavaryć astatnija krainy.
«Płanujem takoje abmierkavać na hetym tydni. Pakul nie hatovyja nazvać krainu», — skazaŭ «Našaj Nivie» pradstaŭnik Kabinieta Valer Kavaleŭski.
«Naša Niva» — krynica jakasnaj infarmacyi i bastyjon biełaruščyny
PADTRYMAĆ «NN»Čytajcie taksama:
