Pavodle infarmacyi amierykanskaha vydańnia, Rasija pierad vajskovym uvarvańniem va Ukrainu stvaryła dźvie hrupy maryjanietkavaha ŭradu, jaki musiŭ zamianić prezidenta Ukrainy Uładzimira Zialenskaha i ciapierašni ŭrad paśla ich zrynańnia. Klučavymi asobami hetych hrupaŭ pryznačyli byłoha prezidenta Ukrainy Viktara Janukoviča i aliharcha Viktara Miedźviadčuka, jaki staŭ adnym ź lidaraŭ hałoŭnaj prarasijskaj partyi Ukrainy (jaho 12 krasavika zatrymała Słužba biaśpieki Ukrainy.).
Pavodle źviestak vydańnia, Viktar Janukovič znachodziŭsia sa svajoj hrupaj u Biełarusi na pačatku sakavika. Druhaja hrupa ŭpłyvu z udziełam byłych čalcoŭ partyi Janukoviča sabrałasia na poŭdni Ukrainy pierad zachopam jaho rasijskimi vojskami.
Vydańnie taksama paviedamlaje, što FSB Rasii ciaham niekalki hadoŭ pavialičvała kolkaść svajho departamienta, jaki adkazvaŭ za Ukrainu — z 30 aficeraŭ u 2019-ym da 160-ci napiaredadni vajennaha ŭvarvańnia va Ukrainu.
Pavodle infarmacyi The Washington Post, pierad uvarvańniem Rasii aficery FSB užo znachodzilisia na terytoryi Ukrainy i arandavali kvatery ŭ biaśpiečnych rajonach Kijeva, jakija rasijskija vojski nie płanavali abstrelvać. Za niekalki dzion da ŭvarvańnia FSB zahadała svaim infarmataram vyjechać sa stalicy i pakinuć klučy ad svaich kvater dla rasijskich apieratyŭnikaŭ.
Vydańnie paviedamiła, što sabrała hetyja źviestki padčas svajho rasśledavańnia, jakoje tryvała niekalki miesiacaŭ. Žurnalisty The Washington Post vyvučyli mnostva kanfidencyjnych materyjałaŭ, u tym liku pierachoplenych raźviedkami, a taksama praviali intervju z vysokapastaŭlenymi čynoŭnikami Ukrainy, ZŠA i krain Jeŭropy.
