Niekalki dzion tamu namieśnica ministra abarony Ukrainy Hanna Malar zajaviła, što Uzbrojenym siłam Ukrainy nie chapaje ŭzbrajeńnia dla paśpiachovaha supraćstajańnia akupantam. Jana śćviardžaje, što armija atrymała ad Zachadu tolki 10% zbroi ad zapytanaha ŭkrainskim bokam abjomu.
U svaju čarhu daradca kiraŭnika Ofisa prezidenta Ukrainy Michaił Padalak nazvaŭ abjom uzbrajeńniaŭ, jaki patrebny Ukrainie ad Zachadu, kab skončyć vajnu, niedastatkovym. Pa jaho słovach, dla parytetu ŭ ciažkaj zbroi Ukrainie nieabchodna:
- 1000 haŭbic 155-mm;
- 300 RSZA;
- 500 tankaŭ;
- 2000 adzinak bronietechniki;
- 1000 dronaŭ.
Uvieś čas na nierašučaść i pavolnaść chaŭruśnikaŭ narakajuć i inšyja ŭkrainskija čynoŭniki i palityki. Zachodnija žurnalisty hetyja zajavy bačać, i tamu jany spytali 15 červienia paśla «Ramštajn-3» (sustrečy ŭ Brusieli ŭ štab-kvatery NATA dziasiatkaŭ ministraŭ abarony zachodnich krain pa pytańni dapamohi Ukrainie) u amierykanskich vajskoŭcaŭ, što jany pra heta dumajuć.
Voś jakimi byli adkazy ministra abarony ZŠA Łojda Ościna i staršyni Abjadnanaha kamiteta načalnikaŭ štaboŭ ZŠA hienierała Marka Mili.
U adkaz na pytańnie žurnalista ab tym, što «Ukraina publična zapytała vialiki śpis zbroi, siarod jakoha 1000 haŭbic, 500 tankaŭ i 300 sistem załpavaha ahniu», a ZŠA i ich chaŭruśniki nie dajuć takoj kolkaści zbroi, hienierał Mili adkazaŭ:
«Nakont ličbaŭ. Ja nie viedaju, adkul hetyja ličby, na jakija vy spasyłajeciesia, ale ja havaryŭ z hienierałam Załužnym, i my atrymlivajem śpisy. Heta aficyjnyja zapyty ad ich Ministerstva abarony. Jany prasili 10 bataljonaŭ artyleryi — było pastaŭlena 12 bataljonaŭ artyleryi. Znoŭ ža, było pastaŭlena 97 tysiač procitankavych sistem. Heta bolš procitankavych sistem, čym tankaŭ u śviecie. Jany prasili 200 tankaŭ — jany atrymali 237 tankaŭ. Jany prasili 100 bajavych mašyn piachoty — jany atrymali bolš za 300. My pastavili 1600 abo kala taho sistem SPA i kala 60 tysiač rakiet da ich. Kali ja kažu «my», ja maju na ŭvazie mižnarodnuju supolnaść.
260 artyleryjskich stvolnych sistem — albo rakietnaja, albo stvolnaja artyleryja ŭžo pastaŭlena. Usiaho 383 adzinki, i, jak ja ŭžo skazaŭ, amal paŭmiljona artyleryjskich snaradaŭ taksama pastaŭlena.
Łojd Ościn uziaŭ pad sumnieŭ zaŭvahu sa spasyłkaj na namieśnika ministra abarony Ukrainy, što Ukraina atrymlivaje tolki 10% ad toj zbroi, jakuju prosić, skazaŭšy, što jon nie viedaje, chto kazaŭ pra hetyja 10 adsotkaŭ, i paraiŭ źviarnucca da namieśnika ministra pa razhornuty kamientar. I što tolki što ŭ inšym pakoi jon hutaryŭ ź ministram abarony Ukrainy Alaksiejem Reźnikavym, ź jakim padtrymlivaje rehularny kantakt, jak i hienierał Mili, niekalki razoŭ na tydzień hutaryć z hienierałam Załužnym.
«My siońnia, jak užo nieadnarazova abmiarkoŭvali punkt za punktam, što im treba, i što aktualna ŭ hetaj baraćbie. My ŭpeŭnienyja, što prykładajem usie namahańni, kab dać im usio toje, što jany ličać patrebnym».
Vychodzić, nasamreč ukrainskija i zachodnija vajskoŭcy, jak vidać z adkazaŭ amierykancaŭ, majuć našmat lepšy ŭzrovień kamunikacyi i supracoŭnictva, čym pra heta kažuć ukrainskija čynoŭniki ŭ svaich papulisckich zajavach.
Navošta ŭkrainskija palityki zhuščajuć farby? Mahčyma, dla taho, kab svaimi zajavami paŭpłyvać jak na ŭkrainskuju hramadskuju dumku, tak i na hramadskuju dumku zachodnich krain — kab tyja padhaniali svaich palitykaŭ i vajskoŭcaŭ jašče bolš dapamahać Ukrainie.
