Švied, vystupajučy ŭ Minsku na kanfierencyi «Histaryčnaja pamiać: vialikaja pieramoha, zdabytaja adzinstvam», zajaviŭ: «Ciapier my aktyŭna dakumientujem dziejnaść dzieda polskaha prezidenta Dudy, jaki ŭvachodziŭ u skład ukrainskaha karnaha bataljona, što vyznačyŭsia asablivaj žorstkaściu ŭ pieršuju čarhu na terytoryi Minskaj i Viciebskaj abłaściej».
Adkul uvohule pajšoŭ hety fejk, što dzied Dudy byŭ ukraincam i słužyŭ u karnym bataljonie?
Rasijskaja prapahanda raspaŭsiudžvaje siarod polskich ultrapravych fejk pra ŭkrainskaha dzieda polskaha prezidenta Andžeja Dudy jašče z 2015 hoda.
Prapahandysty śćviardžajuć, što Andžej Duda — unuk Michajła Dudy, kamandzira Ukrainskaj paŭstanckaj armii, jaki vajavaŭ z palakami i na Vałyni ŭ 1943 hodzie.
Michajła Duda i Andžej Duda.
Rasijskija boty i polskija ŭltrapravyja śćviardžajuć, što Andžej Duda vielmi padobny da svajho tak zvanaha «dzieda» źniešnie, i što «fašyzm» pieradaŭsia ad prodka ŭ spadčynu hienami.
Fejk raspaŭsiudžvaŭsia, kab pierasvaryć pamiž saboj palakaŭ i ŭkraincaŭ pa balučym pytańni supolnaj historyi (nie ŭdałosia). A taksama dla dyskredytacyi polskaha prezidenta, maŭlaŭ, «dziadula» vychavaŭ polskaha prezidenta ŭ duchu «nacyzmu», i tamu jon padtrymlivaje sučasnych «ukrainskich nacystaŭ».
Fejk pieryjadyčna to ŭspłyvaje, to znoŭ zatuchaje ŭ roznych infarmacyjnych śmietnicach, taksama jaho aktyŭna, musić, pa kamandzie, raspaŭsiudžvali ruskamoŭnyja boty.
Apošni ŭsplosk hetaha fejku adbyŭsia ŭ rasijskich prapahandystaŭ u pačatku maja 2022 hoda.
A jak nasamreč?
Adzinaje, što źviazvaje Michaiła Ivanaviča Dudu i Andžeja Dudu — heta proźvišča (davoli raspaŭsiudžanaje jak u Polščy, tak i ŭ Zachodniaj Ukrainie).
Hety fejk sam prezident Polščy źniapraŭdziŭ jašče 7 hadoŭ tamu: ukrainiec Michaił Duda nie moh być dziedam Andžeja Dudy, bo nie mieŭ dziaciej. A taksama tamu što pamior u 1950 hodzie za 22 hady da naradžeńnia prezidenta Polščy ŭ 1972 hodzie, tamu nijak nie moh zajmacca vychavańniem polskaha lidara.
Sapraŭdnaha dzieda polskaha lidara pa baćkavaj linii zvali Aloiz Duda. Jon byŭ palakam, pracavaŭ kušniarom, žyŭ u Starym Sončy i pamior u 1992 hodzie.
Ahułam, bijahrafija polskaha prezidenta vielmi dobra viadomaja, niejkich biełych plamaŭ u jaje niama. Siarod prodkaŭ Dudy nie było ni ŭkraincaŭ, ni fašystaŭ, ni fašystaŭ-ukraincaŭ. Infarmacyja pra prodkaŭ Dudy dobra zadakumientavanaja ažno da 1810 hoda. U adroźnieńnie, naprykład, ad prodkaŭ Alaksandra Łukašenki.
Sapraŭdny dzied Dudy Aloiz paśla zakančeńnia čatyroch kłasaŭ ahulnaadukacyjnaj škoły pajšoŭ padpracoŭvać kušniarom. Jaho pieršy haspadar, adnak, drenna staviŭsia da jaho i Aloiz Duda časami navat haładaŭ. Potym dzied budučaha polskaha prezidenta ŭciok ad jaho ŭ Novy Sonč. U 1942 hodzie jon sustreŭ svaju budučuju žonku Kinhu Rams i praz hod ažaniŭsia ź joj. Jana pachodziła z patryjatyčnaj huralskaj siamji z vakolic Novaha Sonča.
Kali Andžej Duda byŭ maleńki, jon lubiŭ chadzić ź dziedam u kaścioł, potym paśla imšy jany chadzili ŭ kramu i kuplali chleb i tvaroh (siamja była biednaja).
Isnujuć navat fotazdymki maleńkaha Dudy ź dziedam Aloizam.
Siarod inšych prodkaŭ polskaha prezidenta ni nacystaŭ, ni ŭkraincaŭ taksama nie było.
Rodny brat Aloiza, Francišak, vajavaŭ u składzie Armii Krajovaj z 1943 hoda i byŭ uziaty niemcami ŭ pałon, jaho katavali ŭ hiestapa, dzie jon u vyniku i zahinuŭ.
Dzied pa matčynaj linii, Nikodym Mileŭski, byŭ pryzvany ŭ ruskuju armiju padčas Pieršaj suśvietnaj vajny, ale dezierciravaŭ, u 1918 hodzie ŭstupiŭ u Vojska Polskaje, uziaŭ udzieł u polska-savieckaj vajnie, paśla zvalnieńnia z vojska pracavaŭ u statystyčnym upraŭleńni. Jaho brat Viktar i syn Lech byli partyzanami, u pryvatnaści, Lech Mileŭski ŭdzielničaŭ u Varšaŭskim paŭstańni.
Rasijskaja i łukašenkaŭskaja prapahanda ŭžo šmat hadoŭ vykarystoŭvaje chłuśniu jak instrumient dla apraŭdańnia svaich impierskich ambicyj i dyktatury.
Raniej rasijskija boty i prapahandysty raspaŭsiudžvali padobnyja fejki pra dziadoŭ troch klučavych niamieckich palitykaŭ. Jany zajaŭlali, što dziedam kanclera Ołafa Šolca byŭ Fryc fon Šolc, hienierał viermachta Hierchard Lindnier byŭ dziedam ministra finansaŭ Kryścijana Linda, a obierhrupienfiurer SS Hartman Łaŭterbachier byŭ dziedam ministra achovy zdaroŭja Karła Łaŭterbacha. Usie hetyja śćviardžeńni iłžyvyja, a krynicaj hetych fejkaŭ byŭ «kuchar Pucina» Jaŭhien Pryhožyn.
Hienprakuratura Biełarusi raniej raspaŭsiudziła anałahičny fejk pra eks-prezidenta Litvy Vałdasa Adamkusa.
Čytajcie taksama: Zapyt prakuratury adnosna Adamkusa: zdajecca, adno pryniali za druhoje, a druhoje pabłytali z trecim
Asoby, adnosna jakich raspaŭsiudzili źviestki, jakija źnievažajuć honar, hodnaść i dziełavuju reputacyju, zmohuć padać u sud pa hetych spravach, kali sudy ŭ krainie stanuć niezaležnyja. Takija spravy nie majuć terminu daŭnaści. Padavać takija pazovy mohuć i naščadki. Akramia taho, asobnyja z fejkaŭ mohuć padpadać pad zakanadaŭstva ab raspalvańni nacyjanalnaj abo sacyjalnaj varožaści.
Ministr ekanomiki schłusiŭ — pra vajnu
