Ukraina pasłała ŭ Maskvu pa svaich pałonienych prezidencki samalot. U im palacieli namieśnik kiraŭnika ofisa prezidenta i daradca Zialenskaha. Kali źniavolenych pasadzili ŭ samalot i jon pajšoŭ na ŭźlot, adny płakali, druhija apładziravali. Pierad pasadkaj namieśnik kiraŭnika prezidenckaj administracyi asabista naliŭ kožnamu pa kropli ŭkrainskaj harełki.
Ściuardesa ŭkrainskaha prezidenckaha samalota razdaje tolki što vyzvalenym źniavolenym survetki pierad śniadankam.
Ukrainskim viaźniam u Rasii dazvolili biez abmiežavańnia zabrać svaje turemnyja tranty i navat addali rečy, kanfiskavanyja pry aryšcie. Viazień Kolčanka, naprykład, pryvioz 20 kh listoŭ, jakija naprysyłali jamu z Ukrainy za čas pałonu.
Siarod vyzvalenych byŭ krymski tataryn Junus Biekiraŭ. Na fota: jon spuskajecca z trapa. Jaho žonka adšturchnie achoŭnikaŭ i abdymie muža raniej, čym jaho pryvitaje prezident Ukrainy, jaki sustrakaŭ viaźniaŭ kala trapa.
Ukrainski bok da apošniaha nie byŭ upeŭnieny ŭ pośpiechu zadumy. Bajalisia roznaha. Trymali ŭ tajamnicy navat miesca zboru takoha kaštoŭnaha «abmiennaha materyjału». Rasijskich pałonnych trymali ŭ vajskovaj častcy na terytoryi Baryspala.
Abmien staŭ vynikam telefanavańnia Zialenskaha Pucinu ŭ niečakany momant — u dzień, kali ad rasijskaha ahniu, pry farmalnym spynieńni ahniu, zahinuli čatyry ŭkrainskija vajskoŭcy.
Rasijski bok uparta admaŭlaŭsia ad abmienu ŭsie piać hadoŭ, choć rasijskich i deneeraŭskich pałonnych Ukraina trymaje našmat bolš, čym rasijanie — ukraincaŭ. Usio źmianiłasia hetym letam. U razmovie ź Zialenskim Pucin asabliva adznačaŭ važnaść, kab u śpisie na abmien byŭ žurnalist-ahient Kirył Vyšynski, ale naziralniki schodziacca ŭ dumcy, što Rasii vielmi važna było viarnuć zienitčyka Cemacha, vykradzienaha ŭkrainskim śpiecnazam u DNR i vyviezienaha praź liniju frontu. Jon moža być klučavym śviedkam u pracesie pa spravie źbićcia «Boinha». Jaho dastaŭka ŭ Kijeŭ była vialikim pośpiecham ukrainskaj raźviedki. Zialenski ŭ aeraporcie zajaviŭ, što Cemacha dapytali dastatkova, u tym liku i dadatkova pierad abmienam, pa prośbie Niderłandaŭ. Niderłandy i niekatoryja inšyja krainy Jeŭrasajuza ŭsio adno acanili rašeńnie Zialenskaha addać Cemacha nieadnaznačna.
«Cemacha dapytvali pierad vydačaj, i nie tolki pierad vydačaj. Ja nie mahu nazvać imiony, ja paabiacaŭ, ale byli lidary jeŭrapiejskich krain, ź jakimi my prahavaryli hety momant: i čas, nieabchodny dla praviadzieńnia dadatkovaha dopytu, i ŭsie śledčyja dziejańni. My ŭsio heta zrabili, pra što nas paprasili. Było składana, ja bajaŭsia, što heta moža sarvać abmien, ale my zrabili ŭsio».
Nieaficyjna ŭkrainskija čynoŭniki pierakonvajuć ŚMI, što ryzyki vydačy Cemacha byli hruntoŭna ŭzvažanyja. «Jaho pakazańni, kali b jany byli, istotna nie adabjucca na sudovym pracesie», — skazaŭ adzin z čynoŭnikaŭ.
U subotu ŭkrainskija ŚMI tryumfavali. Abmien viaźniami ŭ Kijevie ŭsprymajecca jak palityčnaja pieramoha Ukrainy.
