Rasijski telekanał «Doždž» moža praciahnuć viaščańnie jašče jak minimum paŭtary miesiacy. Pa vynikach akcyi «Padtrymaj Doždž», kali hledačam prapanoŭvałasia achviaravać hrošy, a taksama kuplać łoty, datujučy telekanał, udałosia sabrać 40 młn rubloŭ.
Hetych srodkaŭ chopić na 50 sutak 21 hadzinu i 40 chvilin efiru, paviedamlaje ličylnik na sajcie «Daždžu». [na momant publikacyi materyjała]
«Heta nie značyć, što my składziem ruki i budziem čakać, kali hetyja dva miesiacy skončacca. My budziem z novaj enierhijaj pracavać, rabić toje, u što i my, i hledačy «Daždžu» tak vierać, i budziem zmahacca za toje, kab niezaležnaje telebačańnie praciahvała isnavać», — zajaviła hiendyrektar kanała Natalla Sindziejeva.
Akcyja pa zbory srodkaŭ na dalejšaje viaščańnie «Daždžu», prahramy jakoha admovilisia tranślavać apieratary płatnaha telebačańnia, startavała 24 sakavika i doŭžyłasia tydzień.
«Marafon ŭ padtrymku «Daždžu» skončyŭsia, ale ŭsio tolki pačynajecca», — havorycca na sajcie telekanała.
Jašče ŭ pačatku sakavika ŭładalniki i kiraŭniki «Daždžu» rasceńvali situacyju jak faktyčnaje zakryćcio telekanała: Natalla Sindziejeva zajaŭlała, što jamu «zastałosia žyć adzin miesiac».
Ekanamičnaja madel
«Doždž» apynuŭsia ŭ centry skandału z-za apytańnia, prymierkavanaha da 70-hodździa vyzvaleńnia Leninhrada ad fašysckaj błakady - «Ci treba było zdać Leninhrad, kab źbierahčy sotni tysiač žyćciaŭ».
Deputaty zakanadaŭčaha schodu Pieciarburha zajavili, što takaja pastanoŭka pytańnia abražaje pamiać zahinułych błakadnikaŭ, i źviarnulisia da hienieralnaha prakurora Rasiei Juryju Čajcy z prośbaj pryniać sankcyi ŭ dačynieńni da telekanała.
Niahledziačy na toje, što telekanał pryznaŭ apytańnie pamyłkaj i prynios za jaho prabačeńnie, bujnyja spadarožnikavyja i kabielnyja apieratary adzin za adnym pačali adklučać «Doždž».
Prakuratura, pravioŭšy pravierku, nie znajšła ŭ dziejańniach žurnalistaŭ prykmiet ekstremizmu, a Fiederalnaja antymanapolnaja słužba prykmiet kartelnaj zmovy ŭ dziejańniach apierataraŭ.
U paniadziełak namieśnik ministra suviazi i masavych kamunikacyj Alaksiej Volin zajaviŭ Interfaksu, što nie bačyć nijakich abmiežavańniaŭ dla adnaŭleńnia viaščańnia «Daždžu», kali jamu ŭdasca damovicca z raspaŭsiudnikami.
«Nijakich abmiežavańniaŭ i zabaron jak nie było, tak i niama. Kali jany znojduć ekanamičnuju madel, jakaja budzie cikavaja i viaščalnikam, i raspaŭsiudnikam, to ŭsio budzie vielmi dobra», — pryvodziać ahienctva słovy namieśnik ministra.
Raniej Natalla Sindziejeva paviedamiła pra hatoŭnaść adnavić pieramovy z teleapieratarami, kab viarnucca ŭ sietku na rynkavych umovach, źviarnuŭšy ŭvahu na toje, što hetyja ŭmovy zaležać ad papularnaści kanała.
«Da taho času, pakul ty niepapularny i nieviadomy kanał, ty albo płaciš apierataru, albo ŭmoŭna biaspłatny, z rostam papularnaści kanała raście cikavaść kabielnych apierataraŭ da najaŭnaści takoha kanała ŭ sietcy. I ŭmovy pierahladajucca. Apieratar pačynaje płacić kanału, kali kanał raźvivajecca pa płatnaj madeli», — cytuje Sindziejevu Interfaks.
