Курс лекцый пра род Радзівілаў пройдзе ў Нацыянальным мастацкім музеі Беларусі, паведамляецца на сайце музея.
Гучнае прозвішча князёў Радзівілаў даўно і трывала звязанае не толькі з гісторыяй Вялікага княства Літоўскага, але і з культурнай спадчынай, на якім гадуюць ідэнтычнасць любога сучаснага беларуса. Вялікія воіны, мудрыя палітыкі, творцы і наватары, гарачыя аматары мастацтва, прататыпы разнастайных легенд і рамантычных гісторый, Радзівілы былі не проста магнатамі, яны ўвасаблялі сабой ідэалогію сарматызму і жылі ва ўсведамленні ўласнай выключнасці разам з адказнасцю за лёс родных зямель. І хоць Вялікае княства ўжо два з лішнім стагоддзя як адышло ў нябыт, а нашчадкі князёў ужо не скачуць «дзікім паляваннем» па беларускіх прасторах, «радзівіліяна» — фокус гістарычных даследаванняў, прысвечаных гэтай сям'і, — з'яўляецца адной з самых жывых і займальных абласцей гістарычнай навукі ў Беларусі, адзначылі ў музеі.
Нацыянальны мастацкі музей арганізаваў спецыяльны суботні лекторый як частку часовай выставы «Радзівілы: лёсы краіны і роду», якая афіцыйна адкрыецца ў музеі 27 лютага. Напярэдадні, 26 лютага, музей запрашае гасцей на сустрэчу з князем Мацеем Мікалаем Радзівілам, з чыёй калекцыі сфармаваная выстава ў музеі.
Шэсць лекцый запланаваныя на працягу сакавіка-красавіка. Сярод заяўленых тэм: «Князі Радзівілы — канцлеры ВКЛ і захавальнікі дзяржаўнага архіва», «Радзівілы: музычныя мецэнаты, меламаны, кампазітары», «Больш смерці, чым жыцця»: Барбара Радзівіл і яе вобразы», «Тэатр Радзівілаў: вучыць і забаўляць».