Паводле даных, якімі падзялілася з CNN некамерцыйная арганізацыя Wikimedia Foundation, сёлета Вікіпедыя атрымала больш за 84 мільярды праглядаў старонак.
Самай прагляданай (больш за 49,4 мільёна праглядаў) у гэтым годзе стала старонка пра віртуальны чат-бот OpenAI ChatGPT. Што і не дзіўна, улічваючы рэзкі рост яго папулярнасці. У лютым ChatGPT усталяваў рэкорд па самым хуткім росце базы карыстальнікаў, сабраўшы ў студзені 100 мільёнаў актыўных карыстальнікаў.
У пяцёрку лідараў таксама ўвайшлі старонкі з біяграфіямі людзей, якія памерлі ў 2023 годзе, пра чэмпіянат свету па крыкеце 2023 года, Індыйскую прэм'ер-лігу (якая зʼяўляецца лігай крыкету) і фільм «Апенгеймер».
Як адзначаюць аналітыкі, вялікі ўплыў на спіс аказала аўдыторыя Індыі і Паўднёва-Усходняй Азіі. У выніку значная яго частка мае дачыненне да гэтага рэгіёна і самой Індыі.
Па словах дырэктаркі па сувязях з грамадскасцю Фонду Вікімедыя Анушы Аліхан, цяпер у Індыі каля 4700 актыўных рэдактараў-добраахвотнікаў англамоўнай Вікіпедыі. Па гэтым паказчыку краіна саступае толькі ЗША і Вялікабрытаніі. У той жа час Кітай, які пакуль застаецца лідарам па колькасці насельніцтва, забараняе Вікіпедыю.
Папулярнасць крыкета ў Індыі спрыяла таму, што трэцяе, чацвёртае, шостае і дзявятае месца ў спісе занялі старонкі, звязаныя з гэтым відам спорту. З іх дзве старонкі з інфармацыяй пра Індыйскую прэмʼер-лігу (32 мільёны праглядаў) і старонка сезона 2023 года (больш за 20 мільёнаў праглядаў).
Момант гульні зборных Індыі і Аўстраліі ў фінале чэмпіянату свету па крыкеце. 19 лістапада 2023 года. Фота: Gareth Copley/Getty Images
Па словах Аліхан, гэта першы выпадак, калі артыкулы, звязаныя з крыкетам, зʼявіліся ў топ-25 Вікіпедыі, які фонд публікуе кожны год, пачынаючы з 2015-га.
Акрамя гэтага, у спіс самых прагляданых старонак увайшлі два фільмы індыйскага Балівуду — «Джаван» (Jawan, 8 месца) і «Патаан» (Pathaan, 10 месца) апярэдзіўшы самыя касавыя амерыканскія фільмы «Барбі» (13 месца) і «Аватар: Шлях вады» (20 месца).
Нягледзячы на тое, што ў пракаце фільм «Барбі» сабраў больш за «Апенгеймера», старонка з інфармацыяй пра яго набрала 28,3 мільёна праглядаў, заняўшы пятае месца.
Акрамя гэтага ў топ-25 увайшлі старонкі пра уплывовых людзей у сферы спорту, забаў і бізнэсу. Сярод іх такія вядучыя ньюсмейкеры, як Тэйлар Свіфт, Ілан Маск і Ліянель Месі.
Старонка з інфармацыяй пра вайну ва Украіне заняла 24 месца з 12,8 мільёна праглядаў. А апошняе месца топа-25 — старонка пра Эндру Тэйта — уплывовага анлайн-блогера, які праславіўся сваімі жанчынаненавісніцкімі каментарамі і забаронай у большасці сацыяльных сетак.
ТОП-25 самых прагляданых старонак Вікіпедыі:
1. ChatGPT — 49,4 млн
2. Спіс памерлых у 2023 годзе — 42,6 млн
3. Чэмпіянат свету па крыкеце 2023 — 38,1 млн
4. Індыйская прэм'ер-ліга — 32 млн
5. «Апенгеймер» (фільм) — 28,3 млн
6. Чэмпіянат свету па крыкеце — 25,9 млн
7. Роберт Апенгеймер — 25,6 млн
8. «Джаван» (Jawan) (фільм) — 21,7 млн
9. Індыйская прэм'ер-ліга 2023 — 20,6 млн
10. «Патаан» (Pathaan) (фільм) — 19,9 млн
11. «Апошнія з нас» (тэлесерыял) — 19,7 млн
12. Тэйлар Свіфт — 19,4 млн
13. «Барбі» (фільм) — 18 млн
14. Крыштыяну Ранальду — 17,4 млн
15. Леянель Месі — 16,62 млн
16. Прэм'ер-ліга — 16,6 млн
17. Мэцью Пэры — 16,4 млн
18. Злучаныя Штаты — 16,2 млн
19. Ілан Маск — 14,3 млн
20. «Аватар: Шлях вады» — 14,3 млн
21. Індыя — 13,8 млн
22. Ліза Мары Прэслі — 13,7 млн
23. Вартавыя Галактыкі. Частка 3 — 13,3 млн
24. Уварванне Расіі ва Украіну — 12,79 млн
25. Эндру Тэйт — 12,72 млн
Чытайце яшчэ:
Самыя папулярныя аўто з ЗША, якія любяць беларусы
Самы папулярны беларускамоўны гурт у свеце — хто гэтыя хлопцы?
Якія кнігі слухаюць беларусы? Самае папулярнае з Audiobooks.by
