Supracoŭniki milicyi šeść hadzin katavali vartaŭnika minskaj aŭtastajanki? 22

Prakuratura Leninskaha rajona Minska pieradała ŭ Leninski adździeł Śledčaha kamiteta materyjały pa zajavie vartaŭnika staličnaj aŭtastajanki Vasila Saročyka ab źbivańni jaho supracoŭnikami milicyi.

Jak paviedamiŭ staršy pamočnik prakurora Minska Siarhiej Bałašaŭ, materyjały byli pieradadzieny ŭ adździeł SK 19 listapada ŭ adpaviednaści z patrabavańniami Kryminalna-pracesualnaha kodeksa. Prakuratura taksama vyniesła pastanovu ab pryznačeńni sudova-miedycynskaj ekśpiertyzy, kab Saročyk moh zafiksavać naniesienyja jamu cialesnyja paškodžańni.

Pra źbivańnie piensijaniera Saročyka, vartaŭnika aŭtastajanki, jakaja znachodzicca pa vulicy Malinina ŭ Minsku i naležyć UP «Ramen», paviedamiła pravaabarončaja infarmacyjna-aśvietnickaja ŭstanova «Płatforma». Na sajcie «Płatformy» (www.platformarb.com) taksama raźmieščany videaraskaz paciarpiełaha.

Padziei adbyvalisia 14 listapada. Pavodle słoŭ Saročyka, u punkt achovy aŭtastajanki pryjšli dva supracoŭniki pravaachoŭnych orhanaŭ, adzin ź jakich byŭ u cyvilnym.

Nie pakazvajučy dakumientaŭ i ničoha nie tłumačačy, jany zahadali vartaŭniku prajechać u Leninskaje RUUS. Prykładna hadzinu Saročyk znachodziŭsia ŭ pamiaškańni dziažurnaj čaści ŭpraŭleńnia, a zatym jaho paviali na dopyt. Paźniej vyśvietliłasia, što dopyt pravodziła opierupaŭnavažanaja Leninskaha RUUS Bahdanoŭskaja Ž.P., paviedamlaje «Płatforma».

Pavodle słoŭ Saročyka, opierupaŭnavažanaja nadzieła na jaho naručniki i stała źbivać, patrabujučy pryznacca ŭ kradziažy nadmahilnych plit,

jakija zachoŭvalisia na terytoryi aŭtastajanki, a taksama salarki i akumulataraŭ z mašyn. Akramia taho, ad vartaŭnika chacieli pačuć pryznańnie ŭ tym, što jon pieryjadyčna rabavaŭ kijoski na rynku «Śviełta».

Piensijanier pasprabavaŭ rastłumačyć, što nie viedaje, pra što idzie havorka, ale paśla hetaha źbivańnie tolki ŭzmacniłasia. Jak śćviardžaje Saročyk, jaho bili nahami i dubinkami pa hałavie i ciele, da źbivańnia pieryjadyčna padklučalisia inšyja supracoŭniki RUUS, asoby jakich ustanavić pakul nie ŭdałosia. Katavańni supravadžalisia niecenzurnaj łajankaj i pahrozami zabojstva. Kali pažyły čałaviek traciŭ prytomnaść, jaho ablivali chałodnaj vadoj, kab aprytomnieŭ.

Usio heta doŭžyłasia prykładna šeść hadzin, ale nijakaha pryznańnia ad Saročyka milicyjaniery nie atrymali.

U vyniku na jaho skłali niejki dakumient, piensijanier jaho padpisaŭ, ale byŭ nie ŭ stanie jaho pračytać, i adpuścili damoŭ.

Ź milicyi Saročyk nakiravaŭsia ŭ 10-ju haradskuju kliničnuju balnicu, kab źniać paboi, ale tam ad jaho zapatrabavali nakiravańnie z RUUS. Tady źbity vartaŭnik źviarnuŭsia z zajavaj u prakuraturu Leninskaha rajona Minska i ŭ IPU «Płatforma» z prośbaj ab dapamozie. «Płatforma», u svaju čarhu, prainfarmavała pra zdareńnie Hienprakuraturu, MUS i Śledčy kamitet Respubliki Biełaruś.

BiełaPAN

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH