Hrodzienskaja DAI praciahvaje vykarystoŭvać videa z rehistrataraŭ hramadzianskich aŭto dla pakarańnia parušalnikaŭ, paviedamlaje sajt viedamstva.
Apošni prykład — prajezd na čyrvonaje śviatło 24-hadovaha kiroŭcy BMW, jakoha štrafavali 90 razoŭ. Hety vypadak zafiksavaŭ videarehistratar spadarožnaha aŭto, jaho kiroŭca pieradaŭ videa ŭ DAI. Kiroŭca BMW atrymaŭ čarhovy štraf, piša sajt DAI Hrodna i Hrodzienskaj vobłaści.
Darečy, pryhody «rekardsmena» byli zafiksavanyja na vulicy Sołamavaj, dzie 5 kastryčnika honki dvuch pryjacielaŭ skončylisia trahiedyjaj — pad kołami adnaho z aŭto zahinuła žančyna.
Za apošni miesiac heta treci vypadak, kali DAI Hrodna vykarystała zapisy parušeńniaŭ praviłaŭ, vykładzienyja ŭ internecie.U vieraśni DAI adreahavała na paviedamleńnie ŭ hrodzienskim błohu s13 pra kiroŭcu «Opiela», jaki na praśpiekcie Kasmanaŭtaŭ prajechaŭ na čyrvonaje śviatło i tolki cudam nie źbiŭ piešachodaŭ na pierachodzie.
U pačatku kastryčnika ŭ pole zroku rehistratara trapiła kiroŭca «Forda», jakaja na vulicy Kalinoŭskaha pajšła na abhon praz sucelnuju pałasu raźmietki i ledź nie sutyknułasia z sustrečnym aŭto.
Varta adznačyć, što reakcyja na praktyku vykarystańnia takich zapisaŭ dla vyśviatleńnia parušalnikaŭ i ich pakarańnia vyklikaje ŭ aŭtaamataraŭ nieadnaznačnaja. Šmat chto ź ich pry abmierkavańni čarhovaha paviedamleńnia na hetu temu vykazvajecca niehatyŭna na adras dobraachvotnych pamočnikaŭ DAI.Ich apanienty miarkujuć, što tolki takim čynam možna pryvučyć parušalnikaŭ trymacca praviłaŭ.
