«Mižnarodnaja amnistyja» pryznała Andreja Pačobuta viaźniem sumleńnia. Jak adznačajecca ŭ zajavie pravaabarončaj arhanizacyi, biełaruski žurnalist źjaŭlajecca viaźniem sumleńnia, bo aryštavany ŭ suviazi z realizacyjaj svajho zakonnaha prava na svabodu vykazvańnia mierkavańnia.
«Mižnarodnaja amnistyja» rasceńvaje situacyju z Pačobutam jak «častku karciny zapałochvańnia aktyvistaŭ hramadzianskaj supolnaści i žurnalistaŭ biełaruskimi ŭładami», paviedamlaje sajt arhanizacyi. «Paśla prezidenckich vybaraŭ u śniežni 2010 hoda situacyja z pravami čałavieka ŭ krainie biesprecedentna pahoršyłasia. Byli zatrymany klučavyja apazicyjaniery, ź imi žorstka abychodzilisia, ich asudžali padčas niespraviadlivych sudovych razhladaŭ. Zapałochvańnie praciahvajecca ŭ dačynieńni da krytyčna nastrojenych niaŭradavych arhanizacyj, aktyvistaŭ hramadzianskaj supolnaści i žurnalistaŭ», — adznačajecca ŭ
«Mižnarodnaja amnistyja» zaklikaje ŭsich spačuvalnych nakiroŭvać biełaruskim uładam listy z zaklikam nieadkładna i biezumoŭna vyzvalić Andreja Pačobuta, a taksama vykonvać pravy hramadzian na svabodu vykazvańnia ŭ adpaviednaści ź mižnarodnymi abaviazacielstvami, jakija ŭziała na siabie Biełaruś.
***
Biełaruski karespandent polskaj «Haziety vyborčaj» (Varšava) Andrej Pačobut byŭ zatrymany 21 červienia ŭ siabie doma ŭ Hrodnie. U jaho kvatery praviali vobysk, paśla čaho Pačobuta pavieźli ŭ prakuraturu, a adtul dastavili ŭ śledčy izalatar. U dačynieńni da žurnalista raspačata sprava na padstavie č. 2 art. 367 KK (paklop u dačynieńni da prezidenta, učynieny asobaj, raniej adsudžanaj za paklop ci abrazu). Pavodle słoŭ žonki Pačobuta Aksany, nahodaj dla kryminalnaha pieraśledu jaje muža stali jaho artykuły, raźmieščanyja na sajtach «Chartyja`97» i «Biełaruski partyzan», u jakich išła havorka pra vyniasieńnie śmiarotnych prysudaŭ Dźmitryju Kanavałavu i Uładzisłavu Kavalovu, abvinavačanym u teraryźmie.
Hod tamu Pačobuta ŭžo sudzili pavodle č. 1 art. 367 KK (paklop u dačynieńni da prezidenta). Tady sud Leninskaha rajona Hrodna pryhavaryŭ žurnalista da troch hadoŭ pazbaŭleńnia voli z adterminoŭkaj vykanańnia na dva hady. Zaraz jamu pahražaje pakarańnie ŭ vyhladzie abmiežavańnia ci pazbaŭleńnia voli na termin da piaci hadoŭ.
Čakajecca, što abvinavačańnie Pačobutu budzie vystaŭlena ŭ kancy hetaha tydnia.
