Sučasny Turkmienistan staŭ dla Biełarusi sapraŭdnym stratehičnym partnioram, a sustrečy prezidentaŭ dźviuch krain paćviardžajuć vysoki ŭzrovień supracoŭnictva i ciopłyja adnosiny pamiž narodami. Pra heta zajaviŭ 27 krasavika Alaksandr Łukašenka na pieramovach z Hurbanhuły Bierdymuchamiedavym.
«Zroblenyja nami za apošni čas sumiesnyja namahańni dazvolili dasiahnuć kankretnych i adčuvalnych vynikaŭ dvuchbakovaha supracoŭnictva: umacavańnia palityčnaha dyjałohu, handlova-ekanamičnych i humanitarnych suviaziaŭ», — cytuje Łukašenku pres-słužba prezidenta.
Biełaruski lidar padkreśliŭ, što źniešniehandlovy abarot pamiž dziaržavami za apošnija čatyry hady vyras u piać razoŭ i ŭ 2011 hodzie pieravysiŭ 200 młn. dołaraŭ.
Pavodle jaho słoŭ, Biełaruś hatovaja aktyŭna ŭdzielničać u realizacyi sumiesnych prajektaŭ z Turkmienistanam. «My vitajem ekanamičnuju palityku pa stvareńni mahutnaha sučasnaha vytvorčaha patencyjału krainy, jakuju pravodzić kiraŭnictva Turkmienistana, i hatovyja ŭziać aktyŭny ŭdzieł u realizacyi sumiesnych prajektaŭ», — padkreśliŭ Łukašenka.
Na sustrečy ŭ pašyranym składzie Bierdymuchamiedaŭ zajaviŭ, što Turkmienistan hatovy pašyryć namienkłaturu zakupak biełaruskaj mašynabudaŭničaj pradukcyi. «My ŭ Biełarusi zakuplajem vielmi šmat techniki, jakaja pakazała siabie ź jakasnaha boku, tamu my i nadalej budziem zakuplać vašu pradukcyju», — cytuje Bierdymuchamiedava BiełTA. Akramia taho, Turkmienistan nabyvaje biełaruskija stanki, abstalavańnie, budmateryjały, charčavańnie, miedykamienty. Prezident Turkmienistana napiaredadni padpisaŭ pastanovu, jakaja dazvalaje Ministerstvu kamunalnaj haspadarki zaklučyć kantrakty na zakupku 1.989 adzinak techniki AAT «MAZ» i 173 adzinak śpiecyjalnaj techniki AAT «Amkador».
Bierdymuchamiedaŭ adznačyŭ, što pryniaty dakumient pa zakupkach biełaruskich tavaraŭ dapamoža vyjści pa vynikach pieršaha kvartała na tavaraabarot bolš jak 320 młn. dołaraŭ. Jon padkreśliŭ, što pa vynikach pieršaha kvartała biełaruska-turkmienistanski tavaraabarot pierasiahnuŭ uzrovień uzajemnaha handlu za papiarednija piać hadoŭ.
Biełaruś prapanoŭvaje Turkmienistanu razhledzieć novyja formy supracoŭnictva ŭ humanitarnaj śfiery, asabliva ŭ halinie adukacyi. «Zdajecca cikavym prajekt stvareńnia na terytoryi vašaj krainy sumiesnaj ustanovy pa padrychtoŭcy kadraŭ siaredniaha źviana», — adznačyŭ Łukašenka. Jon dadaŭ, što ciapier u Biełarusi vučacca prykładna 6 tys. studentaŭ z Turkmienistana.
«Surjoznaje pašyreńnie ŭ apošnija hady dvuchbakovych adnosin u ekanamičnaj i humanitarnaj śfierach dazvoliła padyści da siońniašniaj sustrečy ź vialikim pakietam dakumientaŭ — ich amal paŭtara dziasiatka», — padkreśliŭ kiraŭnik biełaruskaj dziaržavy.
Siarod najvažniejšych dakumientaŭ, padpisanych siońnia, — sumiesnaje biełaruska-turkmienskaje kamiunikie i pahadnieńnie ab handlova-ekanamičnym supracoŭnictvie ŭ halinie pastavak biełaruskaj sielskahaspadarčaj, darožna-budaŭničaj i kamunalnaj techniki.
