U dačynieńni da namieśnika kiraŭnika hramadzianskaj kampanii «Havary praŭdu!» Andreja Dźmitryjeva składzieny administracyjny pratakoł za parušeńnie paradku arhanizacyi abo praviadzieńnia masavaha mierapryjemstva.
Jak paviedamiŭ BiełaPAN Dźmitryjeŭ, jon byŭ vyklikany ŭ Smalavicki RAUS 16 krasavika dla dačy pakazańniaŭ u suviazi z faktam praviadzieńnia schodu členami sadavodčych tavarystvaŭ 10 krasavika.
«Na dumku milicyi, schod dačnikaŭ traplaje pad dziejańnie Kodeksa ab administracyjnych pravaparušeńniach, bo ŭ im udzielničali nie tolki členy sadavodčaha tavarystva, na terytoryi jakoha prachodziŭ schod. Jany abmiarkoŭvali stvareńnie hramadskaha abjadnańnia "Svaja sotka", a hetaje pytańnie nie jość pradmiet statutnaj dziejnaści tavarystva. Kali kiravacca takoj łohikaj, to i rabočyja zavoda, jakija zachočuć hałosna abmierkavać niejkuju prablemu na terytoryi pradpryjemstva, aŭtamatyčna trapiać pad dziejańnie hetaha zakona», — skazaŭ Dźmitryjeŭ.
Pavodle słoŭ Dźmitryjeva, sud nad im adbudziecca najbližejšym časam, adnak datu jamu nie nazvali.
«Na raźvitańnie ja daŭ u milicyi internet-spasyłku na ruska-kitajski razmoŭnik. Niachaj vučać kitajskuju movu, kali ŭžo tak chočuć, kab u rajonie byŭ pabudavany kitajski technapark», — skazaŭ Dźmitryjeŭ.
Nahadajem, u Smalavičach (Minskaja vobłaść) viečaram 12 krasavika byli zatrymanyja aktyvisty kampanii Andrej Dźmitryjeŭ, Michaił Paškievič i Juryj Hančar, a taksama staršynia miascovaha sadovaha tavarystva «Rečańka» Vasil Kazłoŭski. Ich dastavili ŭ rajonny adździeł milicyi sa schodu dačnaha tavarystva. Pratakoły na ich nie składalisia, ale Paškieviču i Dźmitryjevu vypisali pozvy z pradpisańniem źjavicca ŭ Smalavicki RAUS.
U śniežni 2011 hoda abiedźvie pałaty biełaruskaha parłamienta ratyfikavali pahadnieńnie pamiž uradami Biełarusi i Kitaja ab sumiesnym industryjalnym parku, padpisanaje ŭ Minsku 18 vieraśnia 2011 hoda. Jak adznačyŭ tady namieśnik ministra ekanomiki Anatol Fiłonaŭ, dla parka zareziervavany ziamielny ŭčastak u Smalavickim rajonie kala nacyjanalnaha aeraporta Minsk płoščaj pryblizna 80 kvadratnych kiłamietraŭ. Asnoŭnyja kirunki dziejnaści parka: tonkaja chimija, nana- i bijafarmaceŭtyka, mašynabudavańnie, elektronika.
