Na 2012 hod dla ŭdziełu ŭ pasiedžańniach Baranavickaha harvykankama akredytavany tolki adzin čałaviek — hałoŭny redaktar vydańnia Uładzimir Janukievič. U minułyja hady takoha abmiežavańnia nie isnavała.Pra novaŭviadzieńnie redakcyju prainfarmavali listom ad 4 studzienia, padpisanym načalnicaj adździełu ideałahičnaj pracy Taćcianaj Žytko.
Taksama ŭ vydańnia niečakana ŭźnikli składanaści ŭ supracy z Baranavickim Haradskim adździełam unutranych spraŭ. Karespandentku vydańnia Natallu Siemianovič, jakaja aśviatlaje kryminalnuju tematyku, 6 studzienia painfarmavali, što milicyja bolš nie budzie davać infarmacyi niezaležnamu vydańniu.
Nieaficyjna žurnalistcy skazali, što na spynieńni supracoŭnictva HAUS z hazietaj nastojvaŭ Baranavicki harvykankam.
Hetaje rašeńnie dla redakcyi stała absaluna niečakanym. U vydańnia było naładžana plonnaje supracoŭnictva z HAUS. Natalla Siemianovič za svaje publikacyi pa prafiłaktycy pravaparušeńniaŭ nieadnarazova atrymlivała ŭznaharody Ministerstva ŭnutranych spraŭ, UUS Bresckaha abłvykankama. «Nie viedajem, chto vyjhraje ad spynieńnia supracoŭnictva, ale dakładna nie milicyja i nie haradžanie», — skazali słužbie manitorynhu BAŽ u redakcyi.
Cikava, što takoje rezkaje paharšeńnie situacyi z dostupam da infarmacyi adbyłosia paśla źjaŭleńnia rezanansnaha siužetu Intex-press ab adkryćci «Jeŭraoptu» ŭ Baranavičach.
Pa źviestkach vydańnia, staršynia harvykankama na sustrečach z kiraŭnikami pradpryjemstvaŭ i arhanizacyj horada nieadnarazova vykazvaŭ niezadavolenaść hetym nibyta «haniebnym dla horada» siužetam i adkryta zaklikaŭ być aściarožniej u dačynieńniach ź niezaležnym vydańniem.
«Na pres-kanfierencyi 23 śniežnia prezident naŭprost zajaviŭ, što rehijanalnyja ŚMI pavinnyja zajmać pryncypovuju pazicyju ŭ aśviatleńni prablem. Navat kiraŭnik dziaržavy, jakoha naŭrad ci možna padazravać u lubovi da niezaležnaj presy, zaprašaje niezaležnych žurnalistaŭ na pres-kanfierencyi, słuchaje vostryja pytańni, čytaje vostryja publikacyi na svoj adras. A kiraŭnictva Baranavičaŭ, vidać, ličyć, što pra ich možna pisać jak pra niabožčykaŭ — albo dobra, albo nijak. Nijakaha paklopu albo źniavahaŭ u našych publikacyjach niama. Jak kažuć, niama čaho na lusterka narakać. My vykonvajem svaju pracu prafiesijna i ŭ miežach dziejnaha zakanadaŭstva. I praciahniem heta rabić», — paviedamili słužbie manitorynhu BAŽ u redakcyi Intex-press.
