Biełaruskija śpiecsłužby zdyskredytavali jašče adnaho polskaha dypłamata + videa 47

U internecie nieviadomyja raźmiaścili videa, na jakim — pjany ŭ dym supracoŭnik palityčnaha adździeła pasolstva Polščy ŭ Minsku Vitald Misiak. Jak piša «Hazieta vyborča», Misiak byŭ adkaznym za biaśpieku abjekta.

Paśla źjaŭleńnia videa ministr zamiežnych spraŭ Polščy Radasłaŭ Sikorski pryniaŭ rašeńnie ab adklikanni dypłamata. Misiak užo prybyŭ u Varšavu, dzie skłaŭ tłumačeńni.

Jak piša «Vyborča», 13 śniežnia Misiak viačeraŭ z dypłamatami z roznych krain. Na zapisie restarannaj kamiery možna ŭbačyć, što kala 23-j hadziny jon ustaje z-za stała, chistajučysia, i padaje na inšy stoł.

U dadatak byli pakazany zapisy Misiaka, zroblenyja ź inšych kamier. Restaranny zapis moh być dastupny tolki biełaruskim śpiecsłužbam.

Misiak paćviardžaje, što na videazapisie — jon. Ale śćviardžaje, što jamu ŭ časie viačery chtości padliŭ u šklanku čahości takoha, što pryviało jaho da straty kantrolu nad saboj.

U tytrach da filma na kiepskaj polskaj movie, z rusicyzmami, śćviardžajecca taksama, što polski dypłamat pabiŭsia i «zhubiŭ słužbovyja dakumienty» i «pryznačany dla sakretnych pieramovaŭ telefon Blackberry».

Pradstaŭnik polskaha MZS Marcin Basacki hety fakt abvierh. Pavodle jahonych słovaŭ, nivodzin polski dypłamat u Minsku słužbovych telefonaŭ i dakumientaŭ nie hublaŭ. Jon adznačyŭ, što ministerstva pravodzić pravierku pa fakcie filma. Kali Misiak nie dakaža, što jaho atrucili, jaho zvolniać sa słužby.

«Gazeta Wyborcza» nazyvaje film čarhovaj sprobaj biełaruskich śpiecsłužb zdyskredytavać polskuju dypłamatyju.

Hazieta adznačaje, što heta nie pieršy padobny incydent. Uvohule, zachodnija dypłamaty razhladajuć Minsk jak adnu z samych ciažkich i niebiaśpiečnych placovak dla dziejnaści.

Polšča vyklikaje asablivy šał łukašenkaŭcaŭ, bo paśladoŭna padtrymlivaje biełaruskuju kulturu i prymaje represavanych u Biełarusi ŭ svaich navučalnych ustanovach.

Naprykład, mienavita Polšča finansuje adziny niezaležny i adnačasova adziny całkam biełaruskamoŭny telekanał «Biełsat», jana vydzialaje taksama šmat stypiendyj dla biełaruskich studentaŭ i aśpirantaŭ. Varta nahadać, što incydent ź Misiakam zdaryŭsia pry kancy polskaha staršynstva ŭ ES. U časie papiaredniaha vienhierskaha staršynstva ŭ internecie byŭ raspaŭsiudžany rolik, u jakim dyskredytavali žonku pasła Vienhryi ŭ Biełarusi. Jak Vienhryja, tak i Polšča šmat rabili dziela taho, kab jeŭrapiejskija krainy dziejničali suprać biełaruskaj dyktatury adzinym frontam.

Mikoła Buhaj

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH