Luboŭ Kavalova, maci abvinavačvanaha ŭ dapamahańni teraryzmu Uładzisłava Kavalova, źviarnułasia da Alaksandra Łukašenki z prośbaj vyratavać jaje syna ad vyšejšaj miery pakarańnia. Pra heta žančyna paviedamiła na
«Dva miesiacy sud staraŭsia vyśvietlić karcinu złačynstva. Ale naziralniki i navat paciarpiełyja nie pierakanany, što śledstva raskryła karcinu złačynstva. My nie pierakanany, što złačynstva raskryta. Dokazy śledstva nie pierakanali navat paciarpiełych», — adznačyła Luboŭ Kavalova.
Jana pracytavała svoj zvarot da kiraŭnika dziaržavy, u jakim, u pryvatnaści, havorycca: «Ja zaklikaju vas skazać svajo apošniaje słova: pravieści dadatkovaje i starannaje rasśledavańnie hetaj spravy. Nie śpiašacca z vyniasieńniem rašeńnia, padumać. Ja hatova achviaravać saboj. Ja hatova da taho, kab rasstralali mianie zamiest majho syna. U nas niama prava na pamyłku. Na miescy majho syna moh apynucca luby čałaviek».
* * *
Nahadajem, 14 listapada namieśnik hienprakurora Alaksiej Stuk Paprasiŭ sud pryhavaryć Kanavałava i Kavalova da vyšejšaj miery pakarańnia — śmiarotnaj kary. Abvinavačańnie ličyć, što ich vinavataść pa ŭsich epizodach paćviardžajecca vyvučanymi ŭ sudzie dovadami, abstavinaŭ, jakija źmiakčajuć vinu abvinavačvanych, nie ŭstanoŭlena. Abvinavaŭcy razhladajuć Kanavałava i Kavalova jak «vyklučna niebiaśpiečnych dla hramadstva i dziaržavy».
Na minułym tydni Luboŭ Kavalova raźmiaściła ŭ internecie pietycyju, u jakoj prosić mižnarodnuju supolnaść vyratavać ad śmiarotnaj kary abvinavačvanych u vybuchu ŭ minskim mietro.
«30 listapada, — havorycca ŭ pietycyi, — Viarchoŭny sud Biełarusi vyniesie svajo kančatkovaje rašeńnie nakont pryhavoru da śmiarotnaj kary majho syna Uładzisłava Kavalova i jašče adnaho maładoha čałavieka, Dźmitryja Kanavałava. Kanavałaŭ Dźmitryj abvinavačvajecca ŭ arhanizacyi teraktaŭ 2005 hoda ŭ Viciebsku, na Dzień Niezaležnaści ŭ Minsku ŭ 2008 hodzie i ŭ mietro Minska ŭ krasaviku 2011 hoda. Moj syn, Uładzisłaŭ Kavaloŭ, abvinavačvajecca ŭ saŭdziele i niedaniasieńni».
«Usie abvinavačańni hruntujucca na pryznalnych pakazańniach, dadzienych na papiarednim śledstvie pad naciskam, ad jakich Uładzisłaŭ Kavaloŭ admoviŭsia na sudzie, — adznačaje aŭtar pietycyi. — Bolš nijakich važkich dokazaŭ abvinavačańnie nie pradstaviła — usio pabudavana na zdahadkach i dovadach. Moj syn Uładzisłaŭ śćviardžaje, što Dźmitryj Kanavałaŭ taksama nie maje nijakaha dačynieńnia da hetaj spravy. Ja viedaju, što moj syn nievinavaty. Taksama ličać ludzi, paciarpiełyja ad terakta, jakija prysutničali na sudzie, i mižnarodnyja arhanizacyi pa abaronie pravoŭ čałavieka».
Luboŭ Kavalova prosić usich nieabyjakavych ludziej «dapamahčy nie zabić» jaje syna i Dźmitryja Kanavałava, «a zamiest hetaha — zapatrabavać znajści tych, chto sapraŭdy pavinien nieści adkaznaść za ŭčynienyja złačynstvy».
Žančyna spadziajecca sabrać pad svajoj pietycyjaj nie mienš čym 5 tysiač podpisaŭ. Na hety momant pad zvarotam padpisalisia ŭžo bolš za dźvie tysiačy čałaviek.
