Biełaruskaja čyhunka adkryła ruch rehijanalnych linij pa maršrutach Minsk-Baranavičy i Brest-Baranavičy, jakija absłuhoŭvaje šviejcarskaja rehijanalnaja elektryčka Stadler. Razam z radaściu, što i ŭ Baranavičy dajšoŭ jeŭrapiejski kamfort, raskład ŭ žycharoŭ horada vyklikaŭ buru abureńnia.
Da Minska — za adzin dalar
Adkryćcio rehularnaha ruchu elektraciahnikoŭ rehijanalnych linij źjaŭlajecca čarhovym etapam realizacyi novaha farmatu pasažyrskich pieravozak, ŭkaranieńnie jakoha Biełaruskaja čyhunka pačała ŭ 2010 hodzie.
Adlehłaść ad Bresta da Baranavičaŭ elektryčka pieraadolvaje amal za dźvie hadziny, a ad našaha horada da Minska — za paŭtary.
Pa maršrucie z Bresta ŭ Baranavičy ciahnik spyniajecca ŭ Žabincy, Biarozie i Ivacevičach, a na šlachu da stalicy — tolki ŭ Kojdanavie i Stoŭbcach.
Košt prajezdu na elektraciahnikach rehijanalnych linij adpaviadaje koštu prajezdu ŭ ahulnych vahonach chutkich ciahnikoŭ, jakija kursujuć pa dadzienych maršrutach. Ad horada Minska da Baranavičaŭ košt prajezdu składzie 9740 rubloŭ, ad našaha horada da Bresta — 11760 rubloŭ.
Šviejcarski farmat pieravozak na biełaruskaj darozie
Rehijanalnaja elektryčka składajecca z 4 vahonaŭ, dzie mohuć raźmiaścicca 188 pasažyraŭ. U vahonie praduhledžana jašče 26 adkidnych miescaŭ.
U sałonach jość kandycyjaniery, sistema videanazirańnia ź pieradačaj vyjavy na dysplej u kabinie mašynista, infarmacyjnyja tabło, miakkija siadzieńni z padłakotnikami pa sistemie 2 +2.
Dźviery «inšaziemki» znutry i zvonku čałaviek adkryvaje sam pry dapamozie sensarnych datčykaŭ na ŭvachodach u vahony. A voś padčas ruchu dźviery błakujucca.
Pa słovach śpiecyjalistaŭ, šviejcarcy vialikuju ŭvahu nadali biaśpiecy pasažyraŭ i absłuhoŭvajučaha piersanału.
«Da prykładu, dźviery elektryčki pracujuć na fotaelemientach, i jana nie začynicca da taho času, pakul pablizu ich znachodzicca choć by palec čałavieka, ciahnik nie kraniecca ź miesca», — raspaviadaje načalnik vakzału «Baranavičy-Paleskija» Jury Savoś.
U adnym z vahonaŭ abstalavanaja šmatfunkcyjanalnaja zona dla pasažyraŭ z abmiežavanymi fizičnymi mahčymaściami, a taksama dla pasažyraŭ ź dziciačymi kałyskami, rovarami i bujnahabarytnym bahažom.
Dla kaho raskład?
Pieršyja pasažyry ŭ novym ciahniku zadavolenyja i canoj, i jakaściu: «Kłasna, niadoraha i chutka, tolki kab košt prajezdu nie padniali», — vykazałasia adna z žančyn, vychodziačy ź ciahnika.
Nie zadavalniaje žycharoŭ Baranavičaŭ adno — raskład. Bo niezrazumieła, navošta žycharam Baranavičaŭ jechać na noč hledziačy ŭ stalicu, chaj sabie i chutka, i z kamfortam? Abo jechać u Brest i prybyvać tudy tolki apoŭdni?
Asnoŭnuju prablemu žycharoŭ našaha horada, jakija marać pryjazdžać u Minsk da vaśmi ranicy na elektryčcy, novy ciahnik tak i nie vyrašyŭ. Pakul što.
Jak rastłumačyŭ namieśnik načalnika Baranavickaha adździaleńnia Biełaruskaj čyhunki Piotr Kraŭčuk, elektryčka kala miesiaca budzie kursiravać u testavym režymie. Śpiecyjalisty BČ aceniać pasažyrapatok, zapatrabavanaść, pastarajucca ŭličyć pažadańni pasažyraŭ i tolki paśla 20 śniežnia zaćvierdziać novy raskład elektryčki.
Pa słovach načalnika vakzała «Baranavičy-Paleskija» Juryja Savosia, elektryčka karystajecca popytam u studentaŭ-minčan i, da prykładu, u vychadnyja ŭ bok Minska byli raskupleny ŭsie kvitki. Ale voś nakolki rejs budzie zapatrabavany ŭ budnyja dni, pakaža čas.
Daviedka «IP»
U sakaviku minułaha hoda BČ zaklučyła kantrakt sa šviejcarskaj kampanijaj Stadler na pastaŭku 10 elektraciahnikoŭ. Košt kožnaha składaje kala 6 młn jeŭra. Na paskareńnie ciahnika da 120 km/h sychodzić usiaho 43 siekundy. Na asobnych učastkach maršrutu Brest - Baranavičy ciahnik razhaniajecca da 140 km/h, choć kanstrukcyjnaja chutkaść šviejcarskaj elektryčki dazvalaje razhaniacca i da 160 km/h. Adnak, pakul nie dazvalajuć techničnyja charaktarystyki čyhunki. Čakajecca, što ŭ hetym hodzie na napramku Minsk-Brest rekanstrukcyja šlachoŭ praciahniecca, i heta dazvolić šviejcarskaj elektryčcy razahnacca da nieabchodnaha chutkasnaha režymu.
Darečy
Prajaznyja dakumienty ŭ Baranavičach pasažyry zmohuć kupić tolki ŭ sutačnych kasach: na pieršym paviersie vakzała «Baranavičy-Paleskija» u sutačnych kasach № 2-3, na druhim paviersie — u kasach № 1 i 6. Kvitok na ciahnik možna kupić i zahadzia — za 45 sutak da adpraŭleńnia ŭ darohu.
Hladzi taksama: «Flirt» u testavym režymie
