Salihorski «Šachcior» zaviaršaje spabornictvy ŭ futbolnaj Lizie Jeŭropy, ledź pačaŭšy ich. U druhim kvalifikacyjnym raŭndzie kamanda z Salihorska sustrakałasia z łatvijskim «Vientśpiłsam».
Pieršaja hulnia ŭ Biełarusi tydzień tamu pryniesła minimalnuju pieramohu haściam. Na pieradapošniaj chvilinie adznačyŭsia Kasačoŭ.
Tym nie mienš, u Łatviju našy chłopcy jechali z upeŭnienym nastrojem. Aptymizmu dadaŭ jašče chutki hoł. Užo na šostaj chvilinie Kałamyc vyvieŭ salihorcaŭ napierad.
U pieršym tajmie «Šachcior» atakavaŭ uvieś čas, što potym zdaryłasia ŭ druhim ciažka rastłumačyć.
U «Vientśpiłsa» taksama atrymaŭsia chutki hoł. U pačatku druhoha tajma na svoj rachunak jaho zapisaŭ Mvonda. Tym nie mienš, namahańniami Kamaroŭskaha biełarusy znoŭ vyjšli napierad.
Praź siem chvilin usio toj ža Mvonda zabiŭ sprečny pienalci. Ničyi našym było mała, ale navat jaje ŭtrymać nie vyjšła. Užo ŭ kampiensavany čas Fiederyka Marcines prynios pieramohu svajoj kamandzie — 3:2.
«Vientpiłs» kročyć dalej. Što datyčyć «Šachciora», to nad kamandaj łunaje nibyta praklaćcie. «Harniaki» jašče ni razu nie prachodzili nivodnaha supiernika ŭ jeŭrakubkach (Kubak Intertota nie ličycca) i tolki adnojčy zmahli zhulać uničyju.
Nu, a horad Vientśpiłs dla biełaruskich futbalistaŭ nieščaślivy. Dva hady nazad u Lizie čempijonaŭ tut astupiŭsia barysaŭski BATE.
