Biełaruś nie pahasiła doŭh za rasijskuju elektraenierhiju za adviedzieny pieryjad 7

Biełaruś nie pahasiła doŭh za rasijskuju elektraenierhiju ŭ pryznačany termin. «Na 8.30 pa maskoŭskim časie 28 červienia nieabchodny płaciež za elektraenierhiju nie pastupiŭ. U hetaj suviazi ŭ adpaviednaści z zajaŭkaj ŭ Sistemny apieratar my z 00.00 msk 29 červienia (23:00 pavodle minskaha) poŭnaściu spyniajem pastaŭki elektraenierhii ŭ Biełaruś. Čakajem ad biełaruskich partnioraŭ pahašeńnia doŭhu i čarhovaha płaciažu ŭ poŭnym abjomie», — cytuje RIA Novosti aficyjnaha pradstaŭnika «Inter RAO».

Kamientaryjaŭ ź biełaruskaha boku pakul niama.

Nahadajem, 9 červienia «Inter RAO JEES» abmiežavała pastaŭki elektraenierhii ŭ Biełaruś z-za najaŭnaści zapazyčanaści. Na toj momant doŭh składaŭ 1,5 młrd. rasijskich rubloŭ. Pieršapačatkova poŭnaje spynieńnie pastavak u vypadku niepahašeńnia doŭhu płanavałasia na 22 červienia, adnak zatym było pryniata rašeńnie pieranieści jaho na 27 červienia.

Pa vynikach pieramoŭ byŭ składzieny i padpisany hrafik płaciažoŭ, zhodna ź jakim Minsk abaviazaŭsia pahasić zapazyčanaść za rasijskuju elektraenierhiju da 5 lipienia. 13 červienia pastaŭki ŭ Biełaruś byli poŭnaściu adnoŭlenyja, a 15-ha — «Biełenierha» pieraličyła pieršy tranš płaciažu pa zapazyčanaści ŭ pamiery 600 młn. rasijskich rubloŭ, doŭh za sakavik.

23 červienia prem'jer-ministr Biełarusi Michaił Miaśnikovič u chodzie vizitu ŭ Sankt-Pieciarburh zajaviŭ: Biełaruś poŭnaściu raźličycca za pastaŭlenuju elektraenierhiju da 28 červienia. Pavodle jaho słoŭ, «u pryncypie, u Biełarusi dastatkova mahutnaściej, kab zabiaśpiečyć unutrany rynak u elektraenierhii poŭnaściu, navat z zališkam», adnak niekatoryja enierhietyčnyja mahutnaści ŭ Biełarusi «nie vielmi efiektyŭnyja».

Zapazyčanaść uźnikła ŭ suviazi z kryzisam na valutnym rynku Biełarusi. Pradstaŭniki «Biełenierha» śćviardžali: u ich dastatkova biełaruskich rubloŭ dla raźliku z rasijskim pastaŭščykom — prablema ŭ kanviertacyi valuty.

Dola rasijskaj elektraenierhii siońnia składaje 12% u bałansie sutačnaha enierhaspažyvańnia Biełarusi. Sioleta Biełaruś maje namier impartavać z Rasii 3 młrd. kVt.hadz elektraenierhii pa kantrakcie z «Inter RAO».

0

0

0

0

0

0

BiełaPAN

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH