Kredyt u abmien na «Biełtranshaz»? 6

Niečakanaja zajava Alaksandra Łukašenki, jaki raptoŭna paviedamiŭ pra miarkujemy $6-miljardny kredyt tolki zabłytała situacyju na valutnym rynku. «Ja tolki što razmaŭlaŭ z prezidentam Rasii Dźmitryjem Miadźviedzievym. Jon patelefanavaŭ mnie. U nas iduć pieramovy z Rasijaj Fiederacyjaj ab pradastaŭleńni stabilizacyjnaha kredytu na padtrymańnie kursu biełaruskaha rubla. Pa ŭsich pieramovach jany hatovyja da taho, kab terminova, kali heta treba, i nie terminova, kali heta nam nie treba, adreahavać na heta. I heta prykładna $3,1 miljarda, kali my, viadoma, budziem padpisvać ź imi adpaviednaje pahadnieńnie», — cytuje Łukašenku BiełTA.

Rasijski kredyt — ledź nie apošniaja nadzieja Łukašenki na vyratavańnie ekanomiki ad abvału.

Ale nahadajem, što mienš za tydzień tamu ministr finansaŭ Rasii Alaksiej Kudryn rastłumačyŭ, što jaho kraina nie źbirajecca vydzialać Biełarusi dziaržaŭny kredyt. Jon paraiŭ Łukašenku zaniacca pryvatyzacyjaj, udakładniŭšy, što adzinaja mahčymaja dapamoha sioleta — z Antykryzisnaha fonda JeŭrAzES pamieram $1 miljard. Na takija samyja kredyty Biełaruś nibyta moža raźličvać i ŭ 2012, i ŭ 2013 hodzie. Łukašenka moh vydać žadanaje za sapraŭdnaje — i ŭ jaho pramovie, i ŭ słovach Kudryna praskokvajuć ličba ŭ $3 miljardy, ale ich termin ich vydačy niapeŭny.

Ale Alaksandr Łukašenka zahavaryŭ jašče i pra niejkija dadatkovyja miljardy: «Prykładna $3 miljardy — heta budučyja prodažy našych tavaraŭ. Nas hatovyja prakredytavać». Hetaja zajava kiraŭnika Biełarusi znachodzicca pa-za miežami razumieńnia ekanamistaŭ.

«U lubym vypadku kredytujuć pakupnika, a nie pradaŭca», —

razvodzić ruki ekanamist Siarhiej Čały.

Ci byŭ nasamreč zvanok z Kramla? Rasijski bok paćvierdziŭ fakt razmovy, ale abmiežavaŭsia ścisłaj infarmacyja: «Kiraŭniki dziaržaŭ abmianialisia mierkavańniami pa klučavych temach dvuchbakovaj paviestki dnia».

Adzin z mahčymych varyjantaŭ raptoŭnaj dabračynnaści Miadźviedzieva i Pucina byŭ «źlity» krynicaj u rasijskim kiraŭnictvie ahienctvu «Interfaks». Jon zvodzicca da miarkujemaha prodažu Rasii kantrolnaha pakieta akcyj «Biełtranshaza».

Nahadajem, što «Hazprom» na praciahu 2007–2010 hadoŭ vykupiŭ 50% akcyj «Biełtranshaza» za $2,5 miljarda.

Aproč taho,

słovy Łukašenki nakont pamieru kredyta padazronna nahadvajuć raniejšyja zajavy Uładzimira Pucina nakont kredyta na budaŭnictva biełaruskaj AES.

Tam taksama fihuravali zahadkavyja $6 miljardaŭ.

Zajava Łukašenki ŭ lubym vypadku nie ŭmacavała biełaruski rubiel.

Kurs abmienu dalara na prokopovi.ch paśla «pryznańnia» kiraŭnika Biełarusi tolki padniaŭsia.

Na dadzieny momant jon dashianuŭ 6 tysiač rubloŭ za dalar.

Jaŭhien Vasilkoŭ

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH