Siužet telekanała RTR u «Viestiach niedieli» pra Biełaruś cenzura znoŭ vyrazała z efiru.
Pryvodzim stenahramu i videa siužetu:
Całkam inšaja atmaśfiera, jakaja, zrešty, šmat u čym vyznačajecca pieradvybarnaj kampanijaj, składajecca ciapier u adnosinach pamiž Maskvoj i Minskam. Alaksandr Łukašenka na hetym tydni znoŭ zrabiŭ šerah vypadaŭ u adras Rasii. Dźmitryj Miadźviedzieŭ u svaim tvitery na pytańnie biełaruskaha karystalnika ab vybarach kiraŭnika Biełarusi napisaŭ: «Da vašych vybarach staŭlusia maksimalna pavažliva. A pra vašaha prezidenta ja ŭžo ŭsio skazaŭ». Miž tym u Minsku na hetym tydni adbyŭsia mitynh apazicyi, jaki ŭłady, nasupierak zvyčaju, nie stali razhaniać.
Centr Minska. Krychu mienš za miesiac da vybaraŭ prezidenta. Źvierchu ź vialikaha manitora nad hałovami prysutnych hučyć hrozny hołas čałavieka ŭ prakurorskaj formie. Namieśnik načalnika adździeła pa nahladzie za vykanańniem pravoŭ i svabodaŭ hramadzian abiacaje surova pakarać arhanizataraŭ hetaj akcyi, a ŭ natoŭpie to tut to tam uźnikajuć supracoŭniki śpiecsłužbaŭ. Jany zdymajuć na videakamiery tych, chto pryjšoŭ.
Suadnosiny źjaŭleńnia ŭ efiry z Alaksandram Łukašenkam — 20 da adnaho nie na karyść apazicyi.
«Što tut kazać, kali za 2010 hod tolki bulba padaražeła ŭ paŭtara razu», — kanstatuje Ryhor Kastusioŭ, namieśnik staršyni Partyi BNF, kandydat na pasadu prezidenta Respubliki Biełaruś.
Adnosiny z Rasijaj — pieradvybarčy kaniok kandydata Łukašenki. Najbližejšy susied ciapier — vorah numar adzin. Hetym razam prezident niezadavoleny cenami na rasijskuju zbroju.
«Heta nie padychod, kali nam prapanoŭvajuć kuplać uzbrajeńnie samim i jašče pa rynkavych cenach. Na hetym napramku Rasija zacikaŭlenaja, kab naša armija była ŭ paradku, tamu treba dapamahać», — śćviardžaje Alaksandr Łukašenka, prezident Respubliki Biełaruś.
«Uvieś čas Alaksandr Łukašenka zajmaŭsia tym, što prasiŭ i braŭ u Rasii hrošy. Jon, ułasna, bolš ničoha nie rabiŭ, tolki duryŭ Rasiju: «Dajcie hrošy, dajcie hrošy», — tłumačyć Uładzimir Niaklajeŭ, kandydat na pasadu prezidenta Respubliki Biełaruś, lidar hramadskaj kampanii «Havary praŭdu!».
Ciapier Łukašenka čakaje dapamohi ad Zachadu. Vizit ministraŭ zamiežnych spravaŭ Polščy i Hiermanii ŭ Minsk. Ministry nie chavajuć: havorka išła pra blizkija vybary.
«U Biełarusi ciapier jość unikalny šaniec. Kali vybary, pra jakija my havaryli na našaj sustrečy, buduć spraviadlivymi, to Biełaruś zmoža karystacca ŭsimi pieravahami va ŭzajemaadnosinach nie tolki z Polščaj, ale i ŭsioj Jeŭropaj», — miarkuje Radasłaŭ Sikorski, ministr zamiežnych spravaŭ Polščy.
Try miljardy jeŭra ŭ nastupnyja try hady paabiacali Biełarusi ŭ vypadku, kali pieradvybarnaja hulnia budzie vieścisia pa praviłach. Ale apazicyja nazyvaje pieradvybarnuju kampaniju iluzijaj, a dazvolenyja mitynhi i teleefir — šyrmaj, stvoranaj tolki dla atrymańnia jeŭrapiejskich hrošaj.
«Hałoŭnaja zadača režymu z tych časoŭ — falsifikacyja vybaraŭ. Naziralnikaŭ nie dapuskajuć da padliku hałasoŭ. Ni adzin refierendum i ni adny vybary nie pryznanyja Jeŭropaj», — kanstatuje Andrej Sańnikaŭ, kandydat na pasadu prezidenta Respubliki Biełaruś, kaardynatar hramadzianskaj kampanii «Jeŭrapiejskaja Biełaruś».
Na hetym tydni Łukašenka razmaŭlaŭ z karespandentam francuzskaj «Fiharo».
«Adzinaje, što ja chaču: kab Jeŭropa ŭ tym liku viedała, što Łukašenku abraŭ narod», — kaža Alaksandr Łukašenka.
Kruty razvarot ad Rasii ŭ bok Jeŭrasajuza nie moh zastacca niezaŭvažanym. Jak byccam sihnał «my cenim vašy starańni» — paćvierdžańnie ekśpiertami ABSIE aficyjnaj viersii hibieli zasnavalnika apazicyjnaha sajta «Chartyja'97» Aleha Biabienina. U vieraśni Biabienin byŭ znojdzieny paviešanym u siabie na leciščy pad Minskam. Nie asabliva ŭdajučysia ŭ padrabiaznaści, śpiecyjalisty z Narviehii i Šviecyi zhadžajucca ź mierkavańniem śledstva — šarahovaje samahubstva. Kalehi i znajomyja Biabienina nazyvajuć heta častkaj vialikaj palityčnaj hulni.
«Hetyja ludzi znachodzilisia ŭ Biełarusi tolki try dni, i jany sami paćviardžajuć, što nie pravodzili rasśledavańnia, a rabili vysnovy tolki na padstavie dakumientaŭ, pradstaŭlenych łukašenskaŭskaj prakuraturaj i milicyjaj», — kaža Źmicier Bandarenka, kiraŭnik pieradvybarčaha štaba kandydata na pasadu prezidenta respubliki Biełaruś.
«Siońnia biełaruskija ŭłady razumiejuć, što mohuć spakojna zabivać žurnalistaŭ. A ekśpierty z ABSIE buduć zapluščvać vočy», — aburajecca Natalla Radzina, redaktarka
Usio ŭ tym ža intervju francuzskamu žurnalistu Alaksandr Łukašenka robić važnuju zajavu. Za śpinaj apazicyi jon razhledzieŭ ruku Rasii.
«Naša tak zvanaja apazicyja dziejničaje z pazicyi «čym horš, tym lepš». Niaklajeŭ, Sańnikaŭ — heta tyja ludzi, jakija finansujucca Rasijaj», — miarkuje Alaksandr Łukašenka.
Apazicyja adreahavała chutka. Na prezidenta paabiacali padać u sud za paklop.
«U Łukašenki ciapier suviaź z Maskvoj źjaŭlajecca admoŭnym elemientam. Jon chacieŭ pakryŭdzić mianie, kali ja skazaŭ, što Maskva mianiaje svaju pazicyju, što Maskva vielmi patrebnaja, što Łukašenka nie partnior dla Rasii. Nu, toje, što jon chłusić — heta my ŭsie viedajem», — kaža Andrej Sańnikaŭ, kandydat na pasadu prezidenta Respubliki Biełaruś, kaardynatar hramadzianskaj kampanii «Jeŭrapiejskaja Biełaruś».
Na nastupnym tydni ŭ Biełarusi pačynajucca pieradvybarčyja teledebaty. Dziejny i, jak upeŭnienyja ŭsie biez vyklučeńnia, budučy prezident Biełarusi demanstruje vybarščykam svaju fizičnuju formu impravizavanym vychadam na kort suprać pieršaj rakietki płaniety Karalin Vaźniacki i najlepšaj biełaruskaj tenisistki Viktoryi Azaranki. Ad udziełu ŭ televizijnym pajadynku z palityčnymi apanientami Alaksandr Łukašenka admoviŭsia.
