U vas budzie dzicia!

U budzionnaj kruhavierci štodzionnyja kłopaty ŭjaŭlajucca nam vielmi važnymi. Takimi važnymi, što, badaj, niemahčyma ŭchilicca ad ich navat na chvilinku, chacia b i dziela čaho-kolviek «vysokaha i viečnaha». I tolki kali nam na vočy traplajecca štości vyrazna adroznaje ad našaj štodzionnaści, my prypyniajemsia ŭ zadumieńni…

Pavodle Dziciačaha fonda Arhanizacyi Abjadnanych Nacyj na Biełarusi isnuje ceły šerah składanaściaŭ, jakija admoŭna ŭpłyvajuć na našych dziaciej. Ale adna z samych važnych prablem — vychavańnie dziaciej, pazbaŭlenych siamji. Dzieci-siroty i dzieci niahiehłych baćkoŭ, pazbaŭlenych baćkoŭskich pravoŭ, patrabujuć apieki i hramadskaj padtrymki. Ad našaha z vami siońniašniaha kłopatu pra ich, zaležyć toje, u jakoj supolnaści my budziem žyć zaŭtra.

Respublikanski bank dadzienych ab dzieciach, jakich miarkujecca ŭsynavić, naličvaje bolš za 6 tysiač dziaciej-sirot i dziaciej, pazbaŭlenych baćkoŭskaj apieki. Usie jany vychoŭvajucca ŭ dziciačych damach, škołach-internatach, damach dziciaci… Ale kožnaha ź ich abjadnoŭvaje adno žadańnie — žyć u siamji!

Dziela ažyćciaŭleńnia prava dziciaci na vychavańnie ŭ siamji naša kraina praduhledzieła šmat mažlivaściaŭ:

— usynaŭleńnie;

— pieradača na vychavańnie ŭ apiakunskuju siamju;

— pieradača na vychavańnie ŭ pryjomnuju siamju;

— arhanizacyja «haściavoj» siamji.

Najbolš prostaj z takich mahčymaściaŭ źjaŭlajecca «haściavaja» siamja — pryjom dziciaci ŭ siamju na vychodnyja i vakacyjnyja dni. Pryhatavać ježu i pamyć za saboj posud, schadzić na pryhodnickaje kino i razam z «bratam» ci «siastroj» pajeści maroziva, pahulać u parku i naviedać «babulu ź dziadulem» — voś tyja prostyja rečy, jakija dazvalajuć samotnaj malečy pa-sapraŭdnamu adčuć svaju jednaść ź siamjoj, jakaja tak jamu patrebnaja!

Apiakunskaja siamja — siamja, u jakoj adzin čałaviek albo muž i žonka vykonvajuć abaviazki pa vychavańni dziaciej-sirot. Mažlivaść stać apiekunom dajecca paŭnaletnim dziejazdolnym hramadzianam krainy i spraviadliva ličycca samym prostym i dziejsnym srodkam viartańnia siamji dziciaci, pazbaŭlenamu baćkoŭskaj uvahi, svajakami hetaha dziciaci.

Pryjomnaja siamja — heta siamja, jakaja prymaje na vychavańnie dziaciej-sirot i dziaciej, pazbaŭlenych baćkoŭskaj apieki. Dziejnaść pryjomnaj siamji ažyćciaŭlajecca ŭ adpaviednaści z damovaju ab pieradačy dziaciej na vychavańnie i pracoŭnaj damovaj. Vychavalnik, takim čynam, pieraŭvasablajecca ŭ pracaŭnika i vykonvaje abaviazki baćki, dziakujučy jakim atrymlivaje ad dziaržavy štomiesiačny zarobak u 600 tys. rubloŭ, hrašovuju padtrymku na vychavańnie dziciaci ŭ pamiery 350 tys. rubloŭ, poŭny sacyjalny pakiet i štohadovy apłačany adpačynak.

Usynaŭleńnie — abhruntavany sudovym rašeńniem jurydyčny akt, pavodle jakoha pamiž vychavalnikam i vychavancam paŭstajuć takija ž pravy i abaviazki, jak i pamiž baćkami ź dziećmi. Dzicia robicca paŭnavartasnym členam siamji!

Na Biełarusi štohod usynaŭlajecca bolš za 500 dziaciej, bolš za 4 tys. dziaciej prymajucca ŭ siemji hramadzian pad apieku, u pryjomnyja siemji i dziciačyja damy siamiejnaha typu. U śviadomaści žycharoŭ krainy ŭsio bolš zamacoŭvajecca mierkavańnie, što pytańnie dapamohi dzieciam, pazbaŭlenym baćkoŭskaj uvahi, — jak kłopat dziaržavy, supolnaści, tak i sprava kožnaj asobnaj siamji. Dałučajciesia!

Daviedacca pra svaje mažlivaści spraŭdzić maru dziciaci-siraty ab vychavańni ŭ siamji vy možacie pa telefonie (017) 284-71-51 ci na staroncy www.child.of.by Nacyjanalnaha centra ŭsynaŭleńnia Ministerstva adukacyi Respubliki Biełaruś.

0

0

0

0

0

0

Alaksandr H. Vorvul

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH