Lidar ruchu «Za Svabodu» nie budzie bałatavacca ŭ prezidenty. Pry hetym jon zajaviŭ pra padtrymku błoku troch prajeŭrapiejskich kandydataŭ.
Alaksandr Milinkievič admoviŭsia ŭdzielničać u prezidenckich vybarach u jakaści kandydata. Pra heta jon zajaviŭ na pres-kanfierencyi 17 vieraśnia.
Pryčynaŭ admovy jon nazvaŭ dźvie.
Adnoj z hałoŭnych umoŭ udziełu Milinkieviča ŭ vybarach było patrabavańnie źmienaŭ u vybarčaje zakanadaŭstva. Źmienaŭ, jakija b zrabili praces vybaraŭ i padlik hałasoŭ prazrystym, u tym liku zabiaśpiečyli b udzieł u padliku hałasoŭ niezaležnych naziralnikaŭ. Ad imia ruchu «Za Svabodu» ŭ ABSIE, BDIPČ, Jeŭraparłamient, Jeŭrakamisiju, Radu Jeŭropy, ambasadaram Jeŭrasajuza i SND u Minsku byli nakiravanyja listy z prośbaj zrabić vykanańnie hetaha patrabavańnia hałoŭnaj umovaj pryznańniem prezidenckich vybaraŭ 2010 h. u Biełarusi. Adnak, 14 vieraśnia 2010 h. staršynia CVK Lidzija Jarmošyna zajaviła, što nijakich źmienaŭ u zakanadaŭstva ŭnosicca padčas kampanii nie budzie.
«Nie chaču ŭdzielničać u śpiektakli, dzie adzin režysior i scenaryst, nie chaču być statystam», — padkreśliŭ Milinkievič. Jon nie vyklučaje, što siońnia ŭsio idzie da čarhovaha pryznačeńnia Łukašenki na pasadu kiraŭnika krainy.
Druhaja pryčyna jahonaj admovy zaklučajecca ŭ adsutnaści adzinstva ŭ apazicyi.
Na jaho dumku, situacyja ŭ 2006 h. i sioleta mocna adroźnivajucca. Tady Łukašenka mieŭ mocnuju padtrymku ŭnutry krainy, nie vajavaŭ z Rasijaj i byŭ izalavany ad Zachadu. My tady taksama byli macniejšyja, kaža Milinkievič. U 2006 h. apazicyja zdoleła abjadnacca, ciapier hetaha niama. Milinkievič padkreśliŭ, što ŭ minułuju kampaniju apazicyja ŭjaŭlała saboj maralnuju alternatyvu režymu, ciapier ža jana pavinna być alternatyvaj prabiełaruskaj.
«Vielmi važna zaśviedčyć, što jość takija siły, jakija stajać na nacyjanalnych, biełaruskich pazicyjach».
Alaksandr Milinkievič nie spynić palityčnaj i hramadskaj dziejnaści. U hetaj vybarčaj kampanii jon budzie padtrymlivać błok troch prajeŭrapiejskich kandydataŭ — Alesia Michaleviča, Ryhora Kastusiova i Juryja Hłušakova. Lidar ruchu «Za Svabodu» budzie ŭdzielničać u zbory podpisaŭ, pikietach i sustrečach z vybarščykami.
Milinkievič vykazaŭ upeŭnienaść, što svaim udziełam u kampanii jon užo ciapier moža paŭpłyvać na situacyju ŭ bližejšaj budučyni, a kali dakładniej, to na chutkich užo parłamienckich vybarach.
Adkazvajučy na pytańnie, ci budzie sioleta Płošča, jon zajaviŭ, što ŭsio vyrašycca ŭ zaležnaści ad kankretnaj situacyi. Płošča, na jaho dumku, heta adzin sa sposabaŭ adstojvańnia svaich pravoŭ. Hałoŭnaje, kab jaje scenar pisaŭsia ŭ Biełarusi, kab jon praduhledžvaŭ vyklučna mirnyja dziejańni.
Kandydat ad BNF Ryhor Kastusioŭ padkreśliŭ, što jahonaja partyja idzie na vybary ŭsurjoz. Našy dziejańni, zajaviŭ jon, buduć karektavacca ŭ zaležnaści ad situacyi ŭ časie vybaraŭ.
Aleś Michalevič zajaviŭ, što ŭdzielniki prajeŭrapiejskaha błoku buduć dziejničać u ramkach adzinaha palityčnaha scenaru.
Aleh Novikaŭ paviedamiŭ, što kandydat ad «zialonych» Hłušakoŭ, jaki ciapier u Rasii ŭdzielničaje ŭ akcyi ŭ abaronu Chimkinskaha lesu, praciahvaje svaju kampaniju. Pry hetym Novikaŭ pryznaŭ, što «zialonyja» nie majuć naležnaha dośviedu ŭdziełu ŭ padobnych kampanijach, tamu raźličvajuć na padtrymku ŭ ramkach kaalicyi. Skarystaŭšysia nahodaj, staršynia «Zialonych» nahadaŭ pra ekołaha Uładzimira Vałodzina, jaki dahetul znachodzicca za kratami SIZA.
Pradstaŭniki błoku i Milinkievič publična padpisali pahadnieńnie Hramadzianskaja akcyja «Biełaruski vybar».
Svaje podpisy pad pahadnieńniem akramia lidara ruchu «Za Svabodu» pastavili staršynia Partyi BNF Alaksiej Janukievič, Staršynia Biełaruskaj partyi «Zialonyja» Aleh Novikaŭ i staršynia Sajuza «Za madernizacyju» Aleś Michalevič. Paŭnamoctvy pradstaŭlać błok atrymaŭ Milinkievič.
