3 vieraśnia ŭ Hrodnie startavała hramadskaja akcyja «Adnovim Kałožu razam!»
Dumali vykarystoŭvać hranit i bazalt.
Ale skončycca ŭsio hazasilikatam. Fota forum.grodno.net
Choć akcyja i nazyvajecca «hramadskaj», inicyjavaŭ jaje vykankam.
Kampanii papiaredničała maštabnaje apytańnie hramadskaj dumki pa telefonach haračaj linii i na vulicach. Za try dni siabry hrodzienskaha BRSM apytali 2019 čałaviek, ź jakich 85,7% vykazalisia za «adnaŭleńnie carkvy».
Adnak što majecca na ŭvazie pad adnaŭleńniem?
Historyki niepakojacca, što ŭ časie rekanstrukcyi staražytnaj Barysahlebskaj carkvy, jakuju nazyvajuć jašče Kałožaj, buduć vykarystoŭvacca sučasnyja budmateryjały, jak heta robicca ŭ Niaśvižy dy Miry. Zahadčyca kafiedry historyi Biełarusi Hrodzienskaha ŭniviersiteta imia Janki Kupały Śviatłana Marozava ŭchvaliła imknieńnie ŭładaŭ raicca z narodam. Adnak, kali havorka idzie pra takija važnyja pytańni, jak budučynia Kałožy, miarkuje jana, apošniaje słova musić być za śpiecyjalistami.
Jak apynulisia, pieraściarohi hrodzienskich historykaŭ nie byli marnymi. U pačatku vieraśnia na miascovym telekanale prahučała infarmacyja, što stračany pry abvale hruntu mur vybudujuć z hazasilikatnych błokaŭ.
Miž tym zhodna z raźmieščanymi na sajcie abłvykankama eskizami architekturnaha prajekta adnaŭleńnia carkvy stračanuju ścianu musili adnaŭlać z kieramičnaj cehły-plinfy i apracavanych vałunoŭ — jak i budavali kaliści.
Ciapier paličyli, što draŭlanuju ścianu tańniej zamianić ścianoj ź pienabłokaŭ, schavanych pad plinfaj.
Dekan architekturnaha fakulteta BNTU Armien Sardaraŭ kaža, što jašče dva hady tamu vykazvaŭsia suprać vykarystańnia sučasnych budaŭničych materyjałaŭ pry adnaŭleńni Kałožy. «Kali my adnaŭlajem unikalnyja pomniki z vykarystańniem žalezabietonu i hazasilikatu, to pryŭnosim u ich elemient niesapraŭdnaści. A tym bolš, kali havorka pra taki abjekt, jak carkva CHII st.» Architektar trymajecca mierkavańnia, što ŭ vypadkach z razburanymi abo častkova parušanymi pomnikami, jak Kałoža, lepš pakinuć usio jak jość, papiarednie hruntoŭna zakansiervavaŭšy.
Hrodzienskaja jeparchija pravasłaŭnaj carkvy miarkuje, što chram treba adnavić u vyhladzie, maksimalna nabližanym da pieršapačatkovaha, h.zn. u staražytnaruskim styli z architekturnymi detalami, ułaścivymi pravasłaŭnym chramam vizantyjskaha typu. Heta značyć, chram moža nabyć nad saboj kupał.
